Хуучин гэрээний үеийн майхан сүм бол өнөөдөр тэнгэрт байгаа жинхэнэ асрын дуураймал, зураглал юм. Тахилч нар тэр асарт үйлчилж байсан шиг бидний Тэргүүн тахилч болсон Есүс Христ ч бас яг одоо ч бидний төлөө тэнгэрт үйлчилсээр байна. Есүс Христ бидний төлөө амиа өгч, үхлээс амилж, тэнгэрт одож, бидний төлөө Тэргүүн тахилчийн үйлчлэлийг хийж байгаа учраас бид ямар ч үед нээлттэйгээр Бурханы өмнө очиж гуйлт залбирлаа өргөж, Бурхантай нөхөрлөх боломжтой болсон. Бид Есүс Христийг итгэлийн амьдралдаа хэдий бодитойгоор харж, Түүнийг дагаж чадна бидний амьдрал төдий чинээгээрээ бурханлаг, зөвт амьдрал болон өөрчлөгдөх болно.

Хуучин гэрээний үеийн тахилч нарын үйлчлэлд тэдний үхэл саад болдог байсан. Бас тэд гэм нүгэлтэй хүмүүс учраас өөрсдийнхөө төлөө тахил өргөдөг байсан. Тэгвэл эсрэгээрээ Есүс Христ бол үхэшгүй мөнх Нэгэн. Тиймээс Түүний тахилчлалын үйлчлэлд саад болох зүйл нэг ч үгүй. Мөн Тэр бол төгс, ариун, гэмгүй, бузартаагүй, нүгэлтнүүдээс тусгаарлагдсан Нэгэн. Хэдий тийм боловч Тэр хүн болж бидний дунд амьдарч байсан учраас сул дорой бидэнд хэрхэн туслахаа хамгийн сайн мэддэг. Бид энэ агуу Тахилчийнхаа өмнө өдөр бүр ирж, гуйлт залбирлаа өргөж, Бурхантай илүү ойр дотно нөхөрлөж амьдрах ёстой. 

Есүс Христ бол Мелхизедекийн хэргэмийн дагуу Тэргүүн тахилч. Абрахам Мелхизедекийг өөрөөсөө агуу хэмээн хүлээн зөвшөөрч өргөл өргөсөнчлөн Мелхизедкийн хэргэмийн дагуух Тэргүүн тахилч Есүс Христ нь Левигийн удмын ямар ч тахилчаас илүү агуу юм. Бидний тэнгэрт байгаа Тэргүүн тахилч болсон Есүс Христ одоо ч бидний төлөө завгүй үйлчилсээр байгааг бид мартаж болохгүй. Түүний үйлчлэл мөнхийн бөгөөд зөвхөн Түүгээр дамжуулан бид Эцэг Бурханд ойртон очих боломжтой. 

Бидний тэнгэрт байгаа Тэргүүн тахилч Есүс Христ бол Аароны хэргэмийн дагуу биш харин Мелхизедекийн хэргэмийн дагуух агуу Тэргүүн тахилч юм. Тиймээс ч Түүний тахилчлалын үйлчлэл Түүнийг дэлхий дээр байхад нь биш харин тэнгэрт одсоных нь дараа эхэлсэн. Тэр одоо ч бидний төлөө зуучлан залбирч, биднийг Бурхан Эцэгтэй холбож тахилчлалын үйлчлэлээ хийсээр байна. Бидэнд Хуучин гэрээний үеийн Аароны хэргэмийн дагуух тахилч нараас ч илүү агуу Тахилч байгаа учраас бид итгэлийн амьдралдаа урам зоригтой байж өдөр бүр Бурхан Эцэгийнхээ өмнө зоригтой, итгэлтэйгээр очдог байх учиртай.   

Итгэгч бид итгэлийн амьдралдаа хойрго, хичээл зүтгэлгүй байж гэм нүгэлтэй эвлэрч, гэм нүгэлтэй нөхөрлөж амьдрах юм бол бид мөнхийн авралаа алдахгүй ч мөнхийн шагналаа алдах болно. Тиймээс бид эцсээ хүртэл тууштай, хичээл зүтгэлтэй байх учиртай. Бидний урд гүйгч Есүс Христийг даган дуурайж, Бурханд дуулгавартай амьдрах ёстой. Өөрт нь итгэж, Өөрийнх нь үгэн дотор алхагч хүмүүст хандсан Бурханы агуу бөгөөд мөнхийн амлалтууд бий гэдгийг бид үргэлж санаж амьдрах хэрэгтэй.   

