Бид итгэлийн амьдралдаа Бурханы төлөө зовлон эдлэх үедээ урам хугарах биш харин ч урам зоригтой байх ёстой. Учир нь Бурхан зовлон бэрхшээлээр дамжуулан биднийг төлөвшүүлэн босгодог. Бид өөрсдийнхөө үйлдсэн буруу үйлдлийн улмаас бус харин Бурхан бидэнд зөвшөөрсний дагуу зөв зүйлийн төлөө зовлон эдлэх үедээ Бурханыг алдаршуулж байдаг. Бид бүгд хожим нь Бурханы өмнө энэ дэлхий дээр амьдарч байсан амьдралынхаа дагуу шүүгдэх болно. Бурхан итгэгч биднийг ч шударгаар шүүх юм бол тэр тусмаа үл итгэгчдийн дээр буух шүүлт үлэмж хатуу байх болно.  

Есүс Христ дахин ирэх үед үхсэн амьд бүх хүнийг шударгаар шүүх болно. Чухамдаа үүний тулд сайнмэдээг бид тунхагладаг. Хожим нь Есүс Христийг дахин ирэх үед бид энэ дэлхий дээр амьдарч байсан амьдралынхаа дагуу шүүгдэх болно. Тиймээс бид сүнсээрээ сэргэг байж, бие биендээ хайраар үйлчилж амьдрах учиртай. Хүн бүр өөрсдийн хүлээн авсан сүнслэг бэлгүүдээр үйлчлэн Христийн чуулганыг босгон байгуулах хэрэгтэй. Бидний амьдралд зовлон тохоилдох үед итгэгч ахан дүүсийнхээ амьдралд буй зовлон бэрхшээлийг санахдаа урам зоригтой байх хэрэгтэй.

Бидний төлөө зовлон эдэлсэн Есүс Христээр дамжуулан бид Бурхантай эвлэрч гэм нүглээс ангижруулагдсан. Тиймээс бид цаашид хуучин мөн чанарынхаа дагуу гэм нүглийг үйлдэж биш харин шинэ мөн чанарынхаа дагуу гэм нүглээс холдож, зөв сайныг үйлдэж амьдрах учиртай. Бид урьдын гэм нүгэлт амьдралаасаа зайлсхийх үед энэ дэлхий биднийг гадуурхаж муучилдаг ч бид цаашид өөрийн хүслийн дагуу биш харин Бурханы хүслийн дагуу амьдрах ёстой.

Итгэгчид бид өөр хоорондоо эв найртай, энэрэнгүй, ах дүүсэг, дөлгөөн даруу хандах ёстой. Бид амар тайвныг хайж, сайныг үйлдэж, амаа хорон муу үгс хов живээс хол байлгах учиртай. Бид зүрх сэтгэлдээ Христийг нандигнан хайрлах үедээ бид ахан дүүстээ ийнхүү хандаж чаддаг. Христ бидний төлөө зовлон эдэлсэн учир бид ч бас Христийн төлөө зовлон эдлэхдээ сэтгэлээр унаж, урам хугарах биш харин ч урам зоригоор дүүрэн байх ёстой.  

Өнгөрсөн хичээлээр бид 1Петр номын 2-р бүлгийг үзэж дууссан. Тэгвэл хамтдаа энэ цагт 1Петр номын 3-р бүлгийн эхний хэсгийг үзэцгээе. Энэ хэсэгт итгэгч бидний амьдрал дахь зовлон бэрхшээлээр дамжуулаад бид итгэлийн амьдралдаа бурханлаг үр жимсийг гаргаж чаддаг тухай өгүүлсэн байдаг. Ингэхдээ бид гэр бүл дотроо, мөн сүм чуулган дотроо хэрхэн алхах учиртайг сануулсан байдаг.

Бид үл итгэгчдийн дунд биеэ зөв авч яван үүгээрээ Бурханыг алдаршуулах ёстой. Мөн хүмүүсийн бий болгосон аливаа эрх мэдлийн зохион байгуулалтанд дуулгавартай байж шударга бусаар зовлон эдлэхдээ ч Есүс Христийн үлгэр жишээг даган тэвчээртэй хандах ёстой. Бид шударга бусаар гүтгэгдэн зовохдоо ч тэвчих үед Бурхан биднийг сайшаадаг.

Барилгачдын голсон чулуу барилгын булангийн тулгуур чулуу болсон шиг Есүс Христ ч бас Өөрийнхөндөө гологдсон ч хүн төрөлхтөний цорын ганц аврал болсон юм. Бид нэг бол энэ Чулуугаар аврагдана нэг бол энэ Чулуугаар шийтгэгдэнэ. Гэхдээ Түүнд итгэж Бурхан дээр ирэгсэдийг Бурхан сонгодсон угсаа, хаант тахилч, ариун үндэстэн, Бурханы эзэмшлийн ард түмэн болгодог. Тиймээс Бурханаас ийм гайхалтай ивээлийг авсан бид өөрсдийн амьдралаас бузар муу бүхнийг зайлуулж махбодын хүслээ хойш тавин амьдрах учиртай.

Итгэгчид бид Есүс Христээр дамжуулан авралыг авсан тул цаашид Есүс Христийн дотор өсч төлөвшин, сүнслэг барилга болон баригдах учиртай. Итгэгчид бидний хувьд сүнсээр өсөх цорын ганц сүнслэг хоол бол Бурханы үг юм. Бид энэ үг рүү нялх хүүхэд сүү рүүгээ тэмүүлдэг шиг хүсэн тэмүүлдэг байх учиртай

Бид нэг зүйлийг маш сайн ойлгож, үргэлж санах хэрэгтэй. Тэр бол Бурхан хүн бүрийг шүүхдээ шударгаар шүүдэг. Бурхан хэнийг ч ялгаварладаггүй. Бурхан итгэгч хүн бүрийг ч яг л адилхан шударгаар шүүх болно. Итгэгч бидний хувьд итгэлээр дамжуулан авралыг авсан учраас бид ялын шүүлтэнд орохгүй. Бид авралаа алдахгүй. Гэхдээ бидний хүн нэг бүр өөрсдийнхөө үйлсийн дагуу Бурханаар шүүгдэх болно.

Өмнөх хичээлээр бид бидний итгэл, итгэлийн шалгуур ямар үнэ цэнэтэй тухай үзсэн бол өнөөдрийн хичээлээр бид бүхэн тэрхүү шалгуур нь хэрхэн биднийг өсгөж байдаг талаар үзэх болно.