Бид Бурханы үг улам илүүгээр түгэн тархахын төлөө тууштайгаар залбирдаг байх ёстой. Бас Бурханы үгийг заадаг, Бурханы хүмүүсийг хоньчилдог хүмүүсийн төлөө үргэлж залбиран гуйдаг байх хэрэгтэй. Бидний итгэдэг Бурхан бол итгэмжит бөгөөд бидэнд хүчийг өгч, биднийг Өөрийнхөө үгээр дамжуулан батжуулдаг. Итгэгч бид Бурханы хайр дотор амьдрах ёстой. Бас Христийн тэвчээр дотор алхах ёстой. Бид залхуу хойрго, ёс бус хүмүүсээс хол байж, Есүсийг даган дуурайж амьдрах учиртай.

Хожим нь Антихрист илчлэгдэн Бурханы үнэнд итгээгүй, Бурханы үнэнээс татгалзсан тэр бүх хүмүүсийг худал хуурмагтаа итгүүлэн хуурч мэхлэх болно. Итгэгч бид Бурханы үнэн дотор бат үндэслэгдэхгүйгээр, Бурханы үнэнээс татгалзах юм бол тэр чинээгээрээ өөр бусад худал хуурмагт үүд хаалгаа томоор нээн өгч байдаг. Итгэгч хүмүүс бид элдэв худал сургаалын салхинд хийсэхгүйн тулд Бурханы үгэн дотор бат суурилах учиртай. Эзэн Есүсийг хүлээж амьдарна гэдэг нь зүгээр суухын нэр биш харин ч шаргуу хөдөлмөрлөж, шаргуу үйлчилж, Бурханы үгээс илүү зууран амьдрахын нэр юм. 

Эзэн Есүсийг дахин ирэх үед чуулган бид дээш өргөгдөн Түүнтэй нүүр нүүрээрээ уулзах болно. Харин үүний дараа  “Эзэний өдөр” буюу ёс бусын дээр буух Эзэний шийтгэл ирэх болно. Чуулган дээш өргөгдсөний дараа энэ дэлхий дээр Антихрист илчлэгдэн тэрээр бүх дэлхийг худал хуурмагаар хуурах болно. Харин Есүс Христ тэрхүү Антихристийг устгаж, хорон муу бүхнийг шүүж, Өөрийн төгс хаанчлалыг бий болгох болно. Өнөөдөр ёс бус байдал газар авсаар байна. Нөгөөтээгүүр Ариун Сүнсний хүчээр Бурханы үг ч бас улам илүүгээр тунхаглагдсаар байна. Өнөөдөр хорон муу, ёс бус бүхнийг Ариун Сүнс хязгаарлан барьсаар байна. Харин чуулган дээш өргөгдөх үед Ариун Сүнс цаашид ийнхүү хязгаарлан барихаа болих болно.

Итгэгч хүний амьдралд зовлон бэрхшээл гарцаагүй тулгардаг. Харин бид тэр бүх зовлон бэрхшээлийг итгэлтэйгээр, урам зоригтойгоор даван гарч Бурханыг алдаршуулан амьдрах ёстой. Зовлон бэрхшээл нь бидний итгэлийг улам бүр батжуулж, биднийг Бурхан руу улам илүү ойртуулж байдаг. Хэдийгээр бид итгэлийн амьдралдаа шударга бусаар хэлмэгдэн зовж байж болох ч хожим нь Есүс Христ дахин ирэх үед Тэр биднийг тайвшруулах болно. Мөн хорон муу хүмүүсийг Есүс шударгаар шүүх болно. Тиймээс бид баяр жаргалтай, зовлон шаналалтай ямар ч үед зөвхөн Бурханыг л алдаршуулан амьдрах нь зөв юм. 

Бид Бурханы нигүүлслээр аврагдсан. Энэ нигүүлсэл бидэнд энэ дэлхийн өгч чаддаггүй ер бусын амар тайвныг авчирдаг. Бид Бурханд итгэх итгэл дотор илүү өсч, Бурханыг таньж мэдэх тусам бидний бие биенээ хайрлах хайр улам бүр өсөн нэмэгдэж байдаг. Бидний Бурхан дотор өсч төлөвшиж байгаа байдал бидний бусадтай харилцах харилцаагаар илэрдэг. 

