A Asociación Asistencial SOS Tomiño Baixo Miño celebra este domingo o seu Xantar Solidario 2024, un acto público aberto a todo aquel que desexe participar.

Será en Torroña, en Oia. Un xantar no que amosarán o seu agradecemento a todas as persoas voluntarias que colaboran con SOS Tomiño Baixo Miño, e aos colaboradores, e tamén dar a coñecer o traballo que realizan.

O prezo de cada invitación é de 25 euros. A infantil é de 15 euros. Tamén teñen á venda rifas ao prezo de 5€ para o sorteo dun xantar na Tapería La De Manu, en Tui e unha sesión no Balneario de Caldelas.

As persoas interesadas poden contacatar cos teléfono 655 60 79 35 ou 654 147 310 ou a través da web https://www.sostomino.org/

Rosa Mari Pérez, veciña de Caldelas, marchou con 18 anos a traballar a Suíza. Ía con contrato de traballo de 2 anos, e neste 2024 cumpre 40 anos naquel país. Con motivo deste aniversario decidiu realizar o Camiño de Santiago dende Suíza a Santiago. En solitario cruzou os Alpes e Francia, acumulando moitas anéctodas e vivencias, e a partir de aí coincidiu xa con outros peregrinos. Ao longo do seu percorrido ten recibido moitas mensaxes de apoio por distintos medios. Esta semana completou o seu Camiño ao chegar a Compostela.

Fomentar as compras no comercio local é o obxectivo da campaña Días Azuis que pon en marcha a Federación Galega de Comercio e a Xunta de Galicia . O presidente de ACITUI, Iván Carral explicaba que o comercio de Tui e a súa clientela pode participar na campaña até o 30 deste mes. Sortearanse tarxetas prepago regalo de 250 euros e de150 euros.

Con motivo do Día Mundial do Medio Ambiente tivemos un programa especial na nosa sintonía no que nos acompañaron Sara Luque e Ramón Nogueira, xunto a distintos convidados.

Hoxe proseguimos a rolda de conversas para valorar o pleno ordinario de maio no que os grupos da oposición rexeitaron os orzamentos presentados polo goberno municipal para este ano. Esta mañá acompañounos o voceiro do PP, Nico Montes.

A preocupación pola nosa contorna natural leva a un veciño de Tui, Sebastián Gómez, coñecido coma Sebastián do Monte Aloia, a encabezar unha recollida de lixo por distintos espazos naturais en todas as parroquias tudenses. Na nosa sintonía Sebastián facía un chamamento a sumarse a esta iniciativa.

As persoas interesadas poden contactar con el no 634 645 816.

Destacaba coma hai uns días o grupo Scouts Alhoia realizou unha recollida de lixo dende A Mariña até Areeiros.

Cando se cumpren 25 anos do Monumento aos Represaliados da Alameda de San Domingos a Comisión pola Memoria Histórica do Baixo Miño, Condado e Louriña organiza dous actos conmemoativos. O primeiro será este sábado coa inauguración dunha exposición na Sala Municipal en Tui e o segundo un acto na Alameda de San Domingos o sábado 29 deste mes. Así nolo contaron Ramón Fernández Leal, membro da Comisión, e Cuqui Piñeiro, comisaria da mostra.

No pleno ordinario de maio os tres grupos da oposición rexeitaron os orzamentos de 2024 presentado polo grupo de goberno de Tui. Hoxe valoramos este pleno coa voceira do BNG, Carmen Núñez.

O Teatro Municipal de Tui acolle este venres, 14 de xuño, ás 19.30 h o III Festival de Cancións en Lingua de Signos organizado polo Centro Anarela. Faise coincidir co Día Nacional das Linguas de Signos

Iria Márquez, intérprete de lingua de signos explicaba os obxectivos e como vai ser.

O CB Tui é xa un equipo de 1ª División. O sábado impúxose nun emocionante partido ao Celtas de Foz o que lle valeu o pase a final e o ascenso. O público ateigou o pavillón tanto o sábado coma onte domingo animando ao equipo.

Fixemos balance deste logro con Javier Niño, coordinador técnico do CB Tui.