Dúas novas actividades vanse a desenvolver no Liceo Casino de Tui. Os martes de 20.15 a 21.15 horas terá lugar un taller de escritura e os mércores de 17.00 a 18.00 horas desenvolverase un taller de defensa persoal feminina. Ambos a cargo do vigués Samuel Ferro, escritor e experto en artes marciais.

Con el conversamos hoxe sobre estas dúas actividades para as que se pode realizar a inscrición en persoa no Casino ou ben a través da súa páxina web.

A pasada fin de semana celebrouse a décima edición do concurso de pintura Pinta Tui cun récord de participación con 64 persoas.

Hoxe Ana Núñez, concelleira de Turismo, Patrimonio e Comercio, e José Díez, de Artes Creativas Efectos, fixeron balance desta actividade, xa consolidada no municipio.

A concelleira do Conxunto Histórico e Patrimonio, Ana Núñez, respondeu hoxe as reivindicacións da veciñanza do conxunto histórico de Tui. Ana Núñez indicaba que entende a súa preocupación e comparte o desexo de ver un conxunto histórico rehabilitado e cheo de vida.

Ana Núñez precisaba que o deterioro desta zona da cidade vén de moitos anos atrás, e apuntaba que a imaxe de abandono absoluto desta zona da cidade non é a realidade.

Unha proposta teatral e musical para bebés é a que chega mañá venres ao Teatro Municipal de Tui da man de Davide González e Iria Pinheiro.

Será un menú musical denominado “Pitiminí”, para público familiar no que haberá tamén interacción co público. Así nolo contaba Iria Pinheiro.

A cita será mañá venres no Teatro Municipal con dúas funcións ás 17.30 h e ás 19 h. As entradas aos prezos de 4€ e 3€ están á venda en tui.gal.

No ano 1965 Oswaldo Fernández formou o equipo Arenas de Tui, que tivo que disolverse despois de que o seu creador marchase a Alemaña. Agora, hai cinco anos retomaron a súa actividade e todos os martes, ás 22.30 h, adestran no Álvarez Durán. A súa paixón e ilusión polo fútbol levou a este grupo de vinte persoas maiores de 60 anos a xogar en Alemaña e proximamente en Tenerife.

Así nolo contaron hoxe Gonzalo Romero e Oswaldo Fernández, do Arenas de Tui.

ACITUI celebra este venres un "truco ou trato" para nenos e nenas por establecementos de Tui. Serán 35 os locais que repartirán con caramelos a partir das 17 h.

O presidente de ACITUI, Pepe Míguez, deu hoxe os detalles desta iniciativa, que ten como obxectivo dar a coñecer os produtos e servizos que a veciñanza ten á súa disposición.

As rúas do conxunto histórico de Tui transformáronse estes días nunha acción reivindicativa por parte da veciñanza para esixir medidas urxentes que garantan, entre outras, a súa seguridade física.

Ao redor de 100 veciños e veciñas decidiron unir forzas co obxectivo de que o Concello traballe en temas que consideran prioritarios, comezando polos cimentos. Jorge Amoedo e Joel Castro, veciños do conxunto histórico de Tui deron conta das súas esixencias e de como xurdiu a idea de decorar as rúas con estes motivos de Samaín.

O director xeral de Comercio e Consumo, Gabriel Alén, visitou esta mañá o local de Abalorios MyR, na rúa Compostela, un dos establecementos adheridos ao proxecto piloto de reclamación dixital en materia de consumo a través de QR.

Unha iniciativa da que os establecementos tudenses poden coñecer todos os detalles en ACITUI. Así nolo contaron hoxe Gabriel Alén, director xeral de Comercio e Consumo e Lucía Nogueira, vicepresidenta de ACITUI.

A escritora, xornalista e política María Xosé Porteiro será a protagonista do evento De Pioneiras e Andainas que organiza o Consello de Cultura Galega. Esta xornada celebrarase este xoves, dende ás 9.45 h, en Santiago de Compostela, baixo o título "María Xosé Porteiro: Activista das palabras".

Hoxe conversamos con María Xosé Porteiro sobre este evento, sobre os teitos a bater como muller e xornalista e sobre o poder das palabras.

O Cineclub Tui cumpre un ano e faino coa súa retrospectiva dedicada ao cineasta alemán Wim Wenders. A cita será mañá coa proxección de "Os irmáns Skladanowsky" no Espazo Sociocultural da rúa Camilo José Cela, con sesións ás 18.30 h e 20.45 h. Conversamos sobre este filme con Noemí Guisande, do Cineclub Tui.

A entrada é gratuita para persoas socias e menores de 18 anos e de 3 euros para público xeral.