Итгэгчид бид итгэлийн амьдралдаа сонор сэрэмжтэй байж, Бурханы үгийг үл тоох вий, Бурханы үгэнд итгэлгүй хандах вий хэмээн эмээн сэрэмжилж амьдрах учиртай. Учир нь итгэлгүй байдал нь бидний амьдралд амласан Бурханы ивээл ерөөл, амралтыг хүлээж авахад бидэнд саад болж эргээд бидний амьдралыг цөлийн амьдрал мэт үр жимсгүй, хуурай болгож орхидог.

Итгэгчид бид өөрсдийгөө итгэлгүй зүрхтэй хүмүүс болох вий хэмээн болгоомжилж амьдрах учиртай. Итгэлгүй байдлаасаа болоод Канаан газарт орох боломжийг алдсан Израильчуудаас сургамж авч итгэлийн амьдралдаа бат итгэлтэй байж үр жимсээр дүүрэн амьдрахыг хичээх хэрэгтэй. Итгэлгүй байдал нь зүсэн бүрийн гэм нүглийн үүд хаалгыг бидний амьдралд нээж өгдөг учраас бид энэ зүйлээс дээд зэргээр болгоомжлох ёстой.

Израильчууд хэдийгээр Египетийн боолчлолоос чөлөөлөгдсөн боловч тэдэнд Амлагдсан газар луу орох итгэл байгаагүй. Тиймээс тэд бүтэн үеэрээ цөлд амьдарсан. Үүний нэгэн адил итгэгч бид Христэд итгэх итгэлээр авралыг авсан ч итгэлгүй байдлаасаа болоод итгэлийн амьдралдаа амар тайван, ивээл ерөөлөөр дүүрэн амьдарч чаддаггүй. Үл итгэл бол итгэгч бидний хувьд хамгийн аюултай дайсан юм.

Бидний төлөө Бурханаас ирсэн Элч, мөн бидний төлөө Бурханы өмнө биднийг төлөөлөн зогсогч Тэрүүн Тахилч болсон Есүс Христийг бид итгэлийн амьдралдаа үргэлж ширтэн харж, Түүний тухай тунгаан бодож, Түүнийг бахархан дуурайж амьдрах нь итгэгч бидний хувьд маш чухал. Бас бид Мосе шиг Эзэн Есүс шиг Эзэнээс бидэнд хариуцуулсан бүхэнд итгэмжтэй байдаг Бурханы сайн зарц нар байхыг эрмэлзэх хэрэгтэй.

Есүс Христ хүн болон дэлхийд ирэхдээ Бурханыг хүмүүст төлөөлж байсанчлан Тэрээр тэнгэрт одохдоо хүмүүс бидний төлөө зуучлах Тэргүүн Тахилч болон одсон. Тэрээр хүн байхдаа бидний адил бүх талаараа соригдож, зовж байсан учраас бидний зовлонг ойлгодог. Ойлгоод зогсохгүй бидэнд хэрхэн туслахаа мэддэг, бидэнд хамгийн сайнаар тусалж чаддаг. Тиймээс бид амьдралынхаа аливаа асуудлууд дунд хамгийн түрүүнд бидний Тэргүүн Тахилч болсон Эзэн Есүс рүү ханддаг байх хэрэгтэй.

Есүс Христ хүн болж дэлхийд ирснээрээ биднийг Өөрийнхөө ах дүүс болгосон. Тэр сул дорой биднийг ахан дүүс гэж дуудахаасаа ичээгүй. Бид Есүс Христэд итгэх итгэлээр Бурханы гэр бүлийн гишүүд болсон. Бүх насаараа нүглийн боочлолын хүлээсэнд амьдарч байсан биднийг Есүс Христ чөлөөлсөн. Тиймээс бид үргэлж Бурханд талархаж амьдрах учиртай.

Бурхан ирэх ертөнцийг буюу дэлхий дээр байгуулах Өөрийн   хаанчлалаа тэнгэрэлч нараар захируулахгүй харин Есүс Христээр захируулах   болно. Учир нь Есүс Христ тэнгэрэлч нараас ч агуу Нэгэн юм. Хэдий Есүс Христ   тэнгэрэлч нараас ч агуу Нэгэн боловч тэнгэрэлчээс дор хүн болж дэлхийд ирсэн   нь бидний авралын төлөө байсан. Тэрээр зовлон дотор бидний авралыг төгс   гүйцэлдүүлсэн учраас бидэнд Түүний өгсөн аврал дээр нэмэх эсвэл хасах зүйл   байхгүй.

Есүс Христ бол Бүтээгч бөгөөд тэнгэрэлч нараас ч илүү Агуу Нэгэн мөн. Тэр бол 100 хувь Бурхан бөгөөд мөн 100 хувь хүн мөн. Бидний агуу Бурхан болсон Есүс Христийн үгэнд бид хайхрамжгүй хандаж, "гулсаж өнгөрөх''-гүйн тулд бид сонор сэрэмжтэй байх учиртай. Цорын ганц авралын зам болсон Есүс Христээс татгалзсан хүнд авралын өөр зам олдохгүй.

Тэр тэнгэрэлч нараас илүү эрхэм нэрийг өвлөсөн шигээ тэднээс илүү эрхэм дээд нь болсон юм. (Еврей 1:4)

Үнэхээр Есүс Христ бол тэнгэрэлч нараас ч илүү агуу Нэгэн мөн. Хуучин гэрээн дээрээс харах юм бол Израильчуудад хандсан Бурханы ажлуудыг тэнгэрэлч нар гүйцэтгэдэг байсныг бид харж чадна. Хууль ч тэнгэрэлч нарын тусламжтайгаар өгөгдсөн. Хуучин гэрээн дээрээс бид Херубууд, серафимууд гээд олон янзын тэнгэрлэг биетүүдийг харж чадна. Гэхдээ тэнгэрэлч нарын энэ мэт үйлчлэлүүд нь одоогийн чуулгантай холбоогүй юм.

Өнгөрсөн хичээлээрээ бид Еврей номын 1:1-г үзсэн бол өнөөдөр бид хамтдаа Еврей номын 2-3-р эшлэлийг дэлгэрэнгүй үзэх болно.

эдгээр эцсийн өдрүүдэд бүхний өвлөгчөөр томилсон, ертөнцийг бүтээсэн Хүүгийнхээ дотор бидэнд хандаж хэлэв. (Еврей 1:2)

Бурхан өмнө нь эш үзүүлэгчдээр дамжуулан хүмүүстэй ярьж байсан бол эцэст нь “Хүүгийнхээ дотор” бидэнтэй ярилцсан. Бурхан Өөрийн Хүү болох Есүс Христээр дамжуулан бидэнтэй ярилцсан. Хэрвээ өнөөдөр ч тэнгэр нээгдэн Бурхан бидэнд үгээ айлдлаа гэж бодоход Бурхан Есүс Христийн бидэнд хэлсэн тэр л үгсийг хэлэх байсан. Яагаад гэвэл Есүс Христ бол энэ дэлхийд хандсан Бурханы сүүлчийн үг байсан.