Ямар ч хүн итгэлгүйгээр Бурханд таалагдах боломжгүй. Тиймээс итгэгчид бид итгэлийн амьдралдаа Бурханд ямагт итгэж амьдрах нь зүйтэй. Өөрт нь итгэж, итгэлийн замаар тууштай явагчдыг Бурхан Өөрөө шагнадаг гэдгийг бид мартаж болохгүй. Нэгэн цагт Ноа итгэлээ гэр бүлийнхэндээ харуулж, гэр бүлийнхээ сүйрлээс аварсан шиг бид ч бас итгэлийн амьдралаа илүү гэрчлэлтэй байлгаж гэр бүлийнхэн хайртай дотны хүмүүсээ Бурханы аврал дээр авчрах нь чухал юм шүү.  

Өнөөдөр бид хамтдаа итгэлийн бүлэг гэгддэг Еврей номын 11-р бүлгийг үргэлжлүүлэн үзэх болно. Дараагийн эшлэлүүд дээрээс бид Хуучин гэрээний итгэлийн баатруудын итгэлийг жишээ болгон авч үзэх болно. Тэдгээр хүмүүсийн амьдралд итгэл хэрхэн хүчтэйгээр нөлөөлж байсныг хамтдаа харах болно. Тэдгээр хүмүүсийн амьдралаас бид итгэлийн үлгэр жишээг авах болно.

Бидний итгэл хий хоосон найдвар биш, аз туршсан алхам ч биш харин Бурханы үг хэмээх бодит баримт дээр тулгуурласан итгэл юм. Бид Бурханд итгэж итгэлийн алхам хийхдээ мухар сохроор биш харин Бурханы үгийг мэдэх мэдлэгт тулгуурлан алхах ёстой. Бид Бурханд итгэдэг нь Бурхан бол ертөнцийг бүтээсэн Бүтээгч гэж итгэж байгаагийн илрэл юм. Тэр Бүтээгч Бурхан бидэнтэй хамт байхад бид ямар ч үед урам зоригоор дүүрэн байж чадна.  

Итгэгчид бид Бурханы үнэнийг хүлээж авсан хэрнээ гэм нүглээ үргэлжлүүлэн үйлдсээр байвал Бурханы шийтгэлийг, саваадалтыг хүлээж авах болно. Хуучин гэрээний үед Мосегийн хуулийг зөрчигсдийг хатуу шийтгэдэг байсан шиг бид ч бас мэдсээр байж Бурханы үгийг санаатайгаар зөрчин амьдрах юм бол бид авралаа алдахгүй ч Бурханаас хатуу шийтгэлийг авах болно. Тиймээс бид сүйрэл шийтгэл рүү ухардаг биш Бурханы мөнх шагнал руу итгэлээрээ урагшилдаг итгэгчид болох нь чухал юм. 

Бидний төлөө Есүс Христийн өргөсөн тахил төгс тахилын улмаас урьд нь бидний хувьд шүүлтийн сэнтий байсан Бурханы сэнтий одоо нигүүлслийн сэнтий болон хувирсан. Тийм учраас бид ямар ч үед Бурханы  өмнө итгэлтэйгээр, урам зоригтойгоор очиж Түүнд гуйлт залбирлаа өргөх боломжтой болсон. Эзэний ирэх өдөр өдрөөс өдөрт ойртсоор байгаа учраас итгэгчид бид итгэлийн амьдралдаа бие биенээ зоригжуулан батжуулж, тууштай амьдрах нь чухал юм. 

Хуучин гэрээний үеийн тахилын цус бол гэм нүглийн асуудлыг бүрэн шийдэх биш харин хожим ирэх Есүс Христийн өргөх төгс тахил хүртэл түр халхлах зорилготой байсан. Тэрхүү тахил нь хожим бидний төлөө төгс тахилыг өргөх Есүс Христийг илэрхийлэх зураглал байсан. Харин Есүс Христ энэ дэлхийд ирснээрээ Хуучин гэрээг хүчингүй болгоод Өөрийнхөө цусаар бидэнтэй Шинэ гэрээг байгуулсан. Итгэгчид бид одоо тэрхүү Шинэ гэрээний дор, Есүс Христийн дотор амьдрах учиртай хүмүүс. 

