Día a Día

Neste 17 de maio na Radio Municipal de Tui fixemos un programa especial co gallo do Día das Letras Galegas.

Achégamonos á XXII Feira do Libro Galego no Paseo da Corredoira en Tui. Falamos co Concelleiro de Cultura, Eduardo Freiría, coa escritora Iria Misa, que leu o pregón deste ano, con Pili Fernández da Librería Iris e con Javier Oliveira de Espazo Lector Nobel.

Coñecemos a figura de Antón Fraguas, e tamén como se celebra este día na comarca. E falamos con Nel Barral, profesor, da iniciativa realizada non IES de Oleiros.

O próximo venres, 24 de maio, precisamente un día despois de cumprirse un ano da explosión de Paramos, vaise celebrar en Tui a Gala benéfica “En pé Paramos” na discoteca Anubis. Serán máis de 3 horas de música, humor e sorpresas co fin de recadar fondos para os afectados pola traxedia.

Este fin de semana celébrase a décimo oitava edición da Romaría do Cabalo da peña cabalar Valle del Louro

Dará comezo o venres ás 21.30h cunha cea e gincana con premios para os gañadores. A partir das 12 haberá música coa actuación dun DJ. A fin de semana serán os pratos fortes da cita, que comeza o sábado co RAid e pola tarde ruta cabalar, pola noite haberá un espectáculo de Miron Bococi e actuación da orquestra talismán.

O domingo comeza a xornada ás 10.00h co concurso de enganches pola mañá e a final ás 16.30h. Pola tarde haberá carreira de ponys e a exhibición de burros.

42 escaravellos de Galicia e Portugal participarán esta fin de semana no I Encontro Volkswagen Ibérico Tui- Valença. O sábado será en Tui, cunha programación que arranca ás 16.00h coa recepción dos vehículos Volkswagen escaravello, depois subirán o Monte Aloia e a partir das 20.00h volverán a Tui.

O domingo o evento transcorrerá en Valença, a partir das 10.00h (HP) coa visita pola muralla, ás 11.15 será a saída cara o Miradoiro do monte do Faro e remataran cunha comida na Quinta do Prazo de Valença.

Completamos a rolda de conversas cos membros das seis candidaturas que concorren ás eleccións municipais en Tui con Jorge Lima, nº2 do Partido Popular. Os temas que tratou foron Cultura e Deporte, Turismo, Servizos Sociais, Patrimonio Cultural e Natural e Eurocidade.

Este venres, ás 19 h, preséntase na cantina do Centro Goianés o libro “Historia da navegación de cabotaxe no río Miño” do tudense Ernesto Iglesias Almeida. O acto está organizado pola Asociación Cultural Pintor Antonio Fernández, dentro da iniciativa que levan a cabo cada ano de publicar un libro co gallo do Día das Letras Galegas. Falounos desta publicación Mané Villa, presidente da Asociación Cultural Pintor Antonio Fernández

A tudense María Cabaleiro, Andrés Cordeiro e Paula Estévez, xunto Hugo Fernández, forman a empresa Micogalicia Plantae SL asociada á Universidade de Vigo. Hoxe presentáronnos no programa Día a Día o libro coloreable “A miña primeira guía micolóxica: macrofungos micorrícicos”. Tamén nos explicaron a campaña de crowfunding que teñen en marcha para poder editar tres libros máis que completan a colección, cogomelos saprotróficos, domesticados e parasitos

Yolanda Rodríguez, a nº2 da lista do Partido Socialista en Tui foi entrevistada hoxe no programa Día a Día dentro da programación especial co gallo das eleccións do 26M. Os temas que abordou foron Cultura e Deporte; Turismo; Servizos Sociais e Emprego e Vivenda.

Patrimonio Cultural e Natural

No tempo de entrevistas co gallo das eleccións do 26M hoxe falamos con José Manuel Palacín, nº3 de Converxencia 21 en Tui. Os temas abordados foron Cultura e Deportes; Servizos Sociais; Emprego e Vivenda; Principais problemas de Tui e solución aportada e no caso de non haber maioría absoluta cal sería súa postura ou dispoñibilidade para formar goberno.

Paula Álvarez, nº2 de En Marea Tui, foi entrevistada hoxe no programa Día a Día. Os temas que abordou foron Urbanismo, Patrimonio cultural e natural, Emprego e vivenda, e cales son os prinicipais problemas de Tui e solucións, e cara onde ten que camiñar Tui