Өнгөрсөн хичээлээр бид Христийн дотор амар амгалан төгс дүүрэн амьдрах ухааны талаар суралцсан. Бид энэ дэлхийд амьдрахдаа олох ёстой зөвөөр таних ёстой зүйл бол итгэл үнэмшил гэдгийг сурсан билээ. Харин өнөөдрийн хичээлээр хуучин хүнээсээ салж, хуучин зан чанараа орхиж, шинэ хүнийг бий болгох тухай үзэх болно. Зан чанар, муу зуршил зэрэг өөрчлөх шаардлагатай зүйл хүний дотор олон байдаг. Яаж ч хичээгээд сөрөг зангаа засч чадахгүй байх тохиолдол, яаж ч мэрийгээд хорт зуршилаасаа салж дийлэхгүй байх үе хүмүүст олон тохиолддог. Харин өнөөдрийн хичээл Христтэй хамт байснаар, Ариун сүнсний хүчээр өөрийгөө шинэ хүн болгоход тань туслах болно. Нэг хийсэн муу зуршилаа ахин үйлдэхийг ой ухаан бидэнд сануулдаг бол хийсэн муугаасаа эргэж, ахин давтахгүй байх ятгалагыг Ариун сүнс танд сануулдаг юм. Сүм цуглаанд яваад өөрчлөгдөж байгаа олон хүнийг би харсан. Тэд яаж архинаасаа гарч, тамхиа хаяж, хань ижил, үр хүүхэдээ хайрлан, бусадтай нийцтэй сайн харилцааг шинээр үүсгэн өөрчлөгдөж чадсаны нууц нь Христ дотор шинэчлэгдсэнд л байгаа юм.

Бурхан хүн болгонд энэ дэлхийд амьдрах цаг хугацааг өгсөн. Бурханаас өгөгдсөн цаг хугацааг бид энэ дэлхийд амьдрахдаа эрдэм мэдлэг, эрх мэдэл, зугаа цэнгэл, аялал, кино, хов жив, нойр зэрэг олон зүйлд үрдэг. Зарим нь энэ дэлхийн мансуурал, хорт зуршилаас болж богино насалдаг бол зарим хүмүүс амьдралын буруу хэв маяг, буруу хооллолтоос бол насаа богиносгодог. Олон зүйлийг олох гэж, олон зүйлийг амьдралдаа бий болгох гэж хүн үхэн үхэтлээ тэмцдэг. Гэхдээ өнөөдрийн хичээл таны хайх ёстой нэг зүйлийг сануулах болно. Магадгүй таны нэн тэргүүнд хайх ёстой, эрж олох ёстой байсан зүйл юм. Энэ бол итгэл үнэмшил. Энэ дэлхийгээс хүмүүсийг явахад мөнхийн амь руу хүргэдэг ганцхан л гүүр бий. Тэр бол Есүс Христ юм. Учир нь Есүс энэ Мөнхийн аминд хүргэгч гүүрийг Өөрийнхөө биеэр тавьж, Өөрийнхөө амиар барьсан юм. Хэрвээ энэ үнэний мэдлэгийг эрж хайн, судалж, хүлээн зөвшөөрөн итгэх юм бол та тэр Мөнхийн амь руу дамждаг гүүрээр гарах болно.

Төгс дүүрэн, амар амгалан амьдрал хаана байдаг вэ?... Энэ асуултанд хүн болгон л өөр өөрийн өнцгөөс хариулах байх. Аз жаргалтай гэр бүл, ашиг орлого нь тэгширсэн хувийн бизнес, өндөр цалинтай дуртай ажлын байр, орон сууц, машин, авъяас билэгээрээ од болон гялалзсан урлагийн амьдрал гээд л олон зүйлийг дурдаж болох юм. Гэхдээ таны анзааралгүй орхисон нэг зүйлийг өнөөдөр судлах болно. Төгс дүүрэн байдал, аз жаргалтай сэтгэл хангалуун амьдрал бол өөрийнхөө мөн чанарыг таньж, зөв итгэл үнэмшилтэй амьдрахад л оршдог юм. Өнөөдөр авъяастай мөртлөө, байр машин, сайхан ажилтай хэрнээ, хүнээс гуйхааргүй мөнгөтэй байж, арай л болохгүй байгаа юм шиг дутуу сэтгэлтэй хүмүүс олон байна. Тэгвэл энэ бүхнээс авч чадахгүй, дүүрч сэтгэл чинь ханахгүй байгаа бол та өнөөдрийн хичээлд анхааралаа хандуулаарай. Итгэл үнэмшил гэдэг бол хүнийг зөв зүгт чиглүүлж, буруу зүйлээс хамгаалж байдаг хамгийн чухал зүйл. Ингээд өнөөдрийн хичээлийг сонсонгоо өөрийнхөө итгэл үнэмшилийг нэг бодож үзээрэй гэсэн уриалгаар нэвтрүүлэгээ эхлүүлье.

