Cun talas frasas salidavan ils purs da tartuffels in l'auter pli baud en Rumantschia. Savens era quai il cas avant 250 onns, damai che lura – cun la fomina dals onns 1771 enfin 1773 – han ils tartuffels conquistà las maisas en il Grischun.

Per vegnir sin ils plats dals Grischuns e da las Grischunas ha il tartuffel dentant stuì surmuntar ina via stentusa. Ina lunga via da lontan, flancada da sceptica, dolurs e fomaz. Ed era varsaquantas sfidas linguisticas ha il tartuffel stuì dumagnar.

Suenter ch'il tartuffel era dentant s'etablì sco mangiativa, è el avanzà pli e pli ad in dals aliments centrals en l'entira Europa. Ins pudess dir, in vair drama da tartuffels.

Tgi che di ussa anc ch'il tartuffel saja in legum lungurus ed antiquà, raquinta ina detga buglia! Primo n'è il tartuffel per propi gnanc in legum. Secundo datti vairamain da scuvrir numerus misteris davart ils uschenumnads patatis – uschiglio n'avessan nus strusch pudì emplenir in'entira Marella cun quel tema.

E perquai fa la Marella ina decleraziun d'amur al tartuffel cun in viadi culinaric ed istoric-cultural en il mund da la bulba mistica. Ella raquinta, pertge ch'il tartuffel è daventà uschè impurtant en l'economia e la sociocultura grischuna, pertge ch'el ha tants nums, pertge ch'el ha gì ed ha er oz anc blers inimis, pertge che cunzunt sorts veglias dal tartuffel han in agen caracter e pertge ch'il tartuffel porta ina chamischa en tschertas parts da la Rumantschia.