Ins di gea, sche trais Rumantschs s'entaupian, lura furmian els immediat in chor da quatter vuschs! Quai è bain ina sgnocca, ma ella tradescha era in zic co che nus ans percepin: sco in pievel che chanta, in pievel unì tras sia tradiziun da chant. En sia dissertaziun è Laura Decurtins sa fatschentada cun l'istorgia da la musica vocala rumantscha e cun la colliaziun tranter il chant e noss sentiment d'identitad. La Marella discurra cun la musicologa davart la creaziun dad identitad entras la chanzun, dals temas ch'han influenzà (ed influenzeschan era anc oz) nossas chanzuns ed era da la dumonda, schebain i dettia insumma insatge sco ina «unitad rumantscha».