Хүн өөрийн гэсэн тогтсон үзэл бодол, итгэл үнэмшилтэй байх нь хамгийн чухал юм. Өнөөдөр итгэл үнэмшилгүйгээсээ болоод хорт зуршилд автаж байгаа, гэмт хэрэгт холбогдож байгаа хүмүүсийн тоо их байна. Үнэн зөв итгэл үнэмшилгүйгээсээ болоод төгсгөл нь үхэл рүү хөтөлдөг замаар ч зарим хүмүүс явах болжээ. Тэгэхээр итгэл үнэмшилээ зөв сонгоно гэдэг бол амьдралын хамгийн чухал үнэ цэнийн нэг юм. Христ итгэл бол Төгсгөл нь Мөнхийн амь руу хөтөлж, хүн бүрийг гэмт чанараа тэвчиж, зөв амьдрах боломжыг өгдөг гэдгийг хөтлөгч би батлан хэлж чадна. Ганцхан надаар тогтохгүй. Бүхий л Христэд итгэдэг хүн үүнийг гэрчлэх байх. Аливаа хүний амьдрал зөв үнэ цэнэ бүхий итгэл дотор суурилах юм бол амьдралынхаа туршид зөв амьдрах болно. Харин танд Христ дотор амьдралынхаа бат суурийг тавихад тань өнөөдрийн хичээл туслах болно.

Өнөөдөр бид олон төрлийн бие болоод сэтгэлийн зовлонг энэ амьдралаас эдэлдэг. Яагаад хүмүүс бид ингэж зовлон эдэлдэг юм бол гэж та бодож үзсэн үү? Хариулт нь маш энгийн. Яагаад гэвэл та гэмтэй учираас л бие сэтгэлээрээ зовлон эдэлж байгаа юм. Магадгүй та ямар гэм. Надад гэм байхгүй гэж хэлж болох юм л даа. Та мянга дахин, тэрнээс их дахин би гэмгүй гэж хэлээд ч та гэмгүй болж чадахгүй. Та гэмтэйгээ хүлээн зөвшөөрөөд мянга дахин өргөл барьц өргөн, ядуу доордост тусаллаа ч гэмээ цайруулж чадахгүй. Харин таны гэм нүглийг ямар ч ул мөргүй, цайруулж чадах нэг л зүйл бий. Тэр бол Есүс Христийн сайн мэдээнд итгэх юм. Өнөөдөр та Есүс гэхээр л гадуурхан, шоолж доромжилдог орчинд амьдарч байж магадгүй. Бас Есүс гэхээр л ядуу доорд, болохгүй хүмүүс очдог газар гэж эндүүрдэг хүмүүсийн дунд ч амьдарч байж болох юм. Хамгийн гол нь та бусдаас хамааралтай биш. Харин өөрөө сонголтоо хийдэг нийгэмд амьдарч байгаагаа санаарай. Үүнийг чухалд тооцон та сайн мэдээг ойлгох гэж, хичээх юм бол Мөнхийн улсын хаалгыг тогшоод орж байгаатай адилхан юм. Библийг судлаад Есүс Христ бол аврагч гэдгийг хүлээн зөвшөөрөөд итгэх юм бол та бие сэтгэлийн бүх зовлонгоосоо чөлөөлөгдөж, шинэ хүнийг өмсөх болно.

Энэ дэлхий дээр хар цагаан, худал үнэн гэсэн хоёр туйл байдаг. Хэрвээ та өнөөдөр Есүс Христэд итгэж, түүний сургаалийн дагуу итгэл үнэмшилтэйгээр амьдрах юм бол цагаан замаар явж, үнэний мэдлэгээр өсөх болно. Харин худлын мөрийг мөшгиж, хар зам татуулах юм бол та үлдээсэн амьдралдаа харамсаж, төгсгөл нь үхэл рүү хөтөлдөг замаар явах болно. Өнөөдөр бүх зүйлээ таны өмнө тодорхой байдаг. Хэрвээ та лууван тарих юм намар луувангаа л хураана. Төмс хураана гэж мөрөөдөөд ч хэрэггүй. Яг үүний адилаар та худал хуурмаг, үнэ цэнэгүй итгэл үнэмшилээр амьдрачихаад төгсгөлд сайнд хүрнэ гэж бодож байгаа бол эндүүрэл. Та юу тарина. Түүнийгээ л хураах болно гэж  Библид яг энэ тухай маш тодорхой хэлсэн байна. Амьдрал бол баллуур ашиглахгүйгээр зурж сурах урлаг юм гэж нэг алдартан хэлсэн байдаг. Тэгэхээр та магадгүй яг одоо өнгөрүүлсэн амьдралаа баллуурдмаар санагдаж байж ч болох юм. Эсвэл үлдээсэн мөрөөрөө бахархаж байж ч болно. Аль нь байсан, би танд нэг замыг санал болгож байна. Та Есүс Христэд итгэснээр хэзээ ч харамсахгүй. Хэзээ ч баллуурдахгүй мөрийг үлдээх болно. Учир нь Есүс Христ өөрөө таны өмнөөс бүх гэм нүгэл, бүх буруутгамаар зүйлийг чинь загалмай дээр өөрийнхөө амиар баллуурдсан юм.

