Chroniques Radio

والبداية مع شركة البرمجيات العالمية مايكروسوفت، واللي ولات كتيح لمستخدمي نظارات ميتاكويست يستعملوا حزمة Microsoft Office، باش هاكا يقدروا يحرروا ويكتبوا النصوص فيشي Word و يصايبو مستندات الجداول في Excel، إلى جانب les presentations PowerPoint

وبالتالي يمكن ليكوم من دبا تآنسطاليو تطبيقات مايكروسوفت أوفيس بالفعل على ميتا ستور لتطبيقات نظاراتها الذكية Meta Quest Store، وكلها مجانية، التطبيقات الجديدة كتخدم مع الإصدار الأول من نظارة أوكيلوس كويست، وميتا كويست 2، وميتا كويست برو، وميتا كويست 3

أشير أن مايكروسوفت مؤخرا أعلنت عن إتاحتها لإصدار جديد من خدمتها السحابية للألعاب Xbox Game Pass على نظارات ميتا كويست الذكية، الشيء اللي كيخلي اللاعبين يستمتعوا بألعاب تفاعلية مقابل اشتراك شهري

ونتاقلوا لشركة آبل العالمية، وبعدما حظرات هاد الأخيرة تطبيقات Beeper Mini وBeeper Cloud اللي كيخليو مستخدمي هواتف أندرويد قادرين أنهم يسيفطوا ميساجات لمستخدمي آيفون على خدمة iMessage، طالب مجموعة من النواب الأمريكيين وزارة العدل والتجارة بفتح تحقيق ضد الشركة بتهمة احتكار خدمات التراسل

أذكر أنه قبل ما تطلق "بييبر" خدماتها، كانت الميساجات اللي كتسيفط من أندرويد إلى آيفون، كتمشي بمقابل مالي على أساس SMS،، وكتبان لمستخدمي آيفون في صورة فقاعات خضراء، وهو الحاجة اللي اعتبروها بعض المستخدمين، خاصة المراهقين وصمة اجتماعية كتميزهوم على صحابهوم خاصة إذا كانت كونفيرساسيون كروب، الشيء اللي خلا بزااف منهوم يضطروا يهاجروا لهواتف آيفون

"بيبير" ماشي هي الشركة الوحيدة اللي بغات تنهي هاد الاحتكار، غوغل هي الأخرى دعات آبل أنها تعتامد على معيار التراسل الجديد RCS، واللي كيسمح بتبادل الرسائل بين أندرويد وآيفون عبر الإنترنت، الشيء اللي خلا آبل تواعد المستخدمين بتفعيل هاد الميزة بداية هاد العام

ونختموا فقرة "تيك ويك" بمنصة تيك توك، واللي أثارت ضجة بعدما زادت فيلتر بصري جديد "Expand AI" ، كيوسع أبعاد الصورة عبر إضافة تفاصيل وعناصر جديدة ليها ، مما كيجعلها تبان كأنها ملتقطة و مصممة بزاوية رؤية أوسع من حقيقتها

واعتمدت المنصة في تصميم الفلتر الجديد على الذكاء الاصطناعي، بحيث كيحلل اللقطة والتفاصيل داخل الصورة ، من بعد كيدير عملية كتسمى Outpainting، وكتضمن إضافة عناصر إلى جوانب الصورة لتوسيع أبعادها

Hébergé par Ausha. Visitez ausha.co/politique-de-confidentialite pour plus d'informations.

