Бурхан бол биднийг урладаг ваарчин. Бид Түүний гарт байгаа шавран савнууд юм. Ваарчин биднийг Христтэй адил зан чанартай болгон, хэлбэржүүлж байгаа. Энэ үе заримдаа маш хэцүү санагдах ч, та тэвчээртэй байх хэрэгтэй. “Та нарын дотор сайн үйлийг эхлүүлсэн Тэрээр үүнийгээ Христ Есүсийн өдрийг хүртэл төгс төгөлдөр болгоно гэдэгт би бат итгэж байна.” (Филиппой 1:6)

Өнгөрсөн дугаарт бид Бурханы зорилго, амлалтууд ямар ч үед биелдэг тухай ярьсан. Та өнөөдөр алдаа гаргаж, гэмд унасан байсан ч Бурханы таны амьдралд зориулсан зорилго биелэх болно. “Учир нь та нарт зориулж байгаа төлөвлөгөөнүүдийг Би мэдэх бөгөөд тэдгээр нь та нарт ирээдүй ба найдварыг өгөхийн тулд гай гамшгийн бус, сайн сайхны төлөөх төлөвлөгөөнүүд юм" гэж ЭЗЭН тунхаглаж байна.” (Иеремиа 29:11)

Бид Ром номоор дамжуулан Бурхан дотор шинэ мөн чанараар өсч, жинхэнэ итгэлийн амьдралаар амьдрах тухай суралцаж байна. Бид Христэд итгэсэн тэр мөчөөс хойш Бурханы Хүү бидний дотор орших болсон. Энэ бол агуу гайхамшиг. “...энэхүү нууцын алдрын баялаг ... нь та нарын дотор байгаа алдрын найдвар болох Христ мөн.” (Колоссай 1:27)

Ром номноос бид Бурханы бидэнд илгээсэн гайхамшигт Туслагч Ариун Сүнсний тухай суралцаж байна. Ариун Сүнс бидний сул дорой бие махбод дотор оршихдоо бидэнд зөв амьдрах хүчийг өгдөг. Бид өдөр бүр Түүнийг эрэн хайж, Түүгээр дүүрэх ёстой.

Бурхан биднийг өөрийн хүүхдүүд болгосон. Түүний хүүхэд бүрт Ариун Сүнс байдаг. Ариун Сүнс биднийг хэзээ ч орхидоггүй гайхамшигтай Туслагч юм. Тэр бидэнд тайтгарал хэрэгтэй үед тайтгарлыг өгч, буруу зүйл хийхэд маань залруулж, зөв зам руу хөтөлдөг. Ариун Сүнс таны дотор байна гэдэг таны дотор Бурхан өөрөө оршиж байна гэсэн үг. Энэ бол хамгийн агуу гайхамшиг. “Би Эцэгээсээ гуйхад, Тэр та нарт өөр Туслагчийг өгнө. Тэр нь та нартай үүрд хамт байна” (Иохан 14:16).

Бидний төрөлх чанарт сайн зүйл үгүй боловч Бурхан бидэнд үүнийг ялан дийлэх агуу туслагч, Ариун Сүнсийг өгсөн. Ариун Сүнс өнөөдөр та биднийг хүлээж байгаа. Тэр маш зөөлөн дөлгөөн бөгөөд таны гуйлтанд хариулах болно. “Харин Туслагч буюу Миний нэрээр Эцэгийн минь илгээх Ариун Сүнс та нарт бүх зүйлийг заах бөгөөд Миний та нарт хэлсэн бүгдийг сануулах болно.” (Иохан 14:26)

Бид Библийн хамгийн агуу номнуудын нэг болох Ром номоор аяллаа үргэлжлүүлж байна. Энэ ном бидэнд аврал ба бидний гэмт чанар, Бурхан доторх шинэ мөн чанарын тухай маш чухал үнэнүүдийг харуулж байгаа. Элч Паул хүртэл өөрийгөө мөхөс дорой, хөөрхийлөлтэй хүн гэж дуудаж байсан. Харин бид Бурхантай холбоотой байснаар хуучин мөн чанараа, гэмийг ялан дийлж чадна. “Надад хүч өгөгч Түүгээр би бүгдийг хийж чадна.” (Филиппой 4:13)

Итгэгч та амьд Христтэй холбогдож, таны бүх гэм нүглүүд уучлагдаж, танд Бурханыг дагах шинэ зүрх сэтгэл бий болсон тухай бид ярьсан. Бид Христэд итгэснээр ямар нэг хуулийг дагах биш, харин Бурханыг хайрлах хайраар амьдрах болсон. Есүс, “Хэрэв та нар Намайг хайрладаг бол, Миний тушаалуудыг сахь” (Иохан 14:15) гэж хэлсэн.

Бид өнгөрсөн дугаарт хуучин мөн чанар үргэлж биднийг Бурханы эсрэг, үхэл рүү түлхэж байдаг тухай үзсэн. Харин Христ доторх шинэ мөн чанар маань бидэнд Бурханд дуулгавартай алхаж, мөнхийн амьд хүрэхэд тусалдаг. Тиймээс бид өдөр бүр Бурхантай нөхөрлөж, Түүнтэй хамт алхах нь чухал юм. “Би бол тэнгэрээс бууж ирсэн амьд талх байна. Хэрэв хэн нэгэн энэ талхнаас идвэл, тэр мөнхөд амьдарна.” (Иохан 6:51)

Бид Христтэй хамт нас барж, Түүнтэй хамт дахин амилсан. Тиймээс Бурхан биднийг гэм нүгэлд үхэж, Түүний дотор шинэ амьдралаар амьдрахад дуусан юм. “Учир нь Түүний үхсэн үхлийн хувьд, Тэр нэг удаа нүгэлд үхсэн бөгөөд харин Түүний амьдардаг амьдралын хувьд, Тэр Бурханд амьдардаг.” (Ром 6:10)