Il consum da charn è sa midà fermamain ils ultims onns en Svizra. Mangiads vegnan bleras giadas be ils megliers tocs charn. Ina gronda part da l'animal ha perquai da vegnir dismess.

Ils produdents da charn emprovan uss perquai da puspè sensibilisar ils consuments sin products indigens e definir il product charn en ina nova furma ed uschia rivar enavos tar la tenuta che blers pli vegls enconuschan anc da lur uffanza: Sch'in animal vegn gia mazzà per il consum da nus umans, lura duai quel er vegnir duvrà entir ed entratg.

Ina ch'enconuscha anc bain questa tradiziun da lur uffanza, cura ch'i vegniva fatg batgaria a chasa, è Ursulina Caviezel da Pitasch. La magistra pensiunada ha anc oz – 60 onns pli tard – en il nas la savur da quels dis spezials sin lur bain puril.

Ma er en auters pajais sco per exempel il Portugal u la Spagna è il mazzar l'animal ed al duvrar cumplettamain – dal nas a la cua – anc adina ina tradiziun che vegn pratitgada. Belandina Laudenbacher Vicente è oriunda dal Portugal. Dapi 29 onns viva ella en Svizra, entant cun sia famiglia a La Punt Chamues-ch.