Cun «Chara lingua da la mamma» ha el cumponì ina chanzun emblematica per la Rumantschia. Cun raschun stat sin sia fossa en il santeri Daleu a Cuira l'inscripziun: «Tia chanzun viva». Robert Cantieni è naschì avant 150 onns a Ftan.

Cur che Robert Cantieni è mort l'onn 1954 cun 81 onns, ha il cumponist engiadinais relaschà passa 1000 chanzuns. Ina tala ierta musicala sto vegnir administrada. Dus biadis da Robert Cantieni han fatg urden cun l'archiv e decidan ussa en la segunda generaziun, tge che capita cun las chanzuns e tgi che po lavurar a moda musicala cun il material da lur tat. Cun exempels musicals decleran els lur chapientscha d'elavuraziuns che resguardan la cumposiziun originala. Co duess viver vinavant la chanzun da Robert Cantieni? Sco che questa Marella dal 2013 mussa, n'eran ertavels e musicists contemporanas betg adina perina.