Novo recoñecemento para o CEIP nº2 de Tui nun curso especial xa que celebra o seu 50 aniversario. O Ministerio de Educación, Formación Profesional y Deportes outorgoulle o distintivo de calidade de centros docentes “Sello Vida Saludable 2024”. Falamos do mesmo con Ramiro García Entenza, director CEIP nº2.

Máis de 800 racións teñen previsto servir esta fin de semana na 31ª Romaría do Polbo en Baldráns que se celebra este sábado. O alcalde de Tui, Enrique Cabaleiro, dará o pregón das festas do Santo Cristo da Agonía que se celebrarán até luns, e nas que actuarán a Banda de Gaitas A Insua de Caldelas e a Banda de Música Popular de Tui. Tamén contará co trío Salero, o grupo Ritmo, as orquestras La Fórmula e Solara e os dj Anxo Silva e Gabri Alonso. O domingo contarán con pantalla para ver o partido de España na final da Eurocopa.

Proseguimos as conversas cos representantes dos grupos políticos da corporación con Nicolas Lorenzo Montes, voceiro do PP de Tui, valorando o pleno do xuño cos orzamentos e a resolución do contrato do aparcamento. Tamén deu conta que hoxe terán reunión co equipo de goberno para negociar sobre as contas deste ano. Por outra parte valorou o primeiro ano do actual mandato, e lle preguntamos polo seu novo cargo de director territorial da Conselleira de Medio Ambiente, do que tomou posesión o martes.

Dende mañá xoves até o domingo celébrase nos xardíns de Elduayen en Vigo a quinta edición do Vigo Sea Fest. Un evento que ten coma obxectivo dar visibilidade e incrementar o consumo de peixe. A gastronomía, da man de prestixiosos cociñeiros será protagonista pero o programa abrangue un amplo conxunto de actividades nas que non falta nin a música nin o deporte.

Falamos con Javier Touza, presidente de ARVI, a Cooperativa de Armadores de Vigo, que organiza este evento.

Volven As Noite Máxicas coa Fada do Aloia. A primeira das citas será este venres ás 22 h para subir até o cumio do Aloia, coñecer a fauna nocturna e as lendas. As persoas participantes poderán observar as constelacións, planetas e a lúa da man de Antón Paz, guía Starlight e Divulgador Astronómico. A duración prevista é de 2 horas. O prezo é de 10€ nenos e 14 € persoas adultas. É preciso inscribirse no 619 96 90 90.

Esta fin de semana celébrase en Tui o IV Festival da Cultura Tradicional e Folk. O sábado a partir das 20 h na praza de San Fernando terá lugar o IX Certame de Gaita e Tamboril, e logo unha mostra conferencia do traxe galego a cargo do grupo etnográfico Traxandaina, e pechando a noite concerto do grupo folk Ardentía. O domingo ás 19.30 h celebrarase na Corredoira o IX Día da Muiñera. Así nolo contaron Conchi Sales, Ana Pedreira e Fernando Carnero da Asociación Cultural San Telmo organizadora do evento.

Hoxe fixemos balance con Carmen Núñez do BNG do pleno extraordinario urxente celebrado o pasado 21 de xuño en Tui con dous asuntos destacados os orzamentos e a resolución do contrato de aparcamento. Confirmou que tras esa sesión plenaria hai reunión co equipo de goberno para chegar a un acordo sobre as contas municipais para este ano. Tamén fixo balance do primeiro ano de mandato desta corporación.

Dende este venres até o domingo celébrase na praza do Calvario no Rosal a 32ª Feira do Viño do Rosal. Un evento que comezará xa o venres ás 13 h coa inauguración e pregón a cargo de Fernando Gurucharri, antigo presidente da Unión Española de Catadores. A feira amplía así as horas de duración e tamén o número de actividades.

A alcaldesa do Rosal, Ánxela Fernández, destacaba a importancia da feira e tamén do viño no municipio.

Abrimos hoxe con José Palacín de C21 a rolda de conversas tras o último pleno da corporación celebrado con carácter extraordinario e urxente e no que se trataron dous temas destacados os orzamentos deste ano e a resolución do contrato do aparcamento subterráneo. Tamén lle preguntabamos polo balance do primeiro ano da actual corporación.

O pavillón Gustavo Rodríguez de Tui acolle este domingo, dende ás 10.30 h, o X Campionato Ibérico de Kung Fu Tradicional e Moderno. Coñecemos todos os detalles con Eduardo Méndez Sanjurjo, do Di Som e organizador do evento, e co deportista Miguel Santos.