Cuntrasts

Las cifras èn alarmantas. Il dumber dad insects ed utschels va enavos sin l’entir mund. Ins discurra da la muria d’insects e da la digren d’utschels. Ma vala quai era per il Grischun?

Casper Nicca ha observà cun la camera ils animalets che dattan il soundtrack a nossa vita, quest mund misterius, plain colurs e plain tuns ed è ì a la tschertga da respostas. El ha vis che utschels ed insects han bleras amias e blers amis tar nus carstgauns ed ha pudì discurrer cun glieud che sa, co ch’i va a noss utschels ed insects. Tranter auter ha el pudì accumpagnar Erika Nicca, la collavuratura da la staziun ornitologica Sempach a Cuira, tar las lodolas da prada ubain il perscrutader da tgirallas Jürg Schmid durant la notg sin la tschertga da tgirallas da notg. Ma sin ils fastizs dad insects ed utschels en il Grischun ha l’autur dal film cunzunt era chattà maletgs impressiunants dals animalets che vivan cun nus.

Las cifras èn alarmantas. Il dumber dad insects ed utschels va enavos sin l’entir mund. Ins discurra da la muria d’insects e da la digren d’utschels. Ma vala quai era per il Grischun?

Casper Nicca ha observà cun la camera ils animalets che dattan il soundtrack a nossa vita, quest mund misterius, plain colurs e plain tuns ed è ì a la tschertga da respostas. El ha vis che utschels ed insects han bleras amias e blers amis tar nus carstgauns ed ha pudì discurrer cun glieud che sa, co ch’i va a noss utschels ed insects. Tranter auter ha el pudì accumpagnar Erika Nicca, la collavuratura da la staziun ornitologica Sempach a Cuira, tar las lodolas da prada ubain il perscrutader da tgirallas Jürg Schmid durant la notg sin la tschertga da tgirallas da notg. Ma sin ils fastizs dad insects ed utschels en il Grischun ha l’autur dal film cunzunt era chattà maletgs impressiunants dals animalets che vivan cun nus.

La nova exposiziun da Mirko Baselgia

Il cuirass d’ina tartaruga che consista da millis retagls da gasettas. Il bist d’in pign maltractà dal bau scorsa culà en latex. In maletg da cuntrada creà cun squamas da lain en in spazi radund. Quai èn mo trais da las ovras che l’artist Mirko Baselgia mussa en sia nova exposiziun en il Kunst(Zeug)Haus a Rapperswil-Jona. Tut sias ovras èn vegnidas realisadas sut grond squitsch da temp durant ils davos mais en las localitads da l’anteriura scola d’Alvaschagn. Igl ha duvrà buna gnerva e l’agid da blers gidanters e gidantras per terminar las ovras ad uras. L’emissiun «Cuntrasts» accumpogna la producziun da las lavurs enormamain pretensiusas e mussa tge impurtanza ch’il tema «pel» ha per Mirko Baselgia.

Suenter sia patenta da scolast primar l’onn 1977 ha Gion Gieri Sgier cleras ideas per sia vita professiunala: Instruir sin il stgalim aut a scolararas e scolars reals e mintga diesch onns midar lieu. Ma i vegn dal tuttafatg auter. Il giuven scolast va a Sevgein, instruescha las emprimas classas primaras e resta là 44 onns enfin tar sia pensiun.

Sper la scola èn las uniuns e la vita culturala dal vitg da Sevgein in element central en la vita da Gion Gieri Sgier. Petra Rothmund vul savair, daco ch’igl è vegnì tut auter che quai ch’il giuven scolast aveva planisà a sias uras. Cun sia camera accumpogna ella il scolast dal vitg durant sias davosas emnas da scola.

Cadonau fa vin. Vin rumantsch, cun nums sco «Gion Gialet», «il Cardun» ubain «la Randulina». E quai a Quinten, da l'autra vart dal Lai Rivaun. En la pitschna vischnanca ch’ins cuntanscha mo cun la bartga. Ma enfin che Hanspeter Cadonau è rivà a Quinten èsi stà in lung viadi.

Hampi Cadonau, che sa numna sez gugent in «punk», è stà lavurer da guaud, ustier en il Portugal e blers onns construider da tunnels sin l’entir mund. Ussa ha el chattà ses port en l’idilla sper il lai. Dentant bler pli ruassaivla n’è sia vita betg vegnida. Casper Nicca ha accumpagnà cun la camera il viticultur oriund da Vuorz durant in onn ed ha uschia survegnì ina invista en ina vita nunconvenziunala d’in Rumantsch.

L’emprim era la palutta. La giuvna Rebecca Clopath da Lon fa l’emprendissadi da cuschiniera e daventa cun 25 onns gia schefcuschiniera tar Stefan Wiesner, il cuschinier avantgardistic, numnà il «Hexer aus dem Entlebuch». Ella vala sco talent excepziunal en la scena da cuschinar svizra. Cun ses scharm, ses elan e sia creativitad è ella predestinada per ina carriera en in’ustaria da gourmet.

