Día a Día

Hoxe no Betún terán poesía cun recital a cargo de Trigo. Será a partir das 23h con entrada de balde para todos os socios. Mañá continuarán con música a partir das 22h da man de The Lelli KElly's. Estivemos a falar con Tonho Nogueira, un dos tresmembros deste grupo rock de Moaña.

Mañá sábado, 5 de maio, ás 18.30h na sala de exposicións municipal na Área Panorámica o fotógrafo porriñés, Alberto Pereiro Lueiro “Holly” inaugura a mostra fotográfica “Falan de min, falan de ti”, unha reportaxe fotográfica-documental que, a través do personaxe Pepe Kórdoba "Niño", trata de reivindicar o respecto a todas aquelas persoas que traballan dignamente nas rúas en diferentes actividades e profesións.

O pavillón do IES San Pio acolle mañá de 10 a 15h a décima xornada da Copa Promoción Xogade de Bádminton. Participarán xogadores benxamíns e infantís de toda a provincia. 34 deles pertencen ao club Bádminton Tui. Falounos desta cita deportiva Marisa Giráldez, presidenta do club Bádminton Tui.

Corenta e dous artesáns daranse cita esta fin de semana no conxunto histórico de Tui na XXII Feira de Artesanía. Este evento está organizado polo Concello de Tui, a través da concellería de Comercio, coa colaboración da Asociación de Palilleiras do Baixo Miño e a Asociación Xuvenil e Cultural do Traxe de Tui. A inauguración terá lugar mañá sábado ás 12h e poderá visitarse tanto mañá coma o domingo de 12 a 22h.

Da feira falamos coa concelleira de Comercio, Yovana Velázquez, xunto a Mari Campos e Carni Carnero da Asociación de Palilleiras do Baixo Miño,e Mª del Mar Fandiño de bordado al aire.

ORPAGU, a Organización de Palangreiros Guardeses, vén de presentar novos produtos con atún á súa línea gourmet. Estivemos a falar desta nova proposta comercial con Joaquín Cadilla, presidente de ORPAGU.

Hoxe visitou a RMT Sandra González, alcaldesa de Tomiño, coa que estivemos a falar dos asuntos máis importantes na actualidade do seu concello como os avances do proxecto para a Variante de Tomiño, as reunións con representantes do Consorcio da Zona Franca de Vigo ou a inauguración do pantalán accesible no río Miño. Amais a rexedora de Tomiño falounos da ponte peonil, da situación da biblioteca ou dos proxectos inmediatos da man de Vila Nova de Cerveira.

Unha longa temporada pero moi especial é a que está a piques de rematar A Quinta de Tui de fútbol sala. O van celebrar este sábado ás 16.30h cunha festa con todos os equipos. Así nolo contou hoxe Xacobe Morais, adestrador e coordinador da Quinta de Tui. Amais este sábado presentarán o albume de cromos do equipo, no que aparecen todos os xogadores dos distintos equipos.

O centro examinador de Cambridge English organiza no Colexio Maristas os exames para obter os títulos oficiais de KET, PET e FIRST.

O prazo de matrícula está aberto até este domingo, 6 de maio, e estivemos a falar con Patricia Groba, profesora do centro examinador.

Hoxe falamos co alcalde de Tui, Carlos Vázquez Padín, logo de que o pasado venres non fosen aprobados os orzamentos de 2018 en pleno. Este negativa ás contas recoñecía que é un golpe importante para a cidade. Dicía que a oposición, pese a incorporar parte das súas propostas, actuou con irresponsabilidade e ánimo de vinganza. Pensará se presenta ou non unha cuestión de confianza, e instaba a oposición a clarificar a súa postura sobre unha hipotética moción de censura.

Estivemos a falar con Manel Riveiro, de Manel Riveiro Peluqueros, sobre o seu novo proxecto de barbería solidaria. Mañá estarán na praza do Seixo entre as 10h e as 16h a favor de Sos Tomiño-Baixo Miño e para axudar ás familias máis necesitadas da comarca.