Día a Día

A Axencia Tributaria está comezando a enviar novos requerimentos aos emigrantes retornados que reciben pensións do extranxeiro para que declaren eses ingresos e tributen por eles tras dous anos de tranquilidade.

Falamos con Benito Alonso sobre a situación destes pensionistas e sobre o que lles reclaman dende Facenda.

Tui acolle mañá a primeira actividade dos Días da Memoria de Levada Libre coa representación teatral de “A Lola” de Avelaíña Teatro, unha historia que fala de todas as mulleres que sobreviviron aos seus familiares asasinados durante o franquismo. A cita será ás 19.30h no salón de actos do Instituto San Paio.

Este domingo terá lugar a VII BTT Eurocidade. Con saída dende a piscina municipal de Valença contará con dous posibilidades de percorrido de 42km ou de 74km. Trátase dunha proba organizada pola Eurocidade Tui-Valença coa colaboración de Biciosos Rías Baixas e que está entre as máis importantes da BTT en Galicia.

Hoxe ás 21.30h chega ao Teatro Municipal de Tui o espectáculo "Falar sen cancelas" con Isabel Risco, Fran Rei e Pedro Brandariz. É unha proposta de hora e media de humor sobre a galeguidade, a lingua, as nosas costumes e ritos; unha festa de gags cómicos e situacións nas que veremos o mellor (e o peor) de nós mesmos.

Maxia, humor, comedia…é a proposta que da man do mago Cayetano Lledó chega este sábado, 3 de marzo, ás 19h ao Teatro Municipal de Tui no espectáculo "Sherlock Holmes". Estivemos a falar con el.

Mañá sábado COXAPO celebra no Auditorio de Goián a xornada técnica " A Auga no Rural", na que se falará de temas como os lans hidrolóxicos e as regulacións recollidas no plan da seca, tamén da problemática do gas Radón en Galicia ou das necesidades dunha óptima xestión da auga no agro.

A Asociación de Comerciantes e Industriais de Tui comeza mañá unha campaña que se desenvolverá durante os catro primeiros venres e sábados do mes de marzo. Esta mañá estivemos a conversar co seu presidente, Juan Carlos Blanco, sobre este e outros proxectos da asociación. Amais contamos coa presenza de Arán Feijoo, que se incorpora como colaborador da Asociación para participar nas súas iniciativas.

O pintor italiano Giuseppe Rea, afincado en Guillarei, amosará dende mañá venres, 2 de marzo, a súa obra na sala de exposicións municipal na Área Panorámica ata o 17 de marzo. Presentará unha trintena de cadros

A cita máis importante co agro no Baixo Miño terá lugar esta fin de semana na Mostra de Cultivos organizada por ACUBAM co apoio do Concello de Tomiño e da Deputación de Pontevedra, e que chega á súa edición número 15 en plena forma. Este ano será un punto de inflexión de cara á profesionalización da Mostra dentro do sector do agro. Estivemos a falar máis polo miúdo sobre este evento con Patricia Rodríguez, presidenta de ACUBAM, e con Sandra González, alcaldesa de Tomiño.

Ás 11h desta mañá na aula CEMIT, da Área Panorámica, será presentado o programa DepoIntegra Xove da Deputación de Pontevedra, que busca mellorar a empregabilidade dos mozos e mozas de 16 a 30 anos da provincia. Así o explicaba Montserrat Magallanes, deputada de Emprego. Para o Baixo Miño está previsto o desenvolvemento dun itinerario formativo de "Confección e publicación de páxinas web".