Día a Día

O Concello de Tui é un dos participantes no proxecto “Camiño Portugués: conservación e valoración do Camiño Portugués de Santiago. O patrimonio cultural e natural como factor de desenvolvemento económico””

O alcalde de Tui, Enrique Cabaleiro, explicou esta mañá que no ámbito de Tui o que se pretende é humanizar e mellorar a rúa Coengo Valiñ e San Bartolomé.O proxecto presentado a estes fondos europeos é ambicioso en palabras do rexedor tudense e supera o millón de euros de orzamento. Destacaba Enrique Cabaleiro que o Camiño Portugués é unha prioridade.

Mañá venres, ás 19.30h, o novo pavillón de deportes de Tui acollerá o partido de fútbol sala xuvenil, da Liga Nacional de Honra, que enfrontará ao Randufe Fútsal de Tui e ao Burela Pescados Ruben.

Este partido terá carácter solidario, en favor da asociación SOS Tomiño Baixo Miño, polo que se pedirá ao público asistente a doazón de alimentos, preferentemente leite, cacao e conservas vexetais.

Do mesmo faláronnos hoxe Francisco Javier Reboreda, adestrador do Radufe Futsal, e José Quinteiro de SOS Tomiño-Baixo Miño.

Máis dun centenar de xogadores van participar este domingo, no pavillón do IES San Paio en Tui, no Trofeo Concello Tui Circuíto Babolat Deportes Carlos Miguel de Bádminton. Está organizado polo Club Bádminton Tui e o Club Bádminton Rachaplumas, en colaboración co Concello de Tui. Disputarase nas categorías Sub11, Sub13, Sub17 e Absoluto dende ás 9 da mañá ás 9 da noite. Do mesmo falounos hoxe Marisa Giráldez, presidenta do Club Bádminton Tui.

A Comunidade de Montes en Man Común de Areas organiza para o sábado 13 deste mes unha actividade para conmemorar o Día da Árbore. En concreto a partir das catro da tarde, nas Mariñas, levarán a cabo unha plantación de frondosas no monte comunal. O punto de encontro para os participantes será o Centro Cultural de Areas. Dende a Comunidade de Montes convidan aos nenos e á xente nova a participar nesta actividade e deixar “a súa pegada ecolóxica”.

A concelleira de Cultura de Tui, María José González. presentounos hoxe a programación do primeiro semestre do ano na cidade que se abre co Entroido

Hoxe celébrase o día da patroa da Policía Local e por este motivo conversamos co concelleiro de Seguridade e Emprego do Concello de Tui, José Ramón Magán. Anunciou o edil que no prazo dun ano ou ano e medio agardan ter cubertas as tres vacantes que arestora ten este corpo, Esta é unha das demandas da Policía Local, que en medios técnicos solicita un novo vehículo para substituír aos actuais que teñen moitos anos, un dispositivo para control de drogas e novas dependencias.

José Ramón Magán deu conta amais de que calquera actuación en materia de circulación no casco urbano está condicionada á apertura da rúa Ourense. Avanzou en política de emprego a intención de cubrir as prazas vacantes que existen no concello.

O deputado de Mobilidade e Cooperación Transfronteiriza, Uxío Benítez, estivo hoxe no programa Día a Día deu conta hoxe do traballo que está a realizar nos seus departamentos da Deputación de Pontevedra. O plán Móvese ou a presentación de proxectos a fondos europeos foron parte dos temas abordados

O director da AGADIC, Jacobo Sutil, estivo hoxe en Tui na presentación dun novo número da Axenda Cultural Corredoira. Aproveitamos a súa presenza na cidade para conversar con el sobre o seu departamento e os programas culturais previstos para este 2016.

A subida do arco ás seis desta tarde marca o inicio das festas na honra á Virxe da Saúde e de San Blas en San Xoán de Tabagón no Rosal. Este ano o motivo elixido é a conmemoración do 400 aniversario do falecemento de Cervantes. Un ano máis Marisol deunos conta de cómo vai o traballo de confección do artístico arco.

O Club AndaTuiRegodapedra organiza para este domingo, 31 de xaneiro, a primeira andaina do ano polas parroquias de Guillarei e Paramos. A saída está prevista ás nove da mañá dende a Ponte Romana na Veiga do Louro. Será un percorrido de 11,3 quilómetros cun desnivel de 124 metros. Os camiñantes irán por Guillarei ata o Monte das Penizas en Paramos e regreso ata o punto de partida. Os interesados deben inscribirse na webwww.andatui.es