Fyri fyrstu ferð í trý ár var stóri Sjómannadagurin í Klaksvík veruleiki. Hann hevur ikki verið síðani koronasmittan tók seg upp, men í ár var hann aftur.

Fyrireikararnir eru ovfarnir at so nógv fólk møttu upp. Á havnalagnum frammanfyri Gomlu Klaksvíkini var stúgvandi fult av fólki úr øllum landinum.

-Vit eru eini 15-20 mans sum skipa fyri og hava ábyrgdina á hvør sínum øki. Tað gongur so væl, at tað er næstan ikki neyðugt tosa saman. Tað virkar bara, sigur Oliver Joensen.

Hann leggur dent á, at alt á Sjómannadegnum skal vera ókeypis.