Día a Día

O Liceo Casino de Tui ofrece nesta nova temporada que arranca diversas actividades tanto para nenos cmo para adultos. Hoxe faláronos das mesmas Arancha Giráldez e Ana González. Esta última conducirá "Bright Minds" que o martes terá unha xornada de proba para cativos de 3 a 5 anos.

Hai vinte anos que se celebra no Anxo, en Pazos de Reis, o Campionato de Tuto Festas de San Miguel de forma previa ás festas na parroquia. A cita será esta noite ás 23h como nos explicaba Manuel Crisóstomo. Agardan reunir entre 25 e 30 parellas.

A Área Panorámica tinguiuse esta noite de morado para conmemorar o Día Mundial do Alzheimer que se celebra neste 21 de setembro.

Aproveitando esta data conversamos co presidente de AFAGA, a Asociaicón de Familiares de Enfermos de Alzheimer de Galicia, Juan Carlos Rodríguez, quen indicaba que cada ano hai maior conciencia social sobre esta doenza, tamén indicaba que o envellecemento da poboación aumenta o factor de probabilidade de sufrir esta enfermidade. A realidade dicía é que cada vez hai máis casos que se deben abordar de forma integral.

O Club de actividades acuáticas Baixo Miño prepárase xa para comezo desta nova temporada, estivo esta mañá o directivo do club Juanjo España quen nos contou como foi a pasada temporada e como afrontan esta que está a piques de comezar na que participarán en campionatos a nivel autonómico nas categorías promesas, benxamín e alevín.

O sábado terá lugar en Tui o III Festival de Corais e Música tradicional. Será a partir das 8 da tarde na Igrexa de San Domingos onde participarán catro grupos, A Coral Polifónica do Sporting Club do Casino da Coruña, a Coral Moañesa, o grupo tradicional Lirolai e a Coral San Telmo, de Tui. Estiveron esta mañá a na nosa sintonía algúns dos participantes neste festival.

Este sábado celebrase o II Festival Folclórico internacional que organiza a asociación o Mosteiro, de Pexegueiro.

Será as 21.00h e con entrada de balde. Participarán dous grupos, o propio de Pexegueiro, grupo folclórico Mosteiro de Pexegueiro e como grupo convidado participará o grupo portugués Santa Catalina da Fonte do Bispo, do Algarve. Unha actuación que, di un dos organizadores do evento, Antonio Costas, moi vistosa e distinta o que aquí estamos acostumados.

O Río Miño será unha vez máis escenario dunha proba internacional, neste caso é a primeira regata da Eurocidade de yola e batel. Estiveron connosco esta mañá algúns membros e colaboradores do Club Remo de Tui, organizador do evento, para explicarnos en que vai consistir a regata e as diferencias destes tipos de embarcacións. Diego das Dores é o presidente do club remo de Tui, Aroa Rendo a tesoureira e Carlos Alfaya e Javier Álvarez, membros do club.

Manu Garrido proclamábase por segundo ano consecutivo subcampeon do mundo de piragüismo de Maratón en C1.

A proba disputouse a pasada semana en Vilaverde, Portugal, onde o padeeiro Manu Garrido revalidaba o seu título de subcampeón do mundo. O padeeiro do Kayak tudense estivo esta mañá connosco para contarnos as sensacións dese campionato, nun rio xa coñecido para el e co apoio da afección que se desprazou até Portugal para animalo. Contounos tamén como viviu a proba a pesar da penalización de 15 segundos que se lle impuxo.

Dende esta mesma tarde comezan as actividades da asociación de parkinsón Baixo Miño, neste caso cun curso de risoterapia e outro de coiro que comeza o 1 de outubro. Ámbolos dous impartiranse no centro socio comunitario de Tui e aínda teñen prazas dispoñibles. Os dous obradoiros son para tódolos los públicos, e non é necesario padecer a enfermidade para participar.

Ademáis, o Edificio do Área Panorámica acolle polas mañás outros cursos da asociación, neste caso, si son específicos para persoas afectadas pola enfermidade.

Acompañábanos esta mañá o concelleiro de Cultura e Patrimonio Eduardo Freiría para falarnos do remate do ciclo de visitas pola arqueoloxía tudense "Tralas pegadas do tempo" e outros asuntos.