Cuntrasts

Clima? Nagin problem pli il 2022. Corona? N'era betg! «RTR – La show» sa cun l’ediziun exclusiva mundiala dal «Chalender per il mintgagi romontsch» tge che l’onn nov vegn a purtar.

La show da la midada da l'onn stat en buna tradiziun dals chalender e calenders en Rumantschia. I vegn tschantschà ina massa e davant e davos datti reclamas. Gea schizunt en l'intern. Dentant gailas reclamas.

2022 vegn tut meglier. Propi? Gea, clar! Mender che 2021 na va gea betg, e stuain propi anc tschantschar dal 2020? Per il 2022 prognostitgescha «RTR – La show» be bellas chaussas. U quasi be bellas chaussas. Tranter auter: art per Breil, la fin da tut ils problems cun la midada dal clima e sa chapescha er insatge cun corona. Perquai che lez portg resta gea sco ch’i guarda or, u na? Faschai in clic sin il video!

Anc adina vi da leger? Jo hainomol! Faschai per plaschair quest benedi clic sin il video! Qua datti nagut da leger pli. U schont? Forsa insatge davart il tema da la proxima show il favrer? U forsa datti schizunt in gieu nua ch'ins po gudagnar insatge…? KASCH DENKA! So ed uss clic sin il video!

Ok, ok… insatge pitschen forsa anc per finir: En la prevista da l'onn 2022 datti da vesair in nov sontg. Propi.

Clima? Nagin problem pli il 2022. Corona? N'era betg! «RTR – La show» sa cun l’ediziun exclusiva mundiala dal «Chalender per il mintgagi romontsch» tge che l’onn nov vegn a purtar.

La show da la midada da l'onn stat en buna tradiziun dals chalender e calenders en Rumantschia. I vegn tschantschà ina massa e davant e davos datti reclamas. Gea schizunt en l'intern. Dentant gailas reclamas.

2022 vegn tut meglier. Propi? Gea, clar! Mender che 2021 na va gea betg, e stuain propi anc tschantschar dal 2020? Per il 2022 prognostitgescha «RTR – La show» be bellas chaussas. U quasi be bellas chaussas. Tranter auter: art per Breil, la fin da tut ils problems cun la midada dal clima e sa chapescha er insatge cun corona. Perquai che lez portg resta gea sco ch’i guarda or, u na? Faschai in clic sin il video!

Anc adina vi da leger? Jo hainomol! Faschai per plaschair quest benedi clic sin il video! Qua datti nagut da leger pli. U schont? Forsa insatge davart il tema da la proxima show il favrer? U forsa datti schizunt in gieu nua ch'ins po gudagnar insatge…? KASCH DENKA! So ed uss clic sin il video!

Ok, ok… insatge pitschen forsa anc per finir: En la prevista da l'onn 2022 datti da vesair in nov sontg. Propi.

«Las dunnas», crititgescha sora Gielia Degonda, «han da rasar or ils tarpuns per ils umens». Intgins, raquinta la reverenda Chatrina Gaudenz, «na ma taidlan betg, perquai che jau sun ina dunna». E l’unica assistenta pastorala grischuna Flurina Cavegn-Tomaschett concluda: «Atgnamain desista la baselgia da tschuncanta procent potenzial ch’è d’enturn». Malgrà questa dominanza masculina èn las trais dunnas activas en in conturn religius. E betg be quai – ellas han chattà lur via persunala ad ina vita en servetsch da Dieu. Sora Gielia Degonda viva sco magistra d’art en la claustra ad Ingenbohl ed è daventada in’artista da renum naziunal. Chatrina Gaudenz è la pli giuvna dad ina dinastia da reverendas engiadinais e l’emprima dunna reverenda en famiglia. La teologa Flurina Cavegn-Tomaschett sa deditgescha, suenter sia lavur da master, sco assistenta pastorala a la tgira dad olmas a Glion. Ils «Cuntrasts» cun trais dunnas e trais perspectivas sin ina tematica: La dominanza masculina en il mund religius.

«Quellas stailas, quai è super bel d’avair e quellas na vul ins betg perder.» En la documentaziun «Gourmet – tarlischur e sgarschur» raquintan trais cuschinierAs rumantschAs da renum da lur experientschas. Tge che las stailas ed ils puncts portan, quant impurtantas che quellas valitaziuns èn per ils cuschiniers e las cuschinieras e tge varts negativas ch’i dat.

Cun trais stailas da Michelin e 19 puncts da Gault Millau tutga Andreas Caminada en la Tumleastga tar ils megliers. Ma en cuschina è el pauc, e sche, lura oravant tut per lavurar vi da novas creaziuns. Uschiglio è el manager ed ha tut ils fils enta maun. Dario Cadonau ha ina staila e 17 puncts. L’Engiadinais ha gugent tut sut controlla, el è da la damaun enfin la saira al lieu e sch’i fa da basegn porta el era las valischs dals osps. In onn suenter che Flurina e Michael Häsch-Maissen han surpiglià l’ustaria, han els survegnì 13 puncts. Quels han procurà per sentiments maschedads tar ils gastronoms da Mustér.