Есүс Христэд итгэж Бурханы хүүхдүүд болсон бидэнд Бурхан 10 хуулиас ч илүү өндөр стандарт бүхий шинэ тушаалуудыг өгсөн. Бид энэ тушаалуудыг өөрийнхөө хүчээр хэрэгжүүлэх боломжгүй. Харин Бурханы Ариун Сүнсний хүч чадлаар бид энэ тушаалуудыг дагаж, Бурханыг алдаршуулан, Бурханыг бусдад гэрчлэн амьдарч чадна. Паулаас Тесалоникийн итгэгчдэд өгсөн эдгээр тушаалуудыг өнөөдөр итгэгчид бид ч бас дагаж мөрдөх учиртай.

#БиблийнХуудсаар #ИтгэлньСонсохоос

Итгэгч бидний хувьд Эзэн Есүсийн ирэх өдрөөс өдөрт ойртсоор байна гэсэн итгэлээр амьдрах нь чухал. Энэ итгэл бидний амьдралд өөрчлөлтийг авчирдаг. Бид итгэлийн амьдралдаа илүү сэргэг, илүү эрүүл саруул ухаантай байж, Бурханы бидэнд тушаасан тушаалуудыг сахиж амьдрах учиртай. Эзэн Есүсийг хүсэн хүлээж байгаа бидний хувьд Эзэн Есүсийн дахин ирэх тэр үйл явдал шөнөөр ирэх хулгайч мэт байхгүй. Харин чуулган өргөгдөж Эзэнтэй хамт мөнхөд байх баяр хөөрийн цаг байх болно. Харин тэр цагийг ирэх хүртэл бид нэг нэгнээ итгэл дотор зоригжуулан урамшуулж, бие биенээ Бурханы үгээр босгон байгуулдаг хүмүүс байх ёстой.

#БиблийнХуудсаар #ИтгэлньСонсохоос

Есүс Христ сүр жавхлантайгаар дахин ирэх үед Христ Өөрийнхөө чуулганыг Өөртөө авах болно. Есүс Христийг ирэхээс өмнө нас барсан хүмүүс амилж, Есүс Христийг ирэх үед амьд байх тэр хүмүүстэй хамт дээш өргөгдөн Эзэнтэй хамт мөнхөд байх болно. Энэ үнэн бол итгэгч бидний хувьд итгэл найдвар, тайвшрал болох учиртай.

#БиблийнХуудсаар #ИтгэлньСонсохоос

Есүс Христ дахин ирэх үед нас барсан байсан бүх итгэгчид амилах болно. Тэдний амилалт нь бодитой, бие махбодын амилалт байх болно. Тиймээс Христ дотор нас барсан тэр хүмүүстэйгээ бид дахин уулзах ерөөлт найдвар бидэнд бий. Бидний ойр дотны хүн Христэд итгэх итгэл дотроо нас барах үед бид найдвар байхгүй хүмүүс шиг гашуудах биш харин дахин уулзах ерөөлт найдвар дотор урам зоригтой байх учиртай.

#БиблийнХуудсаар #ИтгэлньСонсохоос

Итгэгч бид нар бие биенээ ахан дүүсийн хайраар хайрлах учиртай. Хэдийгээр бид өөр хоорондоо ялгаатай, үзэл бодол өөр байж болох ч бид нэгэн гэр бүл учраас Бурханы дотроос бие биенээ хайрлах ёстой. Энэ л хайраар дамжуулаад бид өөрсдийгөө жинхэнэ итгэгчид мөн болохоо бусдад харуулх боломжтой байдаг. Итгэгч бидний хувьд үл итгэгч хүмүүсийн өмнө ч зөв зохистой, ариун амьдралаар амьдарч, төлөв төвшин байж, бусдын хэрэгт хошуу дүрэх биш харин өөрийнхөө ажлыг шударгаар хийж, хөдөлмөрч, шаргуу амьдралаар амьдрах учиртай.

#БиблийнХуудсаар #ИтгэлньСонсохоос