Lavur datti, i vegn bajegià e renovà e la lavur na manca betg. Dentant, chattar mastergnantas e mastergnants qualifitgads daventa pli e pli in problem.

«La mancanza da persunal è IL grond problem economic dal Grischun en l'avegnir.», quai di Maurus Blumenthal, directur da l'Uniun d'artisanadi e mastergn. En la Marella dal favrer avevan nus discutà cun blers mainafatschentas ed impressaris ed els tuts conferman che lavur saja d'enturn detg avunda. Sch'els hajan dentant dad ir a la tschertga da persunal qualifitgà, saja quai fitg stentus u magari gnanc pussaivel. Sin inserats na dettia strusch annunzias e schebain che la lavur lubiss dad engrondir ina firma u l'autra, manca il persunal per pudair far quai. Ed il problem virulent fatschenta era la politica.

Questa Marella ha dà da discutar ed uschia proseguin nus cun la tematica ed ans deditgain lemna che vegn tar RTR en differentas contribuziuns e discussiuns cun la mancanza da mastergnants.