Ils guids – Micheline e Gault Millau èn las pli impurtantas premiaziuns en la scena da gourmet. Per ils cuschiniers e las cuschinieras pon quellas valitaziuns decider sur da success e carrieras,a cun quellas creschan dentant er il squitsch e las spetgas da tuttas varts.

In film da Manuela Morgenthaler

«Arjago» è tar il dentist, «Ivory» vegn operà d’in tumor e da «Muffin» èsi da prender cumià – il mintgadi usità en ina clinica. En quest cas èn ils pazients e las pazientas dentant animals: «Arjago» è in chaval, «Ivory» ina chogna cocker-spaniel e «Muffin» in giat. Lur tractament è il mintgadi dals profis da la Clinica Alpina a Scuol. 365 dis ad onn èn els ed ellas en servetsch per il bainstar dals animals engiadinais. Durant in da quels dis, durant 24 uras, ha in team dals «Cuntrasts» accumpagnà il schef da la clinica Beni Biner, la veterinaria Francesca Zala-Tannò e ses collega Men Bischoff e l’assistenta veterinara Marisa Tscholl. Ina reportascha da lur mintgadi tranter mort e vita.

Sculptur da zutger, sufflader da zutger, animatur da zutger. Uschia sa preschenta Grégoire Goël. A moda virtuusa creescha el figuras e creatiras fantasticas e coluradas. El ha er fatg part a pliras concurrenzas internaziunalas ed ha gudagnà plirs premis.

Il film che Laurence Mermoud ha fatg per la televisiun da la Svizra franzosa RTS mussa in pèr da las ovras da l’artist Grégoire Goël, ma er sia moda e maniera da lavurar, da crear e da tschertgar ils lieus e las modas da chargiar las battarias.

Tge dovri per scriver in text litterar? Ina buna idea u il squitsch da stuair scriver? In lieu quiet, musica u perfin baldori? Blers e buns cafés, vin u aua? Viola Cadruvi, Romana Ganzoni e Leo Tuor han survegnì l’incumbensa da RTR da scriver in text. Il titel è per tuts trais il medem: Dis da litteratura.

Co sa mettan els vi da la lavur? Tge curvas e stortas fan els? E cura èn els cuntents cun lur text? In film da Bertilla Giossi sur da la genesa d’in text ed il process da scriver.

Janic Andrin Spinnler ha in siemi da la vita. El vul manar ses agen bain puril. Ma il giuven Jauer na deriva betg d’ina dinastia da purs ed el ha pir gist finì ses emprendissadi sco pur. Da talas circumstanzas na sa lascha el dentant betg franar. Cun be 21 onns cumpra el in bain puril en la Val Müstair, senza agens raps e cun ina dunna ch’el enconuscha pir dapi intgins mais. Cun 400 giaglinas, intginas vatgas-mamma e cun bler anim sa metta il giuven pèr a la lavur. Las sfidas èn dentant grondas ed il siemi è collià cun stress, dubis e temas d’existenza. È quest project forsa in siemi memia grond? U ha il pèr giuven success? Sara Hauschild ha documentà durant in onn e mez il svilup sin il «Bain Bun» – betg mo sco schurnalista, mabain era sco onda da Janic Andrin Spinnler.

per proteger las nursas da Vrin

L’onn passà hai dà en il Grischun 257 animals stgarpads dal luf. Perquai è Mario Alig sa decidì da far diever da l’offerta da la Confederaziun: el ha cumprà dus chauns da protecziun da muntaneras. Organisà l’entira chaussa per el ha l’uniun Agridea, che fa questa lavur en num da la Confederaziun. Mario Alig ha uschia survegnì dus chauns da muntogna da las Pireneas, Amy e Kira, duas chognas da dus onns.

Davent da l’arrivada a Vrin, il s’acclimatisar, la chargiada, la vita ad alp, la stgargiada ed il return a chasa tar Mario – la reportascha documentescha l’emprim onn dals dus chauns tar Mario Alig e sia dunna Jovita a Vrin.

Tge è per tai bun sex? Ed has ti en il mintgadi er quel sex che ti ta giavischas propi? Ubain has magari schizunt tema che ti na sajas betg «normala/normal»? U laschain nus influenzar da memia d’ideas, co che sex stuess esser, che hollywood, la baselgia ubain reclamas mussan a nus. En l’emissiun «Zona cotschna» tschantscha la reportra Sabrina Bundi cun differentas persunas avertamain sur da sex e co che quel è propi en il mintgadi. Ed er la «sexperta» Caroline Fux, che ha cusseglià durant 10 onns il public dal «Blick» cun sia columna «Fux über Sex», raquinta dad in u l’auter exempel or dal mintgadi che gida da vesair: Cun nossas dumondas e noss quitads puncto sex n’essan nus betg persuls.