Өнөөдрийн хичээлээр Колоссай номын 1:15-18-р хэсгийг судлах болно. Паул бол Есүс Христийн сайн мэдээний төлөө өөрийнхөө амьдралын бүх л зүйлийг зарцуулсан. Ингэхдээ тэрээр өөрийнх нь эрх чөлөөг хязгаарлаж, шоронд хоригдсон ч гэсэн, сайн мэдээний төлөө сүмд үйлчилдэг итгэл нэгт ахан дүүсдээ захидалаар дамжуулан урам өгч өөрийн мэдлэгээ хуваалцаж байсан юм. Тэгэхээр энэ цагт амьдарч байгаа Есүст итгэдэг та ч гэсэн үнэний үгийг, Есүс Христийн сайн мэдээг өөрийнхөө чадах хэмжээнд найз нөхөд, хамаатан садан, ах дүүсдээ ярьж өгөх хэрэгтэй. Гэхдээ мэдээж ял болгож биш. Харин үнэгүйгээр авсан тэр ивээлээ бусдад үнэгүйгээр түгээх хэрэгтэй гэсэн утгатай юм шүү.

Өнөөдрийн дугаараар бид Колоссай номын 1:2-14-р ишлэлийг судлах болно. Паул үнэхээр Бурханы чин хүслийг ойлгож, үүнийхээ дагуу Колоссайн итгэгчдэд, улмаар энэ цагийн итгэгч бидэнд түүнийг таних боломжыг нээж өгсөн юм. Бурхан хүн төрөлхтөнийг гэмийн хүлээснээс тайлж, авралын баяр хөөрөөр бялхаахын тулд Хүүгийнхээ цусыг урсгасан. Ингэснээр Хүүд нь итгэсэн хэнийг ч, ямар нүгэлтэнд Бурхан Мөнхийн улсынхаа үүдийг нээж байгаа юм. Хэрвээ та өнөөдөр Есүс Христэд итгэх юм бол та Мөнхийн улсын түлхүүрийг атгах болно.

Өнөөдрийн хичээлээр Колоссай 1:1-2-р ишлэлийг судлах болно. Бурхан өөрийнхөө бүтээсэн төөрөлдсөн хүмүүсийг аврахын тулд Өөрийнхөө Хүү Есүс Христийг энэ дэлхийд илгээж, олон хүмүүст Есүс Христ бол Бурханы Хүү гэдгийг гэрчилэн харуулсан байдаг. Тэдгээр хүмүүсийн нэг бол Элч Паул юм. Элч Паул эхэндээ Есүс Христийг эсэргүүцдэг байсан. Гэсэн ч Есүс Христийг үнэхээр Бурханы хүү гэдгийг мэдсэн цагаасаа хойш нийгэм дэхь өөрийн эрх мэдэл, нэр алдар, тэр бүү хэл бүх насаараа ганцаараа амьдрах шийдвэрийг гаргаж, амьдралынхаа хором мөч бүрийг Христийн сайн мэдээний төлөө өргөсөн. Үүний бас нэг тод жишээ бол Библийн Шинэ Гэрээний Колоссай ном юм. Бурхан хүмүүсийг аврана гэдэг нь энэ дэлхий дээр ч, энэ дэлхийгээс хальсан хойно ч үйлчилэх хамгийн том үнэгүй бэлэг. Энэ дэлхий дээр юунаас аврах вэ? гэвэл. Гэм нүгэл, худал муурмаг байдал, садар самуун, донтолт зэрэг нийгэмд хүмүүсийн өртдөг муу муухай бүхнээс аврах болно. Энэ дэлхийгээс насан өөд болж одоход юунаас аврах вэ? гэвэл. Мөнхийн галтай тамаас таныг сүнсийг аврах болно. Та Есүс Христэд итгэж, Есүс Христийг Бурханы Хүү гэдгийг хүлээн зөвшөөрч, түүний сургаалын дагуу амьдрахад л та энэ авралыг авах юм шүү.

Таны талаар сайн мэдээ, магадгүй өргөмжилсөн мэдээ улс гүрэн даяар тарвал баярлах бол хэд хоног, Харин нэрээ хичээх бол насан туршийнх болох байх. Эзэн хааны эхний зарлигаар хаа сайгүй Израйлчуудыг устгаж, тонон дээрэмдэхээр бэлдэж байсан Персийн харъяаны 126 аймаг хааны хоёрдох зарлигийн дараа Израйлчуудад үргэлж сайнаар хандаж байсан мэт харагдахыг хичээж эхэлсэн. Амжилттай байх үед магтах урамшуулах хамрах хүмүүс зөндөө л байдаг. Харин зовлонтой байхад танд байгаа эцсийн чинь зүйлийг ч гэсэн авахыг хүссэн хүмүүс байдаг. Тиймээс Бурханы тууштай хайр, нигүүслийг магтъя.