Esta fin de semana celébrase en Tui o VI Festival da Cultura Tradicional e Folk. Este venres 3 dará comezo coa apertura da exposición “Abrindo as huchas da bisbarra de Tui” no Espazo Sociocultural da rúa Camilo José Cela, ás 20 h, con posterior concerto de Luís Prego. O sábado na praza de San Fernando terá lugar o XI Certame de Gaita e Tamboril, e concerto 'Xisco sinfónico' e o domingo ás 20 h celebrarase na Corredoira o XI Día da Muiñera.

Así nolo contaron Conchi Sales e Fernando Carnero da Asociación Cultural San Telmo; Luís Prego e Xisco Feijoó.

ACITUI presentou hoxe na nosa sintonía a súa nova campaña baixo o nome “Mergúllate no noso comercio”.

Pepe Míguez, o presidente da asociación, explicou que a campaña comeza hoxe martes e se prolongará até o día 16 de xullo.

Manu Garrido, padeeiro do Club Kaiak Tudense, conseguiu a medalla de bronce en C2 senior xunto a Jaime Duro no Campionato de Europa. Con este bronce se fixeron co pase para o Mundial, que se desputará en Arxentina no mes de outubro.

Hoxe Manu Garrido deu conta de como foi o europeo.

Música, cultura tradicional, cinema e gastronomía centran a programación cultural para o verán organizada polo Concello de Tui, que comezará esta fin de semana co VI Festival da Cultura Tradicional e Folk e con cinema no conxunto histórico de Tui.

A concelleira de Cultura, Sonsoles Vicente, deu conta da programación que vai ter lugar durante os meses de verán no municipio.

Hoxe na sección Raíces e vangarda falamos de historia, receitas tradicionais e modernidade.

Cociñamos arepas venezolanas, unha receita do chef Judicael Romero.

O altar relicario da capela das Reliquias da Catedral de Tui foi a fonte de inspiración para a instalación artísticas do tudense Carlos Fer que hoxe ás 19 h será inaugurada na Catedral baixo o título precisamente de “Relicario”. Así o explicaba o propio Carlos Fer.

Esta instalación forma parte do programa conmemorativo do 800 aniversario da consagración da Catedral de Tui, xoga tamén coa luz do propio templo.

Mañá sábado dispútase en augas do río Miño en Tui o Campionato de España de Motonáutica de embarcacións T-850, GT-60 e GT15.

Ás 8.30 h comezarán as verificacións, e a partir das 9.30 h terán lugar os adestramentos. A primeira manga disputarase á 13 h, a segunda ás 15 h, a terceira ás 17 h e a cuarta ás 19 h. A entrega de premios está prevista ás 20 h.

Carlos Estévez, tesoureiro da Federación Galega de Motonáutica explicou hoxe na nosa sintonía como transcorrerá a competición. Este ano, o tudense Alberto Estévez, de 14 anos, competirá en 4 probas do campionato de España, mañá en Tui. Farao en GT15.

Este domingo ás 10.30 h celébrase no pavillón Gustavo Rodríguez de Tui o XII Encontro Ibérico Kung Fu Eurocidade, no que participarán máis de 340 deportistas.

Unha cita destacada no calendario deportivo da Eurocidade, tal e coma hoxe destacaron Eduardo Jorge Méndez, director do comité organizador; e Miguel Santos, deportista.

O bailarín tudense Ángel Giráldez leva dende hai un ano sendo solista no Ballet Nacional de Letonia. Estes días está en Tui, e dende o próximo luns 29 de xuño impartirá un curso na escola que o viu medrar, a Escola de Danza Paula Cobián.

Hoxe venres remata o prazo de inscrición para este curso.

Conversamos con el sobre a súa carreira, e comentaba que hoxe venres e mañá participará na función "Os segredos da pedra".

Tripla efeméride, os 800 anos da consagración da Catedral de Tui os 900 anos da morte da raíña Dona Urraca, e o 140 anos da vella Ponte Internacional, foron a fonte de inspiración para o espectáculo “Os segredos da Pedra” que a Escola de Danza Paula Cobián presenta este venres e sábado no Teatro Municipal de Tui. É a súa función de fin de curso na que o alumnado amais de amosar todo o aprendido nos últimos meses coñece tamén como é levar a cabo a posta en escena como se fosen unha compañía profesioal.

Mañá venres a función será para as familias do alumnado, e xa o sábado ás 21 h para todas aquelas persoas que desexen asistir, tendo en conta que a entrada se deberá retirar o sábado dende ás 20 h de balde no despacho de billetes do teatro.