Ma Rebecca Clopath ha auters plans, sper la palutta prenda ella la furtga enta maun. La cuschiniera daventa era pura. Pura, per pudair cuschinar cun ils products producids tenor sias ideas. La finamira da Rebecca Clopath è da porscher tratgas che sa basan sin ina vita cumplessiva, persistenta e faira.

Cun ses project vul Rebecca Clopath crear a Lon, en in vitg da 30 abitantas ed abitants, ina nova pussaivladad da lavurar e viver per ella e per auters. Tge munta quai per la giuvna da 32 onns, ch’ha sias amias ed amis en la Bassa, da turnar en la quietezza dal vitg nativ? Tge din ils geniturs da la figlia che vul surpigliar il bain puril e che n’aveva da buoba nagin gust da gidar sin il funs? E cun tgi vul ella insumma realisar ses project?

Atgnamain è Arthur Casanova da Trun daventà musicist mo per casualitad: ses frar aveva survegnì da mat ina ghitarra sco regal da Nadal. Ma sunar na sunava el mai. Uschia ha Arthur adoptà la ghitarra ed ha cumenzà a sunar gia durant ses temp d’emprendissadi a Cuira.

Oz è el enconuschent en l’entira Svizra sco Arturo Casanova, ha producì gia ils onns 60 duas plattas cun chanzuns rumantschas ed ha fundà in’agentura ed ina scola da musica. Sia finamira da pudair viver da la musica ha el savì realisar.

Oz ha Arturo Casanova 77 onns, è dentant anc fitg bain en gamba e va anc adina regularmain a giugar a ballape. Grazia a sia cundiziun po el sunar anc oz 12 uras senza pausas pli grondas. Beat Manetsch ha accumpagnà el al tschaiver da Domat durant ina da quellas notgs lungas.

Ils 22 da fanadur 2021 ha Jacques Guidon festivà ses 90avel anniversari. Nus gratulain e repetin per quest’occasiun in purtret realisà avant 10 onns.

Jacques Guidon sez s’aveva titulà sco «persona non grata». Betg per nagut! Jacques Guidon s’ha engaschà durant decennis per l’ambient, per la cultura e lingua rumantscha, pia er cunter la destrucziun da sia patria, l’Engiadina. Ses engaschament è per consequenza il cumbat cunter la pussanza dals raps, finalmain cunter ils pussants sco tals. El è in spiert critic che na plascha betg a tuts. Ma Jacques Guidon ha er sia vart agreabla, quella da l’artist sensibel, dal gentilum. Il film dad Arnold Rauch mussa cunzunt quella vart da l’artist anc adina fitg activ: In um grond ed in grond um!

Dad A sco Arnold fin Z sco Zumthor – las fatschas dal Muschkito

En il Muschkito sa scuntrava ils onns 90 la crème de la crème da la Rumantschia – il trio dals Muschkitiers, Beat Manetsch, Claudia Knapp e Gieri Venzin, è vegnì cumplettà dals moderaturs sco Arnold Rauch, Bruno Cathomas u René Schnoz e da las vuschs da Maria Cadruvi ed Ernst Denoth, secundà dad experts sco Alexi Decurtins, Men Jon Schmid, Felix Giger, Chasper Pult e Peter Zumthor, inspirà da prominenza sco l’uvestg Wolfgang Haas, il vicari general Vitus Huonder u il chantadur Vico Torriani, sustegnì da persunalitads sco Flurin Spescha, Clo Duri Bezzola, Göri Klainguti, Beni Vigne, Hades, CCR, Corin Curschellas, Cla Mosca, Iso Camartin, Peider Ratti e Mariano «Dolores» Tschuor.

En la quarta ed ultima part da la seria da stad dals «Cuntrasts» dain nus anc ina giada in cuc sin il «Muschkito e sias fatschas». Dapli da lur istorgias, regurdanzas e risadas ed insumma tut la seria da stad chattais Vus en la rait: www.rtr.ch – e là chattais Vus er tut las piztgadas dal «Muschkito» dals onns 90, da quel animal che deva da discutar quella giada tant sco oz luf ed urs ensemen.

Il «Muschkito» ha piztgà senza remissiun ad ina e mintgin en la Rumantschia. El era frechira. Fertant che las inas rievan, han ils auters prendì or il mazzamustgas per far ina fin a l’insect impertinent. En quest’ediziun discurran ils trais Muschkitiers Claudia Knapp, Beat Manetsch e Gieri Venzin dal «Muschkito e da la critica». Els laschan repassar l’emprima contribuziun d’anniversari dal Muschkito, raquintan, pertge ch’ins scriva atgnamain Muschkito cun k – e laschan cuccar davos las culissas da lur concurrenzas architectonicas ch’han purtà els fin en las stivas dals cussegliers guvernativs da quella giada.