A Guarda celebra dende hoxe até o domingo a XXXII Festa da Lagosta e da Cociña Mariñeira. A gastronomía maridará coas actividades previstas nun programa que abrirá hoxe o pregón de Luís Zahera. Falamos da festa con Roberto Carrero.

Hoxe venres e mañá sábado celébrase no torreiro de festas de Guillarei o Guillafolk, Festival Folk. Hoxe celebrarán o festival folclórico e mañá o festival de bandas, pero tamén haberá outras actividades.

Así nolo contaron hoxe Óscar Cabaleiro, e Alicia González da Asociación Cultural Lembranzas da Terra e Gregorio Díaz Veiga do grupo Erasmo Hernández de Gran Canaria que participará hoxe no festival folclórico.

A Asociación Cultural Pintor Antonio Fernández de Goián, co respaldo do concello de Tomiño, organiza unha exposición colectiva que se pode visitar até o próximo luns 8 de xullo, no Espazo Cultura no Mercado de Goián. Na mesma reúnen a obra de dez escultores que tiveron algún tipo contacto, directo ou indirecto, con Antonio Fernández. Falounos da mostra Mané Villa, quen indicou que teñen amais á venda cadros pintados por Antonio Fernández e por Xabier Pousa.

Hoxe coñecemos todos os detalles da Semana Cultural de Ribadelouro, que organiza a Asociación Cultural Santa Columba do 7 ao 20 deste mes.

Para iso no programa Día a Día acompañáronos Mar Rodríguez e Auri Rodríguez que nos explicaron a programación prevista.

Este domingo, primeiro domingo de xullo, celébrase no cumio do Monte Aloia a Romaría das Angustias. É a segunda das romarías que se celebran no Aloia xunto á de San Xulián que ten lugar o 27 de xaneiro. Ás 10 h haberá a primeira misa, e ás 12 h a solemne con procesión, e non faltarán as poxas.

Falamos da romaría con Sebastián Gómez, Sebastián do Monte Aloia,

O Concurso de Patrullas da Brilat reforza o seu carácter internacional coa participación de 5 patrullas estranxeiras, de EEUU, Inglaterra e Portugal, entre as 33 inscritas. A saída será este mércores ás 9 h dende o Paseo da Corredoira e as patrullas terán que percorrer os 120 kms do percorrido até Santiago, pero amais facer distintas probas cronometradas, orientación, cruzar un río a nado,...

A ribeira de Caldelas acolle este sábado, dende ás 11 h, a III Concentración de Coches de Rallie, vehículos clásicos, alta gama e racing. Amais haberá exhibición de coches 4x4 e coches RC. Non faltará a gastronomía e ás 21 h o concerto de No All Kansas. José Álvarez da Asociación A Insua de Caldelas,organizadora do evento, deunos todos os detalles.

Este venres ás 17 h nas instalacións da Escola da Banda de Música Popular de Tui a escola ofrecerá un concerto didáctico, así nolo contou hoxe Eloy Carrera, director da Banda de Música.

Por outra parte esta semana remata o prazo para votar no concurso para elixir o cartel anunciador do Festival de Bandas de Música que se vai celebrar en agosto. Presentáronse 18 traballos que estes días se pode ver no anexo da Sala Municipal no edificio Francisco Sánchez.

Pilotos de todo Portugal e España daranse cita mañá e o domingo na Rampa do Monte Faro en Valença que repitirá amais a especial nocturna. En total nas distintas categoría participarán 300 coches. A proba forma parte do calendario deportivo da Eurocidade Tui-VAlença. Deunos todos os detalles Nuno Coimbra.

Mañá ás 19.30 h no pavillón de Goián acollerá unha Velada de Boxeo no que participarán clubs de toda a zona. Haberá 8 combates de boxeo amateur, 2 combates de boxeo neoprofesional, e un combate de boxeo profesional a 6 asaltos. Así nolo contou hoxe Charly López de Spartam Team.