En trais locals da concurrenza èn ils chors sa preschentads avant la giuria. Bun 1'900 chantaduras e chantadurs da 66 chors han vulì mussar lur meglier chant. In da quels locals è stà il Teater Cuira.

Dals 2 fin ils 4 da favrer ha gì lieu a Cuira la concurrenza svizra dals chors. Igl è stà la 11avla ediziun dapi l'onn 1988, cura che la concurrenza ha per l'emprima giada gì lieu a Schaffusa. Dapi l'ultima giada han amaturas ed amaturs da chors gì da spetgar in zic pli ditg – l'ultima giada è numnadamain stada 2017 ad Aarau.

En il teater a Cuira èn la sonda e dumengia sa preschentads 20 chors da l'entira Svizra en la categoria «Popchöre» ed en differentas categorias da chors d'uffants e giuvenils. L'emissiun dad oz preschenta ina selecziun da las registraziuns che RTR ha fatg durant quels dis. La dumengia suentermezdi ha medemamain il final e la rangaziun gì lieu en il teater – quai pudais vus guardar qua anc ina giada .

Il teater ha gia ina lunga tradiziun a Cuira. Emprims teaters hai gia dà enturn 1517. Da far regularmain teater saja pussaivel dapi 1876 e dapi 1959 è il teater en quai lieu nua ch'era ils concerts da quella fin d'emna han gì lieu. In u l'auter chor han forsa era perquai fatg in zic teater durant lur bun 15 minutas preschentaziun ed uschia divertì il vast public betg be chantic.