Eduardo Méndez Sanjurjo vén de lograr o máximo recoñecemento a nivel europeo en kung fu, o grao de cinturón vermello-negro 9º nivel; e Julio Conde Montero conseguiu o cinturón negro-vermello 8º nivel. Ambos deportistas do Club de Kung Fu Disom Tui.

Con ambos conversamos esta mañá sobre este fito deportivo, as súas vidas ligadas a este deporte e sobre os próximos obxectivos.

"Actualización vital: recupera o teu poder e entusiasmo" é o taller que impartirá Rossana Fossatti. especialista en PsicoAstroloxía e maestra de Ioga, no Liceo Casino de Tui.

Será en horario de 11 h a 13.30 h os sábados 28 de febreiro, 7 e 14 de marzo. Toda a información e a inscrición pode realizarse no Liceo Casino de Tui.

Coñecemos máis detalles hoxe con Rossana Fossatti.

Arestora está aberto o prazo de presentación de propostas para executar as obras de rehabilitación integral do edificio da antiga alfándega na Avenida de Portugal. A Cámara de Comercio de Tui investirá nesta actuación case 1,7 millóns de euros. Así o explicaba o seu presidente Antón Fonseca quen agarda que estea rematado en xullo de 2027. No mesmo, tras as obras, ubicarase a sede da Cámara de Comercio e o Viveiro 4.0 Miño Dixital.

Mañá venres ás 19 h o Teatro Municipal acolle "O arcón de Noa", un espectáculo de danza e comedia para público familiar, que presenta a compañía Amarelo.

As entradas están á venda en tui.gal aos prezos de 4€ e 3€.

Hoxe deu os detalles deste espectáculo o codirector e actor Martín Blanco.

A Guarda celebra este venres 20 os seus dous desfiles de Entroido, e o sábado a cita será cunha festa dj a partir das 22 h.

Deu hoxe os detalles do Entroido 2026 o alcalde da Guarda, Roberto Carrero.

Nesta semana de Entroido centramos o programa Raíces e vangarda en doces desta data. Hoxe o chef Judicael Romero deu a receita das filloas, chulas de cabaza e orellas.

Máis de 3.000 persoas participan cada ano nos desfiles de Entroido que acolle Salceda de Caselas. O enfrontamento centenario entre os barrios da Feira e Castro Barreiro é un dos elementos diferenciadores desta festa, así como o rancho e os cabaleiros.

Hoxe coñecemos toda a programación deste 2026 coa alcaldesa, Loli Castiñeira; co concelleiro de Cultura, Alex Rodríguez; co representante do barrio da Feira, Marcos Troncoso; e do Castro Barreiro, Daniel Rodríguez.

O Concello do Rosal apraza para o domingo 1 de marzo o seu Desfile-concurso de Entroido, debido á previsión de choiva para este domingo 15. Así o confirmaba hoxe a alcaldesa do Rosal, Ánxela Fernández.

Destacaba a rexedora os entroidos tradicionais de Novás e Fornelos. E precisamente con Manolo Arman da Comisión de Festas de Novás coñecemos a programación prevista que comeza coa subida do maio. Nos dous barrios luns e martes non faltarán as corridas do galo e as frixidelas.

Hoxe non foi posible falar coa comisión de Festas de Fornelos.

Tui celebrará o próximo martes 17 o seu desfile concurso de Entroido con preto de 1000 persoas participantes de 12 comparsas. A principal novidade será o cambio de percorrido que partirá do Espazo Feiral para percorrer as rúas Mártires de Sobredo, Casal Aboy e o primeiro tramo da rúa Compostela.

Sonsoles Vicente, concelleira de Cultura, deu hoxe todos os detalles desta cita festiva.

O Camiño Portugués a Santiago protagoniza o libro “Vamos a Santiago” do escritor portugués Luís Ferreira, que mañá ás 20 h se vai presentar no Espazo Sociocultural da rúa Camilo José Cela.

O acto será presentado polo peregrino tudense e divulgador do Camiño, Alfonso Ferreira.

Hoxe coñecemos máis deste libro co seu autor, Luís Ferreira, e con Alfonso Ferreira.