Бурханы бидэнд өгсөн хамгийн агуу хууль бол Түүнийг болон бие биенээ хайрлах юм. Хайр дотор амьдарч байгаа хүн хэзээ ч хэн нэгнийх хохироох зүйл хийхгүй. Тиймээс амьдралын маань өдөр тутмын шийдвэр бүх зүйлс дээр Бурханы хайр биднийг зөв замд хөтлөх удирдамж болж чадна. “Учир нь Хууль бүхэлдээ нэг үгэнд л багтдаг юм. Энэ нь "Чи хөршөө өөрийн адил хайрла" гэсэн нь мөн.” (Галат 5:14)

Эзэн бидэнд болох болохгүй зүйлсийн хууль дүрмийг биш, харин зүрх сэтгэл, мөс чанарынхаа дагуу бусдыг хүндэтгэн үзэж, зөвийг сонгох эрх чөлөөг өгчээ. Энэ бол итгэгч хүний амьдралд байдаг гайхамшигтай эрх чөлөө. Та үүнийгээ буруугаар ашиглавал Бурханаас холддог. Харин зөвөөр ашиглавал Бурханы хайр, гэрлийг тусгаж чадна. “Эзэн бол Сүнс мөн. Эзэний Сүнс хаана байна, тэнд эрх чөлөө байдаг.” (2 Коринт 3:17)

Бурхан биднийг аврахдаа маш их эрх чөлөөг өгсөн. Гэвч Түүний энэ бэлгийг бид зөвөөр ашиглах ёстой. Бидний үйлдлүүд хэн нэгнийг унагах шалтаг болох ёсгүй. Харин хийж байгаа зүйл бүр маань хайр дотор, итгэл дотор хийгдэх ёстой. “Ийнхүү ах дүүсийнхээ эсрэг нүгэл хийж, тэдний мөхөс мөс чанарыг шархлуулснаараа чи Христийн эсрэг нүгэл хийж байгаа юм.” (1 Коринт 8:12)

Бид бусармаг явдал, завхрал улам ихсэж байгаа төгсгөлийн үед амьдарч байгаа. Энэ үед Бурханы үгийг түгээж, Түүнд бүхнээ зориулах нь юу юунаас ч илүү чухал. “Харин эхлээд Түүний хаанчлал болон Түүний зөвт байдлыг хайгтун. Тэгвэл энэ бүхнийг та нарт нэмж өгөх болно.” (Матай 6:33)

Бид засаг төрийг Бурхан тогтоодог тухай үзсэн. Тэд сайн муу удирдаж байх нь хамаагүй бид тэдгээрт захирагдах үүрэгтэй. Тэд алдаа гаргасан ч бүхнийг Бурхан өөрийн гарт барьдаг. Тиймээс бид Бурханд итгэж найдан, тус бүрийнхээ үүргийг гүйцэтгэж, улс орныхоо төлөө тасралтгүй залбирах хэрэгтэй. “Хаадын төлөө, дээгүүр тушаалтай бүх хүний төлөө залбир. Тэгвэл бид сүсэглэл ба хүндлэлтэйгээр амар тайван, төвшин амьдралаар амьдрах болно” (1 Тимот 2:2)

Эзэн биднийг итгэл дотор ахан дүүс нар, Түүний гэр бүл болгосон тухай бид үзсэн. Тэр Ариун Сүнсээрээ дамжуулан бидэнд хайрыг өгдөг. Түүний хайр дотор амьдрах нь бидний амьдралын хамгийн эрхэм зорилго мөн. “Хайртууд минь, бие биеэ хайрлацгаая. Учир нь хайр бол Бурханаас ирдэг. Хайрладаг хүн бүр Бурханаас төрсөн бөгөөд Бурханыг мэддэг юм.” (1 Иохан 4:7)

Хүний амьдралдаа хийж болох хамгийн гайхамшигтай шийдвэрийн нэг бол Бурханд өөрийнхөө амьдралыг өргөх юм. Түүний гарт байгаа амьдрал хэзээ ч хохирохгүй. “Бүх зүрхээрээ ЭЗЭНд итгэ.

Бурхан харь үндэстэн Монголчууд биднийг Абрахамын үр удам болгон, Өөрийн гайхамшигт гэр бүлд хүлээн авсан. Тэр биднийг Өөрийн хүүхдүүдийг болгож, бүх сүнслэг ерөөлөөр ерөөсөн. Бурханы хүүхэд байна гэдэг хамгийн эрхэм завшаан мөн. “Тэр Өөрийн хүслийн сайн тааллын дагуу, биднийг Есүс Христээр Өөрийнхөө хөвгүүд болгон үрчлэн авахаар урьдаас тогтоожээ.” (Ефес 1:5)

Есүс дэлхийд гэрэл болон ирсэн. Түүнийг хүлээн авсан хүн бүрийн амьдралд Тэр гэрлээ тусгадаг. Харин Түүнийг хүлээж аваагүй цагт бидний нүд сохор байдаг. “Би бол Зам, Үнэн ба Амь мөн” гэж Есүс хэлсэн. (Иохан 14:6)

Бурхан биднийг үргэлж хүлээж авахад бэлэн байдаг. Тэр өдөр бүр таныг Өөр лүүгээ дуудаж байна. Харин Бурханд хариу өгөх эсэх нь бидний сонголт юм. Бурхан таны өмнө мөнхийн амь ба мөнх Түүнээс тусгаарлагдаж, харанхуйд байх сонголтыг өгчээ. Та өнөөдөр Бурханд хариу өгч, Түүний Хүү Есүс Христийг амьдралдаа оруулаарай.