A BRILAT encargarse dende mañá da vixilancia de vella Ponte Internacional Tui-Valença pechada estes días tanto ao trásito peonil coma de vehículos. Estarán aloxados no Centro Interfederado. Así o informaba hoxe o alcalde de Tui, Enrique Cabaleiro.

Tamén daba conta de que o Concello de Tui habilitou nun albergue privado prazas para transeúntes.

Grazas a tecnoloxía, o adestramento caseiro é máis doado e a improvisación, a mellor alternativa neste tempo de confinamento domiciliario. Nolo explicaba o triatleta tudense, Gustavo Rodríguez que realiza varios exercicios de forza para manter un bo rendemento físico durante a corentena.

Con tranquilidade continua a situación en Valença onde polo momento non teñen rexistrado máis positivos por Coronavirus, segundo explicaba o presidente da Cámara, Manuel Lopes. Situación que contrasta coa situación que se vive noutros puntos do norte de Portugal con moitos casos rexistrados.

Nos próximos días en Valença comezará a funcionar o Drive Thru, o centro de realización de test do COVID 19 dende o propio coche.

Na Guarda a medida que pasan os días, aumenta a experiencia na xestión desta crise e todo está maís coordinado. Así o expliacba o alcalde, Antonio Lomba. Incidía o rexedor en que dende o Concello está a dispor daquelas persoas que nestes momentos poidan precisar axuda.

Onte na Comisión de Seguimento informaron que porán a dispor dos traballadores un servizo de axuda psicolóxica. E na praza de abastos hai un servizo de encarga e recollida da compra.

Os veciños e veciñas de Tomiño que se encontren nalgunha situación de vulnerabilidade ou risco debido a crise do coronarivus, pode solicitar axuda ao Concello no 986 62 32 11. Mentres, a BRILAT presta servizo ao municipio controlando o peche de fronteiras entre Tomiño e Vila Nova de Cerveira. Información que destacou a alcaldesa, Sandra González.

O Concello do Rosal presta axuda ás persoas que se atopan nalgunha situación de vulnerabilidade ou risco, como consecuencia do estado de alerta sanitaria, no teléfono 986 62 50 00. Así o lembrou a alcadesa, Ánxela Fernández na nosa sintonía. Indicou tamén que as taxas e os impostos municipais están suspendidos até o remate do estado de alarma no país.

O Concello de Tui vai contratar unha terceira traballadora social. O alcalde de Tui, Enrique Cabaleiro, así o anunciaba esta mañá ao tempo que lembrar que aquelas persoas que estean a pasar por unha situación difícil poden contactar cos Servizos Sociais. Facía un chamamento á cidadanía a depositar o lixo dentro dos contedores, e tamén a facer un uso responsable da internet nas mañás cando hai moitas persoas en teletraballo os alumnado seguindo as tarefas escolares.

O confinamento nas casas lévase mellor entre balcóns. Por iso, os veciños e veciñas tudenses das rúas Maristas, Foxo e Plaza de Galicia organizan quedadas nos balcóns para bailar, cantar e aplaudir para apoiar e sobrelevar esta época de crise sanitaria.

En Salceda explicaba a alcaldesa, Loli Castiñeira, as medidas adoptadas no Concello tras o novo decreto do goberno.

Por outra parte indicaba Loli Castiñeira que a veciñanza, salvo excepcións, está a cumprir coas medidas de confinamento.

Sen novidades no concello de Oia nos últimos días. Dende hoxe forestais e persoal de medio ambiente comezarán a vixiar os camiños do municipios segundo explicaba a alcaldesa Cristina Correa.

En Oia na casa do concello continúa o persoal de servizos sociais e a propia alcaldesa, e nas rúas proseguen os labores de desinfección.