بداية مع الفنانة الشابة ريم فكري، واللي دخلات مؤخرا في مشادات كلامية مع الرابورة بنت الستاتي الملقبة فنيا بإيلي ، بعد تصريحاتها المثيرة للجدل في الحلقة الأخيرة من برنامج رشيد شو اللي كيقدمو الإعلامي رشيد العلالي

هاد الأخير طرح سؤال على فكري حول الفنانة اللي ما يمكنش شي نهار يجمعهوم شي فيت أولا ديو، جاوباتو ريم بإيلي بنت الستاتي نظرا لتباعد الأنواع الموسيقية اللي كيقدمو

وكرد على ريم، بارطاجات إلهام العرباوي الشهيرة بـ "بنت الستاتي"ستوري على الكونت ديالها الرسمي فأنستغرام ، وجهات من خلالو انتقادات حادة لريم فكري، بحيث وصفتها" إبلي" بالنكرة كونها تكبرات أنها تعمل ديو معاها ، رغم أنها كانت كتملق ليها فبداية مشوارها الفني على حد أقوال "إيلي"

من الجدير بالذكر أن "إيلي" توعدات ريم أنها إلا عاودات جبدات الاسم ديالها فشي برنامج ، غتخرج سكرينات ديال كونفيرساسيون ديالها مين كانت كطلبها تعطي رأيها فلكوفر اللي كانت كدير فالبدايات ديالها

ونتاقلوا لأمين تمري المشهور بأمينوكس، واللي خرج فيديو كليب أغنيتو الجديدة، عبر قناته الرسمية يويتوب، تحت عنوان "ALAISE"، من كلمات أسامة بريطل وتوزيع عبدالصمد العثماني ومن ألحان وإنتاج أمينوكس، أما الفيديو كليب فتم تصويرو بأحد الاستوديوهات بمدينة الدار البيضاء تحت إشراف المخرج يوسف أسواري

ونشر أمينوكس مقطع من الأغنية مع جمهوره ومتتبعيه عبر حسابه الشخصي بإنستجرام، أرفقه بتعليق قال فيه" NOW .. ENJOY"

أشير أن أمينوكس كيشارك في النسخة الثانية من برنامج اكتشاف المواهب الغنائية "ستارلايت" وهي النسخة اللي كيشارك في لجنة تحكيمها إلى جانب كل من أسماء المنور، نعمان لحلو، الدوزي و حاتم عمور

ونختمو فقرة "نجوم ويك" بالفنانة المغربية المقيمة بالديار الهولندية"Inez "، واللي خرجات جديدها الفني أغنية "أنا ليك" عبر قناتها الرسمية على موقع يوتيوب، وهي من كلمات إينيز بمشاركة مبارك النوالي، والموسيقى ياسين العلوي مدغري

للإشارة، حقات إينيز شهرة كبيرة بفضل ميدلي "منك ولا مني"، اللي وصل لأكثر من 33 مليون استماع و55 مليون مشاهدة على يوتيوب، وسجلت أغنيتها الثانية "My Love" نجاح واسع بأكثر من 70 مليون استماع على سبوتيفاي

Hébergé par Ausha. Visitez ausha.co/politique-de-confidentialite pour plus d'informations.

واش سبقليكوم خرجتو و نسيتو التيليفون ديالكوم فالدار، أو حسيتوا فحالا شي طرف منكوم مفقود، إذا كان الجواب نعم، فأنت فهاد الحالة مصاب بمتلازمة "نوموفوبيا"، فماهو رهاب النوموفوبيا؟ ما هي أعراضه؟ وطرق العلاج؟

ما هي النوموفوبيا No Mobile Phone Phobia

النوموفوبيا هي حالة من الرهاب أو الخوف الكبير من أنك تطيح التيليفون ديالك أولا تلفو، الشيء اللي كيؤثر على الحياة اليومية ديال الفرد وكينعكس عليه بمجموعة من الأعراض النفسية والجسدية

وظهر هاد المصطلح لأول مرة في بريطانيا سنة 2008 من خلال دراسة على عينة كتضم أكثر من 2000 شخص، أكدوا شعورهم بالقلق والتوتر في حالة تلف ليهوم الهاتف ديالهوم، أولا سالا ليهوم la charge، أولا تسالات ليهوم la connexion

