O Club Náutico San Telmo comeza este sábado un novo curso para os títulos para manexar embarcacións de recreo. En concreto poderase obter o título de Patrón de Embarcacións de Recreo, PER, e o de Patrón para Navegación Básica, ou PNB.

Falamos con Julián Iglesias, técnico do Club Náutico San Telmo, que nos explicou un pouco máis sobre esta oferta.

A Asociación de Comerciantes de Tui está a dar as últimas puntadas para o seu segundo desfile de moda, que terá lugar o 1 de outubro. Despois do éxito obtido no desfile celebrado no mes de maio nesta ocasión presentarán as novas coleccións de outono dos establecementos da cidade. Hortensia Rodríguez, Miriam Guerreiro e Rita Álvarez foron as encargadas de contarnos a iniciativa.

Mañá celébrase o día mundial do Alzheimer, unha enfermidade que padecen unhas 10.000 persoas na área sanitaria de Vigo, pero que polo seu carácter social e o seu efecto no entorno eleva o número de afectados a máis de 30.000.

Juan Carlos Rodríguez, presidente de AFAGA, a Asociación de Familiares de enfermos de Alzheimer e outras demencias de Galicia, falounos destas cifras e das repercusións que o Alzheimer ten no entorno da persoa diagnosticada.

Esta tarde ás 18h dará comezo o obradoiro de maxia programado polo Espazo Xove de Tui. Será unha ocasión para aprender pequenos trucos e desenvolver capacidades creativas da man dos magos Xacobe e Pedro Bugarín. Con este último falamos sobre unha proposta para a que aínda queda algunha praza dispoñible. Despois do obradoiro ofrecerán un espectáculo de maxia para o público en xeral.

A Asociación Cultural Val de Flores comeza dentro de pouco un novo ano de actividades entre as que se manteñen baile tradicional e tamén gaita e percusión, así como a proposta de playback dos sábados pola mañá.

Dende a nova directiva Fina Fernández, presidenta, José Roso, secretario, e Laura Corgo, unha das vogais, faláronnos tamén das demais actividades e da xuntanza con churrascada prevista para o domingo 1 de outubro.

Os membros da coral San Telmo pasarán esta fin de semana en San Juan de la Arena, en Asturias, onde se celebra a festa de San Telmo.

Este festa é das máis importantes en San Juan de la Arena, despois da propia festa de san Xoán, e coincide coa fin da campaña do bonito, ocasión na que como pobo mariñeiro dan grazas a San Telmo e á Virxe do Carme.

O grao en psicoloxía, o curso de acceso á universidade e unha ampla oferta de cursos de extensión universitaria de variada temática idiomas, educación, empresas... é a que presenta neste novo curso académico a Aula da UNED de Tui. Da mesma deunos conta hoxe a coordinadora deste centro, Margarita Pino.

Esta tarde será a presentación do novo ano académico e a entrega de horarios para os alumnos de cursos intermedios da Escola de Música e do Conservatorio de Tui. O vindeiro luns, 25 de setembro, terá lugar o inicio oficial das clases.

Estivemos a conversar con Rubén López, director do centro, co que repasamos como se presenta este novo ano académico.

O padeeiro Iván Alonso, tras 23 anos dedicado ao piragüismo, e tras lograr tres campionatos mundiais, 2 pratas e dous bronces a nivel Mundial, amais de cinco medallas de ouro e dúas de prata en campionatos de Europa, fará este ano un paréntese na súa carreira.

Hoxe conversamos con el, tras retirarse xa no Mundial de hai quince días, e anunciar o alto que fai na súa carreira. Na nosa sintonía explicou as sensacións desta temporada que non foron as axeitadas.

Este ano académico comeza con novas propostas tamén no Liceo Casino, que presenta certos cambios cos que pretenden atraer máis xente ás súas instalacións.

Entre as novidades principais están as reformas que se teñen feito nas pistas. Tamén a cafetería do Liceo Casino cambia o seu funcionamento e permitese o acceso a persoas que non son socias, e tanto socios como non socios poderán amais participar na maioría das actividades programadas para este ano. Arantxa Giráldez foi a encargada de darnos todos os detalles.