Итгэгч бид нэг дороо эргэлдсэн балчир итгэгчид биш харин урагш ахисан төлөвшсөн итгэгчид байх ёстой. Эс тэгвэл бид итгэлээсээ унаж, итгэлийн амьдралдаа үр жимсгүй болох аюул нүүрлэх боломжтой гэдгийг Библи сануулж байна. Бидний итгэлийн амьдрал үр жимсгүй байж, бид үл итгэгч хүн шиг гэм нүгэлтэйгээ эвлэрч амьдрах юм бол бид мөнхийн авралаа алдахгүй ч тэнгэрт буй мөнхийн шагналаа алдах болно. Бид энэ амьдралаа Бурханы өмнө тайлагнах тэр цаг гарцаагүй бий. Тэр цагт бид мөнхийн шаналлаа алдах юм бол гэмших орон зай бидэнд байхгүй байх болно.  

Есүс Христ бидний төлөө зовлон эдлэхдээ Бурхан Эцэгтээ дуулгавартай байсан. Тэрээр бидний төлөө Өөрийгөө төгс тахил болгон өргөсөн. Тэр тэнгэрт одож бидний төлөөх төгс Тэргүүн тахилч болсон. Түүний тахилчийн хэргэм нь эхлэл төгсгөлтэй энэ дэлхийн хэргэмийн дагуу биш харин эхлэлгүй төгсгөлгүй мөнхийн тахилчийн хэргэм юм. Бид энэ бүхнийг ойлгож, амьдралдаа хэрэгжүүлж, Есүстэй хамт алхаж итгэлээр төлөвшихгүй бо балчир итгэлтэй итгэгчид байсаар байх болно. Ийм балчир итгэлтэй итгэгчид Бурханы гүн юмсыг ойлгоход балчирддаг. Сүнслэг зүйлст тэдний чих нь хатуу байдаг.

Тахилч хүн бол хүмүүсийн өмнөөс Бурханы өмнө зогсч хүмүүсийг Бурхантай зуучилдаг хүмүүсийн дундаас сонгогдсон хүн юм. Есүс Өөрөө 100 хувь хүн байсан учраас хүмүүс биднийг төлөөлөх Тэргүүн тахилч байх боломжтой байсан. Гэхдээ Тэр Леви овгийн буюу Аароны хэргэмийн дагуу биш харин Мелхизедекийн хэргэмийн дагуу мөнхийн Тэргүүн тахилч юм. Бидний төлөөх Түүний үйлчлэл бол мөнхийнх бөгөөд Түүний үйлчлэлд үхэл саад хийж чадахгүй. Бид тэнгэрт буй агуу Тэргүүн Тахилч Есүс Христээр дамжуулан Бурхан Эцэгийн өмнө хэзээ ч очих боломжтой болсон.

Есүс Христ бол бидний Тэргүүн Тахилч бөгөөд одоо ч тэнгэрт Бурхан болон бидний хооронд зуучлагчийн үйлчлэлийг гүйцэтгэсээр байгаа. Есүс Христ энэ дэлхий дээр байхдаа бидэнтэй адил бүх талаараа   соригдсон учраас бидний бүх сул дорой байдлыг ойлгодог. Тийм учраас бид урам   зоригтойгоор мөн эрх чөлөөтэйгөөр Бурханы өмнө очих боломжтой болсон. Бид Бурханы өмнө ирэхдээ гадаад байдлаасаа илүүгээр зүрх сэтгэлээ анхаарч, зүрх сэтгэлээ   Түүний өмнө нээж чаддаг байх нь чухал юм.

Бид Бурханд итгэж, Түүний үгэнд итгэж амьдрах үед бидний итгэлийн амьдрал Канаан мэт үржил шимтэй байдаг. Харин бид үл итгэлийн замаар алхах үед бид Израильчууд шиг эргээд цөлийн замаар алхаж эхэлдэг. Бурханы үг бол хүчтэй, бидний амьдралд хамгийн гайхамшигтайгаар нөлөөлж чаддаг. Бид Бурханы үгтэй ойр байж, Бурханы үгтэй нөхөрлөх үед бидний амьдрал Бурханы хүслийн дагуу өөрчлөгдөж байдаг.