O Centro Sociocomunitario de Tui pon en marcha o Espazo Familiar, unha iniciativa que se centra no crecemento conxunto para bebés e familias, sempre guiado por unha pedagoga. Ela será Ana García, do propio centro, quen hoxe nos deu todos os detalles desta actividade. Serán sesións semanais, todos os luns, de 17:00 h a 18:30 h, cun prezo de 20 euros por mes.

Dentro do programa Boas Vibes este domingo o Paseo Fluvial - ou en caso de choiva o exterior do Mercado de San Antonio - acollerá obradoiros de skate para a mocidade da man de Vella Escola. Pablo Castiñeira de Vella Escola explicou en Día a Día en que van consistir ou a quen van dirixidos. Son gratuítos e é preciso inscribirse en [email protected] ou no formulario dispoñible en tui.gal. Tamén haberá exhibicións de Roller con Bomba Hache e BMX Flatland con Aarón Santos.

No Espazo Comercio hoxe coñecemos Sinerxia, un establecemento que abriu as súas portas en 2015 da man de Leticia Diz e Diego Domínguez. Hoxe Leticia Diz explicounos como a empresa xurdiu co obxectivo de unir adestramento e fisioterapia, e coma foron estes primeiro anos. Afirmaba que “a saúde é o movemento” e explicaba e convidaba a coñecer os servizos que ofertan entre os que adestramento de forza é un dos grandes descoñecidos.

A praza do Calvario do Rosal acolle dende hoxe a Festa de Outono O Pilar, con tres días de actividades centradas en poñer en valor o oficio dos cabaqueiros. Todo con música, gastronomía e historia. A alcaldesa, Ánxela Fernández, deunos os detalles.

Até este domingo está aberta a inscrición para a carreira “2 leguas da Contrasta” que se vai celebrar o próximo domingo 20 de outubro na Eurocidade Tui-Valença. Haberá distintas distancias en función da categoría e tamén unha andaina. A inscrición pode facerse en www.2leguascontrasta.pt. Coñecemos todos os detalles con André Fernandes da Asociación Deportiva Verdoejense.

O próximo martes 22 de outubro terá lugar a primeira proxección do Cine Club Tui. A cita será na aula da UNED onde cada martes ás 18 h e ás 20.45 h habera unha película.

Os socios terán unha cuota anual de 50€ e por cada proxección deberán aboar 1,5€. Para os non socios a entrada será de 3,5€

Falamos da posta en marcha do Cine Club Tui con Javier Argüelles e Minerva Ojeda, coordinadora da Aula de Tui.

Danos moi importantes os sufridos polo Club Penedo Te Importa de Caldelas no seu almacén de piraguas xa que os fortes ventos arrancaron todo o tellado, e mesmo desprazaron algunhas embarcións cara ao exterior. Marcos Fortes, presidente do Penedo, explicaba hoxe a situación que teñen que afrontar para reparar os graves danos.

Co contacontos inclusivo en lingua de signos "A Maleta" con ContAZ mañá venres ás 17.30 h comeza a programación do Mes da Biblioteca. Hoxe falamos das actividades que se van celebrar até finais de mes coa concelleira de Cultura, Ensino e Mocidade do concello de Tui, Sonsoles Vicente.

“Gobernanza e liderato educativo” é o título do Seminario Galicia-Portugal que hoxe mércores e mañá xoves se vai celebrar na Eurocidade Tui-Valença. Coñecemos os obxectivos, os temas que están sobre as mesas de diálogo con Ana Paula Laborinho, diretora da Organización de Estados Ibero-americanos para a Educación, a Ciencia e a Cultura.

“Iribarne” é a obra que este venres, ás 21 h chega ao Teatro Municipal de Tui con Butacazero. Trátase dunha peza humorística e satírica que percorre a historia recente de España e Galicia da man da personaxe protagonista que é o alter ego de Fraga Iribarne. Así nolo contou esta mañá Esther F. Carrodeguas, actríz e dramaturga.