Биднийг Бурханы үгээр удирдаж, Бурханы үг рүү дагуулж байгаа удирдагчдыг бид дуулгавартай дагах хэрэгтэй. Тэдний итгэлийг бид дуурайх хэрэгтэй. Есүс Христ хүн талаасаа олон хүмүүст таалагдаж байсан ч Түүний сургаал олон хүнд таалагддаг байгаагүй. Харин итгэгчид бид Есүс Христийн сургаалыг судалж, дагаж, амьдралдаа хэрэгжүүлж амьдрах хэрэгтэй. Есүс Христийг улам илүү таньж мэдэхийг эрмэлзэх хэрэгтэй. Яагаад гэвэл Есүс Христ өчигдөр ч, өнөөдөр ч, мөнхөд хэвээрээ байдаг Нэгэн. Бид Есүс Христийн сургаалаас өөр аливаа хачин жигтэй сургаалд анхаарлаа хандуулах шаардлагагүй.

Бид итгэлийн амьдралдаа Бурханы үгийг үл тоохоос сэрэмжилж амьдрах ёстой. Бид итгэлийн амьдралдаа ямар ч үед Есүсээс зуурч, Түүнээс хоргодож, гэм нүгэл үйлдэн бүдрэх үедээ ч хамгийн түрүүнд Есүс дээр ирэн гэмшдэг хүмүүс байх нь чухал. Бид итгэлийн амьдралдаа итгэлийн ахан дүүсээ хайрлаж, тэдэнд үйлчилж, онцгойлоод сул дорой, ганцаардсан, өвдөж зовсон хүмүүст илүү их анхаарал хандуулж, Есүсийн хайраар үйлчилж амьдрах ёстой. 

Итгэгч бид итгэлийн амьдралдаа Есүс Христтэй ойр дотно харилцаатай байх ёстой. Бид хэн нэгэн хүнийг харж, эсвэл нөхцөл байдлыг харж амьдарч эхлэх үедээ Есүсийн нигүүлслээс хоцорч байдаг. Бид итгэлийн амьдралдаа бардам болж өөрсдийнхөө хэрэгцээг Бурханаар хангуулах биш өөрийнхөө хүчээр хангах гэж оролдох үедээ Бурханы нигүүлслээс хоцорч байдаг. Бид итгэлийн амьдрал дахь сүнслэг ивээл ерөөлөө материаллаг түр зуурын зүйлсээр худалддаг хүмүүс байж болохгүй. Бид хэний хүчээр, ямар их ивээл ерөөл рүү дуудагдсанаа санаж итгэлийн амьдралаар урамтай алхах ёстой. 

Бурхан Эцэг маань бидэнд хайртай учраас сахилгажуулдаг. Бурханы Эцэгийн сахилгажуулалт бидний итгэлийн амьдралд маш их ач тустай байдаг учраас бид тэрхүү сахилгажуулалтыг хөнгөн үзэлгүй, харин илүү мэдрэмжтэй, илүү нээлттэй байх хэрэгтэй. Бурханы сахилгажуулалтаар дамжуулан бидний амьдрал илүү ариун, Бурханы мэлмийд илүү тааламжтай болж шинэчлэгддэг. Бид амьдралдаа тохиолдсон зовлон бэрхшээлээс болж гомдоллодог биш харин итгэлээс итгэлд хүчирхэгжин төлөвшсөн тийм итгэгчид байх нь чухал юм.  

Бидний амьдралд хүнд хэцүү асуудал тохиолдох үед бид Эзэн Есүсийг санаж урам зоригтой байх ёстой. Заримдаа Бурхан биднийг хайрласан хайр дотроосоо биднийг сахилгажуулан савааддаг. Бид тэрхүү сахилгажуулалтад мэдрэмжтэй хандаж, тэр зүйлээр дамжуулан Бурхан бидэнд чухам юуг хэлэхийг хүсэж байгааг бид ойлгох хэрэгтэй. Тэгж чадвал бид саад бэрхшээлээс болж бүдэрдэг биш харин түүгээр дамжуулан итгэлээс итгэлд улам бүр өсч төлөвшиж чаддаг хүмүүс болж өөрчлөгдөнө.  

