Este domingo 29 ás 12 h a empresa Altitude organiza unha actividade de orientación no Monte Aloia. As persoas participantes aprenderán a orientarse empregando mapas e brúxulas, todo a través do xogo.

A inscrición pode realizarse nas redes sociais de Altitude ou no teléfono 613 23 93 09.

Deu máis detalles hoxe Claudia Montes, de Altitude.

Este domingo comezan os actos da Semana Santa en Tui. Será ás 18 h na capela das Reliquias co pregón a cargo de Eva Gonzalez, xornalista, durantes tres décadas corresponsal de Faro de Vigo en Tui e Baixo Miño.

Hoxe conversamos con ela sobre o pregón, a súa vida profesional e sobre o patrimonio tudense.

"Isla de los volcanes" é o traballo que hoxe venres ás 20.30 h presenta Cristopher Pérez Quartet no Teatro Municipal de Tui, nun concerto enmarcado na programación conmemorativa do 800 aniversario da consagración da Catedral de Tui.

Este cuarteto foi o gañador do Concurso Nacional Juventudes Musicales de España en 2024.

Hoxe coñecemos detalles deste concerto con dous integrantes do grupo: Cristopher Pérez e David Muñoz.

A Escola Unitaria da Gándara, na Guarda, está en risco de non poder continuar coa súa actividade lectiva o próximo curso. Precisa novas matrículas xa que, dos 12 nenos e nenas de 3 a 6 anos que actualmente hai na escola, 9 pasarán a Primaria o próximo curso cambiando de centro.

Neli Rodríguez é unha das nais afectadas. Hoxe explicou na nosa sintonía que características ten esta escola unitaria, a renovación das súas instalacións e a situación á que se enfrontan.

Mañá 21 de marzo conmemórase o Día Internacional da Eliminación da Discriminación Racial. Con este motivo, hoxe conversamos sobre a discriminación e os sesgos que existen coas persoas migrantes no momento en que buscan unha vivenda digna.

Coñecemos esta realidade con Iria Leirós, coordinadora do Programa de Protección Internacional de Diversidades Acolle; e con Carlos Otero, educador deste programa.

Este venres, sábado e domingo celébrase en São Pedro da Torre, en Valença, o Festival Gastronómico Sabores da Lampreia do Rio Minho. Unha cita que comeza ás 12 h ES o venres 20 e se estende até o xantar do domingo.

Coñecemos a programación e novidades con Nuno Ferreira, presidente de Carochos - Asociación dos Sabores do Rio Minho.

Alumnado do CEIP Plurilingüe Nº1 de Tui realizará este venres unha nova edición da reforestación poética no monte de Areas. Plantarán árbores autóctonas, visitarán as instalacións de Equigalia e cantarán "Cos pés na terra", de Paco Nogueiras.

Coñecemos esta iniciativa con Hugo, Iria, Eric e Alex, alumnado do CEIP Plurilingüe Nº1.

Coñecemos hoxe a situación actual do centro de saúde de Tui. Unha baixa e unha xubilación máis. Agora mesmo hai 3.000 persoas sen médico ou médica, e máis de 1.000 que teñen atención só os luns, martes e mércores.

Ademais, dende o día 1 de marzo está convocada en Galicia unha folga indefinida en atención primaria; e durante esta semana hai outra a nivel estatal, pedindo un estatuto marco propio para os médicos e médicas.

Coñecemos toda esta información con Conchi Martínez, da Plataforma en Defensa da Sanidade Pública de Tui, quen tamén lembrou que hai unha nova actualización da aplicación móbil do Sergas.

"Vacacións en paz" é un programa de acollida temporal de nenos e nenas saharauís durante os meses de xullo e agosto, promovido polo goberno da República Árabe Saharauí Democrática e xestionado pola Asociación Galega de Solidariedade co Pobo Saharauí.

Co obxectivo de recadar fondos para esta iniciativa, o grupo de Teatro Xoaniña 2.0 vai a presentar a obra "Maribel e a extraña familia" o sábado 21 no auditorio de Goián con entradas a 5 euros. O recadado irá destinado a "Vacacións en paz".

Así nolo contaron hoxe Julio Solleiro, da Asociación Galega de Solidariedade co Pobo Saharauí; Diego Toucedo, director da obra; e Coco Estévez, integrante do grupo de teatro.

Este venres continúa a ruta gastronómica impulsada por ACITUI, Tú-y D'Tapas.

Hoxe no tempo do Espazo Comercio coñecemos cales son as tapas que ofertan dous dos 18 establecementos participantes con Sonia Castiñeira, de Ideas Peregrinas; e Patricia Mota, da Cafetaría El Pilar.