O Monte Aloia será o protagonista do roteiro que se vai celebrar o sábado dentro dos Roteiros Literarios organizados pola Deputación de Pontevedra e a AELG. Será da man do etnógrafo, fotógrafo, escritor e xornalista Víctor Vaqueiro. El mesmo foi o encargado de explicarnos como a maxia, as lendas e a historia serán os fíos condutores da ruta.

A segunda edición do concurso de pintura Pinta Tui terá lugar o domingo 8 de outubro. Será unha cita coa arte de 8 horas de duración na que os participantes poderán plasmar calquera aspecto da cidade utilizando distintas técnicas de pintura.

O evento está organizado polo Concello de Tui e a Asociación de Comerciantes e Industriais da cidade, dende a que Juan Carlos Blanco e José Manuel Díez nos explicaron os detalles desta cita coa arte.

Nos últimos días nos montes comunais de Ribadelouro foron detectados ao menos dous globos incendiarios que caeron en lugares onde había persoas preto, o que permitiu que non se chegara a producir lume no monte. Foron os propios veciños os que deron aviso á Comunidade de Montes e tamén á Garda Civil segundo explicou o presidente da Comunidade de Montes de Ribadelouro, Miguel Rodríguez.

Facendo públicos este feitos queren pór en alerta á cidadanía para que dean aviso no caso de detectar novos dispositivos.

O Concello de Tui ten previsto retirar os contedores de lixo das rúas o próximo mes de outubro, de tal xeito que se colocaran só de 9 da noite a 7 da mañá. Esas serán as horas nas que se poderá depositar o lixo. A medida comezará a aplicarse no conxunto histórico e posteriormente estenderase ao centro urbano. Deste xeito búscase minimizar os cheiros que xeran os colectores e mellorar tamén a imaxe da cidade. Así o explicou hoxe o concelleiro de Medio Ambiente, José Martínez Tato, quen indicou que teñen a intención de pechar os contedores soterrados xa que son un foco de infección.

Balance positivo do festival Arraianos que se celebrou en Tui dende o venres ata este domingo. Dende a organización valoran positivamente o número de actividades ofertadas, a resposta do público… así o explicou esta mañá Víctor Pérez Bugarín.

Hai actividades que funcionaron moi ben coma as xustas, e outras cuestións que agardan mellorar para o próximo ano.

Falamos con Carlos Martínez Villacorta, que é capitán do Grupo 43 do Exército do Aire, ocupado da extinción de incendios forestais. Este grupo ten a súa base no aeroporto de Lavacolla en Santiago de Compostela, dende onde saen normalmente todos os hidroavións que actúan no territorio galego.

O pasado luns Gonzalo Otero, que exerce como párroco en Santa María da Guía, en Randufe, comunicaba aos veciños o seu traslado a outra parroquia. Dende ese momento a mobilización en contra foi inmediata.

Encabezados por un grupo de rapaces os veciños comezaron a recoller firmas e a poñerse en contacto con medios de comunicación para facer forza e intentar cambiar a decisión do Bispado.

Falamos con Ana Rodríguez, Ana Montes e Miguel Fernández, que forman parte dese grupo de mozos.

Esta fin de semana celébranse en Tomiño as Festas do Alivio, motivo polo que hoxe falamos coa alcaldesa de Tomiño, Sandra González. Deunos conta da homenaxe ao pintor Mario Rodríguez este domingo no acto cívico, pero tamén abordamos outros temas da actualidade municipal.

Alejandro Da Cuña “Cuñi” é o autor do libro solidario “Receitas con Historia”, un receitario que recolle pratos da zona do Baixo Miño e da Louriña, e que tivo un grande éxito.

Agora Da Cuña ten en mente unha nova iniciativa para escribir un libro de vivencias sobre o Camiño a Santiago. Despois de buscar ideas para unha nova acción solidaria decidiu facer o Camiño Francés dende Roncesvalles recollendo a modo de diario a experiencia de cada etapa.

Esta fin de semana o Betún colabora co Festival Arraianos e serán punto de encontro para que queira facer un decanso durante esta cita coa historia de Tui. Amais esta noite teñen a súa primeira Jam Poética.

Contóunolo todo Jorge Aldir, que tamén aproveitou a ocasión para adiantarnos un pouco a súa proposta estrela da vindeira semana, cando no Betún actuará o grupo tudense Best Boy.