أعراض النوموفوبيا

رغم أنه ماتمش إدراج النوموفوبيا في الإصدار الأخير من الدليل التشخيصي والإحصائي للاضطرابات العقلية، إلا أن هاد الرهاب يكمثل مصدر قلق كبير للصحة العقلية ديال الفرد، من خلال الأعراض الكثيرة اللي كتصاحبو ، أبرزها الشعور بضيق فالصدر، مواجهة صعوبة فالتنفس، الارتجاف والرعشة، فرط في التعرق، الشعور بالدوار، Tachycardie أو ما يعرف بارتفاع سرعة دقات القلب ، و غالبا ما كتجي هاد الأعراض للأشخاص لعندهوم إدمان مرضي على الهاتف

أسباب النوموفوبيا

بما أن هاد الرهاب باقي جديد فما كاينش أسباب محددة ليه، لكن إذا كان الشخص كيعاني من بعض المشاكل النفسية المسبقة فحال الخوف من العزلة أولا القلق الاجتماعي، فهادشي كيخليه ديما يكون مرتبط بالتيليفون ديالو ويكون علاقة إدمان معاه، لهاد السبب كنلقاو هاد الرهاب منتشر بزاف عند المراهقين

طرق العلاج من النوموفوبيا

بالنسبة للعلاج من هاد الرهاب ، فيمكن الاستفادة من العلاج السلوكي المعرفي CBT واللي تبث الفعالية ديالو فتغيير الأفكار السلبية وغير المنطقية التي كتدور في عقل الإنسان وقتما فكر أنه ما عندوش هاتف، أولا من خلال بعض الأدوية لكتقلل من التوتر و الهلع فحال حاصرات بيتا

Hébergé par Ausha. Visitez ausha.co/politique-de-confidentialite pour plus d'informations.

كتقدم دور الأزياء العالمية كل موسم كوليكسيون جديدة اللي كتماشى مع طبيعة الجو والفصل، أو بما أننا في فصل الشتاء كيتزاد البحث على مونطويات اللي كتجمع بين أنها دفينا من البرد وفنفس الوقت نحافظو بيها على الأناقة ديالنا

لهادشي غنقتارح عليكوم وبالخصوص للرجال أبرز موديلات المعاطف الشتوية موضة 2024، و اللي ضروري أي رجل يكون كيتوفر عليها

مونطو كرومبي Crombie

الكرومبي هو اسم ماركة تجارية بريطانية معروفة، كيتعتبر من بين أفضل المونطويات الرجالية الشتوية، كنسميو مونطو كرومبي على جميع المعاطف اللي كتفكرنا بهاد البراند و اللي كيوصل الطول ديالها ثلاثة الأرباع طول الرجل

فالغالب كيكون مونطو كرومبي مصنوع من قماش صوفي، وهو مناسب لحضور الاجتماعات والمناسبات الرسمية، لأنه كيتوالم مع السوت أو البذل الرجالية

مونطو كريت كوت Greatcoat

هاد الستيل ديال مونطويات كان كيلبسوه جنود القوات البرية فنهاية القرن 19، وبالتالي فالطبيعة ديالو عسكرية، الشيء اللي كيخليه يكون طويل من الركبة إلى منتصف الجزء السفلي من الساق

كيجي الكريت كوت بحزام عريض كيشد الظهر، وكول كبير مع بليات جهة الصدر،

وكيكون مصنوع من نسيج الصوف الدافئ، ماكيتلبسش فقط مع الكاجول ، ولكن كيتلبس أيضا مع الكلاس والملابس الرسمية

مونطو كارويات من Billy Red

أكثرية الرجال كيفضلو المونطويات كارو لأنها عمرها ما كاضيمودا، لهادشي اختاريت ليكوم مونطو من بيلي ريد المصمم من صوف الكاروهات بالألوان الترابية، كيجي بكول طويل وجيوب أمامية وحزام طويل من الصوف بنفس لون وموتيف المونطو

لونغ كوت من Christian Dior

قدمات دار الأزياء كريستيان ديور مونطو طويل باللون الباج مصنوع من الفرو، كيجي بكول عريض وأجياب داخلية جهة الصدر، يمكن ليكوم تنسقوه مع بلوفر بنفس لون الفرو وسروال باللون البيج المغلوق

Hébergé par Ausha. Visitez ausha.co/politique-de-confidentialite pour plus d'informations.

