En trais locals da concurrenza èn ils chors sa preschentads davant la giuria. Bun 1'900 chantaduras e chantadurs da 66 onns chors han vulì mussar lur meglier chant. In da quels locals era la Baselgia Son Martin.

Tranter ils 2 ed ils 4 da favrer ha gì lieu a Cuira la concurrenza svizra dals chors . Igl è stà la 11avla ediziun dapi l'onn 1988 cura che la concurrenza ha per l'emprima giada gì lieu a Schaffusa. Dapi l'ultima giada han amaturas ed amaturs da chors gì da spetgar in zic pli ditg – l'ultima giada è numnadamain stada 2017 ad Aarau.

En la pli veglia baselgia da Cuira èn la sonda en tut 20 chors sa preschentads. Quai en las categorias «chors da dunnas», «chors virils pitschens», «chors maschadads» e «chors virils». En l'emissiun dad oz pudain tadlar ina selecziun da las registraziuns che RTR ha fatg durant quai di.

Istoricamain è il Martinsplatz davant la baselgia tranter Obertor ed Untertor stà il punct central dal transit. Era la sonda durant la concurrenza svizra dals chors hai dà bler traffic en ed enturn la baselgia. Sin tribuna eran chors da l'entira Svizra ch'han preschentà in program variant.