Il cantus firmus surselva a Laax (2009) e Cuira (2015).

Per cumpensar in zic quai temp senza concerts e festas da chant en natira, emetta RTR en l'emissiun «Noss chors» ina seria da concerts ord noss archiv. Qua vegn la segunda part. E qua chanta in dals capo-chors rumantschs, il cantus firmus surselva. «Chanzuns rumantschas en ils divers idioms» – quai è stà il tema dal concert dals 13 da november 2009 a Laax en la baselgia parochiala. 

Sin il program stattan chanzuns da: Duri Sialm, Armon Cantieni, Gion Duno Simeon, Giusep Maissen, Hans Lanicca, Gion Giusep Derungs, Gion Antoni Derungs, Carli Scherrer e Gion Balzer Casanova. Ils interprets: cantus firmus surselva, Judit Scherrer, mezzosopran, Clau Scherrer, dirigent e pianist. Suenter quest concert da Laax dat il Cantus firmus surselva anc sis chanzuns ord: Liebeslieder Walzer, op. 52 da Johannes Brahms, registradas da RTR ils 2 da favrer 2015 en il teater a Cuira. Pianist: Yunus Emre Kaya.