Итгэгч бидний итгэлийн амьдрал бол зүгээр нэг урсаад өнгөрөх амьдрал биш харин бариа тийш чиглэсэн итгэлийн уралдаан юм. Библи дээрх итгэлийн баатрууд бол тэр уралдаанаар амжилттай уралдсан гэрч нар юм. Бид тэр хүмүүсийн амьдралыг харахдаа итгэлийн замдаа илүү урам зоригтой гүйх учиртай. Бидний итгэлийн уралдаанд саад болох хүнд ачаа, биднийг замаас маань гаргадаг гэм нүгэл буюу итгэлгүй байдлыг бид хойш тавьж Эзэнтэй уулзах өдрийг хүртэл итгэлийн замаар тууштай гүйх ёстой. 

Библи дээрх итгэлийн баатруудын дунд Бурханд итгэснээрээ амьдралдаа ялалт байгуулсан хүмүүс олон байдаг. Гэхдээ “зарим хүмүүс” итгэлийнхээ төлөө зовлон эдэлж, итгэлийнхээ төлөө амиа өгсөн. Тэдний амьдралд зарим итгэлийн баатруудынх шиг агуу ялалт байгаагүй. Гэсэн хэдий ч тэд итгэлээрээ амьдарсаар дууссан. Тэр “зарим хүмүүс” ч бас Бурханы өмнө жинхэнэ итгэлийн баатрууд юм. Итгэгчид бид итгэлийн амьдралаа эхлэхээс дуусах хүртэл итгэлээр явсаар дуусах ёстой. Тэгж чадсан хүмүүс бол Бурханы өмнө жинхэнэ итгэлийн баатрууд юм.

Бид Есүс Христэд итгэх итгэлээр аврагдсанчлан бид энэ амьдралыг итгэлээр туулахын тулд дуудагдсан хүмүүс. Бидний итгэл Иосефийн итгэл шиг тууштай, Мосегийн итгэл шиг үйлстэй, Иошуагийн итгэл шиг дуулгавартай, Рахабын итгэл шиг дайчин байх ёстой. Эдгээр хүмүүсийн амьдралд итгэлээр дамжуулан Бурхан гайхамшигтай ажлыг хийсэн шиг Бурхан бидний амьдралд ч бас бидний итгэлээр дамжуулаад агуу гайхамшигтай ажлуудаа хийх болно.  

Абрахамын итгэл бидэнд итгэлийн дуулгавартай байдлын жишээ болдог бол Исаакийн итгэл бидэнд итгэлийн бэлэн байдлын жишээ болдог. Харин Иаковын итгэлийн амьдрал бол итгэгч бидний сул дорой байдлын илэрхийлэл болдог. Бурхан Иаковын амьдралд ажлаа хийж түүнийг хугалж, түүний орхилгүй явсаар итгэлийн хүн болгон төлөвшүүлсэн шиг Бурхан биднийг ч бас хэзээ ч орхилгүйгээр хамт байж, шаардлагатай үед сахилгажуулан саваадуулж, бидний итгэлийг хүчирхэгжүүлсээр байдаг. Бид итгэлийн амьдралдаа ямар ч үед Бурханд итгэж, Бурханаас зуурдаг байх нь чухал. Тийнхүү бид итгэлээр алхаж чаддаг, Бурханы хүслийн дагуух итгэлийн баатрууд болж чадна. 

Бид энэ дэлхий дээр түр амьдрагчид, явуулын хүмүүс юм. Абрахам шиг итгэлээрээ алхагч хүн бүр үүнийг хүлээн зөвшөөрдөг. Бурхан бидэнд илүү дээр мөнхийн гэрийг бэлдсэн. Бид өдөр бүрийн амьдралдаа тэр л мөнхийн амьдралыг итгэлээрээ харж амьдрах учиртай. Жинхэнэ итгэл гэдэг ямагт жинхэнэ хүндлэл мөргөлийг дагуулж байдаг. Абрахамын итгэлийн амьдрал нь өөрөө байгаагаараа Бурханд өргөсөн хүндлэл мөргөл байсан шиг бид ч бас итгэлээрээ амьдрах үед бидний амьдрал Бурханд өргөсөн хүндлэл мөргөл болон хувирдаг.