Era per il Chor svizzer da Giuvenils va l'onn plaunet encunter la fin. Els fineschan lur onn musical cun lur emprim DC da Nadal.

Il Chor svizzer da Giuvenils represchenta la Svizra sin aut nivel ed en tuttas quatter linguas naziunalas. Cun «Da Nadal notg» preschentan els ussa lur emprim disc cun chanzuns da Nadal per part schizunt cumponidas aposta per quest album. Il chor e lur manader Nicolas Fink han tschernì be chanzuns da cumponistas e cumponists svizzers. Tranter auter era duas chanzuns da Gion Antoni Derungs – ina, «Da Nadal notg», dat era il titel a l'album. Nus avain discurrì cun Nicolas Fink tranter auter davart lur emprim disc da Nadal, la selecziun da chanzuns ed era las sfidas da registrar in disc durant il temp da corona.