Хуучин гэрээний үеийн тахил нь төгс тахил биш тул дахин дахин өргөх ёстой болдог байсан бол Христийн Өөрийнхөө цусаар өргөсөн тахил нь төгс тахил учраас бидэнд өөр ямар нэгэн золилт шаардлагагүй. Тэргүүн тахилч тахилын цусыг авч ариун газарт ордог шиг Есүс Христ Өөрийн цусыг авч тэнгэрт буй жинхэнэ асарт, Бурхан Эцэгийн өмнө очсон. Тэр одоо ч тэнгэрт бидний төлөө үйлчилсээр буй Агуу Тэргүүн тахилч мөн. Тиймээс бид ямар ч үед Бурханд үйлчлэх, ямар ч үед Бурханы өмнө чөлөөтэй очих боломжтой болсон.  

Хуучин гэрээний үед Израильчуудын өргөдөг байсан тахил нь хожим Есүс Христээр дамжуулан өргөгдөх тэрхүү төгс тахилыг төлөөлж байсан. Есүс Христ бидний төлөө загалмай дээр амиа өгөхдөө Өөрийнхөө биеэр төгс тахилыг нэгэнт өргөж, Өөрийнхөө цусаар бидний өмнө Бурхан Эцэгт хүрэх замыг нээж өгсөн. Түүнд итгэж авралыг авсан бидний хувьд аврал маань бүрэн төгс биелсэн учраас бид авралынхаа төлөө ямар нэгэн зүйлийг нэмж хийх шаардлагагүй. Бас бидний авралыг хэн ч биднээс булааж чадахгүй. Энэ итгэл дотор итгэгчид бид амар тайван, урам зоригтой амьдрах ёстой.  

Хуучин гэрээн дээр Израильчуудад өгөгдсөн ариун асар нь тэнгэрт буй жинхэнэ асрын зураглал байсан бөгөөд тэр асар болон тэр асар дахь зан үйл бүхэн нь Есүс Христийг төлөөлсөн төлөөллүүд байсан. Өнөөдөр Есүс Христ Хуучин гэрээний үед ариун асарт үйлдэгддэг байсан тэр бүх зан үйлүүдийг жинхэнэ ёсоор нь тэнгэрт бидний төлөө үйлдэж, бидний төлөө үргэлж зуучлан залбирсаар байна. Есүс Христээр дамжуулан бид Эцэг Бурхан дээр ямар ч үед очих үүд хаалгатай болсон. Тиймээс бид ямар нэгэн газарт очих гэхээс илүүгээр хаа байгаа газартаа үнэнээр болон сүнсээр хүндлэл мөргөлийг өргөх боломжтой болсон.  

Бурхан бидэнд Есүс Христээр дамжуулан илүү дээр амлалт, илүү дээр гэрээг өгсөн. Анх Израильчуудад өгсөн Хууль нь буруу байгаагүй ч гэм нүгэлтэй хүмүүс бид тэр хуулийг сахиж аврагдах боломжгүй байсан. Бидний гэм нүгэлтэй амьдралаас сайн зүйл гарах боломжгүй байсан. Тийм учраас Бурхан бидэнд Есүс Христийн дотор шинэ гэрээг өгч тэр гэрээний хүрээнд Ариун Сүнсийг бидэнд өгснөөр бидний амьдралаас сайн зүйл гарах, бид итгэлийн амьдралаар Бурхантай хамт амьдрах боломжтой болсон. Бид яг одоо ч бидний төлөө тэнгэрт үйлчилсээр байгаа Есүс Христийг ширтэн харж Түүнээс зууран амьдрах үедээ өөрсдийн хүчээр хэзээ ч хүрэхгүй тэрхүү сүнслэг өндөрлөгт хүрч чадна.