كاين استعمالات كثيرة للقهوة، من غير أنها المشروب السحري اللي ميمكنش شي أشخاص يبداو نهارهوم بلا بيه، فبالإضافة لكونها منبه جيد لاحتوائها على الكافيين، فهي ليها استعمالات منزلية أخرى غتساعدك أنك ما ضيعهاش أو تستغل البقايا ديالها اللي عندها بزاف ديال المنافع

أولا، إصلاح خدوش الأثاث 

إلا الله يستر تقاس ليك الأثاث ديالك أو تخدش ليك، ما عليك  إلا تخلطي  التخى ديال القهوة مع ربع كاس من الماء الدافئ وربع كاس من الخل، خلطي كلشي مزيان وخليه يرتاح لمدة ساعة على الأقل، من بعد غطسي طرف ديال الثوب فالخليط وفركي الخدوش اللي كاينة فالأثاث ، تقد تاخد ليك هاد العملية الوقت على حسب طبيعة الخدوش اللي كتعاملي معاها 

ثانيا، تعطير الجو 

إلا بقات ليك ريحة القلي أو لا شي ريحة خايبة وسط الدار، طبخي القهوة مزيان فشي بريق أو دوريها فالدار كاملة، أولا حطي بعض حبوب القهوة المطحونة المجففة فشي تقاشر طوال وعلقيهوم فشي بلاصة عالية، هاكا  غتحصلي على معطر هواء ساهل غايعاونك تخلصي من جميع الروائح غير مرغوبة فيها 

ثالثا، التخلص من الروائح العالقة في اليدين

الخاصية الطبيعية الموجودة في القهوة يمكن ليها  تعاونك تحيد الروائح اللي كتلصق فاليدين، ما عليك إلا تحط كمية صغيرة من القهوة المطحونة مع صابون غسيل اليدين،فرك يديك مزيان أو شللهوم بالماء وهانتا تهنيتي من رائحة البصل أو الثوم 

رابعا، تسميد النباتات

حبوب القهوة كتحتوي على كمية وفيرة من النيتروجين والبوتاسيوم والمغنيسيوم ومجموعة من المعادن الأخرى اللي كتخليها تكون مفيدة لنمو النباتات، كما أنها كتساعد في طرد الحشرات الضارة بالنباتات، لذلك يمكن ليك ترش القهوة المطحونة مباشرة على التربة أولا تزيدها للسماد الخاص بيك

Hébergé par Ausha. Visitez ausha.co/politique-de-confidentialite pour plus d'informations.

وبداية مع شركة "تيك توك"، و اللي علنات فتصريح ليها أنها غادي تستثمر ما يقارب 1,5 مليار دولار في شركة "غوتو"، في صفقة  غادي تخلي منصة مقاطع الفيديو القصيرة تعاود تخدم متجرها الإلكتروني في إندونيسيا، ثاني أكبر سوق ليها فالعالم

و وضحات الشركتان أن الاتفاق اللي جمعهوم يقضي بدمج أعمال "توكوبيديا"و"تيك توك شوب إندونيسيا" في إطار كيان واحد "بي تي توكوبيديا"، واللي غتاخد فيه منصة تيك توك الحصة الأوفر

 من الجدير بالذكر أن  أندونيسيا سبق ليها و حظرت في شتنبر الماضي المبيعات على وسائل التواصل الاجتماعي، باش تحمي الشركات الصغيرة اللي تراجعات أرباحها مقابل الشركات العملاقة ،  الشيء اللي خلا  تيك توك  مجبرة  على إغلاق متجرها 

