Il 1873 han ins cumenzà a Flem a bajegiar in hotel generus. Per Guido Casty ch'è en la suprastanza communala e responsabel per il turissem è quai il cumenzament dal turissem a Flem. Cun l'avertura da l'hotel il 1877 han ins parallel fundà l'organisaziun turistica.

L'emprima chasa, il Waldhaus, è vegnida inaugurada il 1877 en in parc da 200'000m2 cun prads e guaud enturn, aua currenta en cuschina, 120 letgs, ina resgia, posta cun stallas ed ustaria, lavandaria, uigl cun vatgas, lingia d'aua, infrastructura per far bogn en il Lag la Cauma ed ina rait cun sendas per flanar.

Enturn la sava dal tschientaner han ils responsabels gì ulteriurs gronds plans per engrondiments. Els han per quel temp gì l'idea singulara da scriver ora ina concurrenza d'architectura, di Jo Müller en la Marella. Jo Müller è stà 16 onns directur da l'hotel ed el ha perscrutà l'istorgia da quel. Gudagnà la concurrenza ha in Grischun. Il 1904 è la nova chasa cun il num Casino (oz Pavillon) vegnida averta.