Durant decennis han ils purs da l'India duvrà pesticids e ladim artifizial per augmentar la productivitad. En il fratemp han blers midà idea: Oz ha l'India il pli grond dumber da purs da bio dal mund. Ed en mintga citad da provinza datti oz butias cun products biologics. La strategia principala da la politica d'agricultura indica era durant onns da garantir, a tut pretsch, il nutriment da la gronda populaziun. Il onns 1990 èn alura ils effects secundars da ladim artifizial e pesticids vegnids pli e pli evidents: contaminaziun dad umans e natira. Oz promova schizunt il primminister Narendra Modi l'agricultura biologica – quai sco part da sia politica naziunal-conservativa.

En citads sco en la metropola da computers Bangalore, datti veritabels supermartgads cun products da bio. Adina dapli persunas cumpran mangiativas biologicas e tschertgan in stil da vita pli saun. E regiuns che valevan sco retardadas, malgrà ch'ellas na duvravan betg ladim artifizial, vesan oz lur natira intacta sco grond avantatg sin in martgà agricul naziunal.

Il pitschen stadi da Sikkim en il nord ha perfin persvas tut il manaschis da producir a moda biologica. Il problem resta dentant il transport, en in pajais da la dimensiun sco l'India cun savens nauschas vias, è la dumonda centrala svens: co ch'ils fritgs biologics vegnan dal pur enfin tar il consument.

Christina Caprez è stada pliras emnas cun il microfon en gir per l'India.