أو نتاقلوا لمنصة "سبايس إكس" لمالكها إيلون ماسك، بحيث أفادت بلومبرغ نيوز أن الشركة ستبيع أسهم داخلية بثمن 97 دولار للسهم الواحد في عطاء، وهي زيادة في السعر غتخلي تقييم الشركة يوصل  لما يقراب 180 مليار دولار

و كانت "سبايس إكس"  كتناقش عرض مطروح في عطاء كيوصل بين 500 مليون دولار و750 مليون دولار، أي  بسعر 95 دولار تقريبا للسهم الواحد، هادشي قبل ما يتزاد ل97 دولار للسهم الواحد

نذكر أن التقييم الحالي لشركة الصواريخ كيوصل  150 مليار دولار، الشيء اللي كيخليها واحدة من أكثر الشركات الخاصة قيمة في العالم

أو نختمو فقرة "تيك ويك" بشركة واتساب، واللي علنات فآخر آبديت ليها عن ميزة جديدة  كتيح للمستخدمين إمكانية إرسال ميساج فوكال كيتسمع مرة واحدة، وكيختفي بمجرد ما كاتسمعهو

و كتهدف هذه الميزة لإضافة  المزيد من الخصوصية للرسائل، بحيث يمكن ليك تبارطاجي المعلومات الحساسة والسرية ديالك عبر الرسائل الصوتية بشكل آمن بلا ماتخاف أنها تخرج وتسرب

Hébergé par Ausha. Visitez ausha.co/politique-de-confidentialite pour plus d'informations.

كاين اللي مايقدرش يخرج من الدار، إلا مارش البارفان ديالو المفضل اللي كيكون غالبا مكون من  الزيوت العطرية والكحول والماء والمواد الحافظة

لكن رغم أن الرائحة كتكون زوينة و منعشة وكتطلع المورال، إلا أنها تقدر تكون مصدر إزعاج لبعض الأشخاص، بسبب إصابتهم بحساسية العطور، فما هي حساسية العطور، ما هي أسبابها وطرق العلاج؟

ما هي حساسية العطور؟

كتوقع حساسية العطور فاش كيشم الواحد ريحة  كتحتوي على مجموعة من المواد الكيميائية التي يتحسس منها الجسم بشكل عام

وفغالبية الأحيان، هذه الحساسية ما كتأديش لاستجابة مناعية من كامل الجسم، وإنما كتؤدي لبعض التهيجات اللي غالبا ما كتكون لها علاقة بالتنفس، أو على مستوى الجلد

أعراض حساسية العطور

كاين مجموعة من الأعراض اللي كتبان على الشخص بعدما كيستنشق إحدى الروائح، واللي كتكشف على أنه مصاب بحساسية العطور، وكتمثل في العطس المتكرر، حكة على مستوى الأنف،السعال، حك العينين

لكن في الحالات الصعيبة بزاف كتبان الأعراض التالية :إحساس حارق في الممرات الأنفية،الصداع، احتقان الأنف، سعال جاف، الغثيان، الدوار، حكة واحمرار في الجلد

أسباب حساسية العطور

كتوقع حساسية العطور بسبب تهيج الجهاز التنفسي أو الأغشية المخاطية للعينين، بحيث كتهيج مجموعة من المواد الكيميائية العضوية والاصطناعية هاد الحساسية الشيء اللي كيخلي الفرد تظهر عندو الأعراض اللي تكلمت عليها سابقا

طرق العلاج من حساسية العطور

الوقاية خير من العلاج، من الأحسن الابتعاد ما أمكن عن استخدام العطور واستنشاقها، لكن في حال حدوث الحساسية فيمكن علاجها وتخفيف الأعراض ديالها عن طريق  تناول بعض الأدوية المضادة للحساسية،  فحال مضادات الهيستامين، أو مراهم الكورتيزون لتخفيف حكة وحرقة الجلد الناتجة من حساسية العطور، كما بإمكانكوم تستخدمو بخاخات الكورتيزون بعد استشارة الطبيب ديالكوم 

Hébergé par Ausha. Visitez ausha.co/politique-de-confidentialite pour plus d'informations.

والبداية من مدينة فاس، و مع افتتاح الدورة الثامنة لمهرجان أغورا الدولي للسينما والفلسفة، تم تكريم الفنان والممثل المغربي رشيد الوالي  عن  شريطه الطويل الجديد "الطابع" ، بحضور فنانين و فاعلين ثقافيين، وكذا باحثين ومهتمين بحقل الفلسفة

وتميز أيضا حفل افتتاح هاد الدورة،  اللي كتعرف مشاركة حوالي 20 شريط روائي قصير وطويل، تقديم لجنة تحكيم الأفلام الطويلة والقصيرة، اللي يرأسها كل  من المخرجان الإيطالي ماريو برينطا، والمغربي محمد عهد بنسودة

كما تم تكريم المخرجة الإيطالية كارين دي فيلرس، خلال هذه التظاهرة الفنية المنظمة بمبادرة من جمعية أصدقاء الفلسفة، ودعم من المركز السينمائي المغربي

أو نتاقلوا لبرنامج الفنانة أحلام الجديد" ألف ليلة وليلة"، واللي اختارت فأولى حلقاتها تكريم الموسيقى المغربية والاحتفاء بها، من خلال استضافة كل من الفنانة المغربية أسماء لمنور والفنان المغربي حاتم عمور، بحيث نقلو الجمهور فرحلة فنية خالصة من الموروث المغربي اللي كيمزج الأصالة بالحداثة 

وتصدرات حلقة لمنور وعمور جميع منصات السوشل ميديا ، بحيث بارطاجات جماهير عريضة مقاطع من البرنامج، أبرزها خلال تقديم الفنانين أغاني مغربية قديمة أبرزها أغنية "للا فاطمة"للراحل حميد الزاهر

أو نختمو فقرة "نجوم ويك" بالممثل الأميركي ريان أونيل، المعروف بدوريه في فيلمي “لاف ستوري” و”باري ليندون” للمخرج ستانلي كوبريك، واللي توفى نهار الجمعة عن عمر يناهز 82 عاما

الممثل كان كيعاني من مرض السرطان في الدم  من عام  2001 والبروستات من عام 2012 ، حسب أقوال الإبن ديالو اللي قال فحسابو الرسمي على انستغرام :  "توفي والدي بسلام اليوم، وكان فريقه المحب إلى جانبه يدعمه ويحبه كما نحبه، وكان والدي ريان أونيل بطلي دائما وأسطوة هوليوود، لقد نظرت إليه وكان دائمًا أكبر من الحياة"

Hébergé par Ausha. Visitez ausha.co/politique-de-confidentialite pour plus d'informations.

مع اقتراب الكريسماس أولا كيف كانقولو  ليه بالدارجة  راس العام، كيبدا الاستعداد لهاد المناسبة السنوية بتزيين المحالات والمطاعم بشجرة الكريسماس اللي كتميز بألوان الأحمر والأخضر 

السيدات كذلك ما كتخطاهومش هاد المناسبة باش يبرزو أجمل ما عندهوم من إطلالات شتوية كتماشى مع الفايبز ديال الكريسماس، لهادشي اختاريت ليك سيدتي مجموعة من التنسيقات اللي غتساعدك تباني أنيقة بأقل مجهود وفأقل وقت 

تنورة كاروات مع بلوزة سامبل

أهم ما كيميز ملابس الكريسماس الشتوية، هي  أنها متعددة الاستخدامات، يمكن ليك تلبسي جيب موتيف كاروات باللونين البيج والأحمر، مع بلوزة سامبل باللون البيج، كما بإمكانك تزيدي مونطو فالأحمر أو الأخضر ماتشي مع التيم ديال الكريسماس، وسالي اللوك ديالك بطالون باللون الأحمر أو الأسود

فستان ميدي باللون الأخضر

فحالة كنتي ما كيعجبكش اللون الأحمر، أو كتفضلي  الستايل كلاسي في حفلات الميلاد،  الفساتين الميدي ذات اللون الأخضر، هي المثالية ليك، لبسي معاها مونطو باج أو جاكيت كوير للمزيد من الأناقة

لوك أونيفي باللون الأحمر 

لإطلالة عصرية وجريئة فنفس الوقت، يمكن ليك تختاري لبسة كاملة باللون الأحمر وتنسقيها مع مونطو باللون الأسود، هاد اللوك غيعطيك الكثير من الحيوية، بالإضافة إلى أنه يليق تلبسيه للخدمة وحتى لحفلات الميلاد ديال العائلة والأصدقاء

لوك كلاسيكي رياضي 

بالنسبة للسيدات اللي ماعزيزش عليهوم يلبسو الكلاس بزااف، يمكن ليكوم تختارو إطلالة كلاسيكية وعملية فنفس الوقت، نسقي لبسة كاملة باللون الأخضر الغامق أو يمكن ليك تلبسيها مع هودي سامبل مع حذاء رياضي لإطلالة أقل رسمية

Hébergé par Ausha. Visitez ausha.co/politique-de-confidentialite pour plus d'informations.

فصل الشتاء، هو أكثر وقيتة كيولي فيها المنزل المكان الأمثل للراحة و الدفء من الجو البارد اللي كيكون برا ، وباش تحافظ السيدات على هاد الدفء كتبغي الكثيرات منهم أنهوم يبدولو ديكور المنزل، إلا أنهم كيصطدمو بالأثمنة الغالية اللي كتخلي هاد المهمة صعيبة عليهوم 

لهاد السبب، غنقتارح عليك سيدتي أربع حيل لديكور منزلي شتوي وبأقل التكاليف

الوسائد الصوفية بألوان ترابية

ماشي بالضرورة تبدلو الكنابيات ديال الصالون كاملين، فالمقابل بإمكانكوم توالموها مع الجو الشتوي، وتبدلو الوسايد ديالهوم لألوان ترابية مثل درجات البني، والبرتقالي، والبيج

 بإمكانكوم  تختارو مخدات مخملية أو صوفية مزينة بالريش حطوها فجناب الكانابيات أو حتى فالأرض هاكا غتعطي إيفي كوزي للدار

الزرابي في مختلف غرف المنزل

الزرابي كتعتبر من بين أهم قطع الديكور في المنزل، لهادشي  يمكنليك  تشري زرابي جداد بألوان غامقة، باش تعطي شعورا بالدفء في المنزل،ومن الأفضل أنكوم توزعوا الزرابي في جميع الغرف ، من بينها المدخل، والصالون، وغرف النوم، والمطبخ

الشموع بألوان غامقة

كتعتبر الشموع من بين الديكورات اللي كتعطي لمسة رومانسية وهادئة للدار ففصل الشتاء، وكتختلف أحجامها وحتى الرائحة اللي كتعطي، داكشي علاش بإمكانك تحطيها فبلايص مختلفة أو تلعبي على الديكور ديالها كيف بغيتي، بحيث الشموع الطويلة البيضاء والحمراء كتحط فداينين روم ، أما  الشموع القصيرة والموضوعة فكأس كبير فمن الأحسن تحطوها فبيت النعاس والحمام 

الورود الهادئة والمجففة 

كتعطي الورود ففصل الشتاء لمسة خاصة لديكور البيت، خاصة إذا كانت جافة أو  فألوان هادئة فحال الباج والنيود، يمكن ليك تزيني بيها مائدة الأكل أولا الدخلة ديال الدار، أو يمكن ليك تحطيها حتى فالكوزينة 

Hébergé par Ausha. Visitez ausha.co/politique-de-confidentialite pour plus d'informations.