Día a Día

Play-Doc editará, por vez primeira, un libro que estará dedicado ao director afroamericano Charles Burnett, que leva por título Charles Burnett: un cineasta incómodo. O libro, está cofinanciado nunha parte por Tabakalera Centro Internacional de Cultura Contemporánea e a Secretaría Xeral de Cultura da Xunta de Galicia, mais Play-Doc precisa cubrir outros gastos. Por este motivo, vén de lanzar unha campaña de micromecenado na plataforma Verkami para lograr o apoio económico necesario para terminar o proxecto. Na web de Play-doc e no seu Facebook poden atopar máis información.

A Cámara de Comercio de Tui pon en marcha o Programa Integral de Cualificación e Emprego, denominado PICE, para axudar a mozos e mozas a incorporarse no mercado laboral. Fátima Rodríguez, técnica programa do PICE da Cámara de Comercio de Tui, explica que levarán a cabo o plan de capacitación, dividido en varias fases.

Os interesados deben ter entre 16 e 30 anos e posuír o certificado dixital para poder inscribirse primeiramente no Plan de Garantía Xuvenil. Para obter máis información, poden poñerse en contacto coa Cámara de Comercio de Tui, dende as 9h a 18.30h ou chamando ó número de teléfono 986 60 02 16.

“Aprender a educar para paliar o fracaso escolar e persoal” é o título da Semana da Educación organizada polo Concello de Tomiño que se vai celebrar a próxima semana do luns 15 ao xoves 18 no Auditorio de Goián.

Elisabet Pérez de Santiago, técnica do Concello de Tomiño, explicaba que estas xornadas xorden coma complemento aos programa É APRENDERrnede que desenvolven no Concello.

Rafael Sánchez Bargiela, xerente do Xacobeo, destacou na Radio Municipal de Tui que o libro "La catedral de Tui desde su Plan Director" supón a primeira monografía dende un punto de vista multidisciplinar realizada sobre a Catedral tudense. Salientaba que dende o Xacobeo e Turismo de Galicia a publicación deste libro supón unha achega para o coñecemento da Catedral coma elemento patrimonial importante pero tamén do seu papel no Camiño de Santiago.

Hoxe ACITUI realizou en directo o sorteo de agasallos con motivo da súa campaña "Namórate de #Tui" polo día de #SanValentín. Ademais, Rita Álvarez, representante de ACITUI, e Montse Cruces, técnica da Asociación, contáronnos que a campaña foi moi positiva pola cantidade de tickets que entraron no sorteo dos diferentes premios.

O libro sobre o Plan Director da Catedral de Tui estivo coordinado polo historiador tudense Suso Vila, quen hoxe nos falou precisamente do seu papel nesta publicación

Este libro supón, en palabras de Suso Vila, a primeira gran monografía da Catedral de Tui.

A capela de San Telmo na Catedral de Tui acollerá mañá ás 18.30h a presentación do libro do Plan Director da Catedral de Tui. Iago Seara, arquitecto, explicou que se presentará o libro tanto en papel coma en formato dixital. O Plan director sinalou que recolle as actuación prioritarias no templo, parte delas xa realizadas, e tamén os plans de futuro. Para Iago Seara hai que dar un salto cualitativo con novas instalacións para o Arquivo Diocesano e o Museo Catedralicio.

Onte visitou a empresa tudense Establecementos Cholo o delegado territorial da Xunta en Pontevedra, José Manuel Cores Tourís, co gallo de coñecer as melloras realizadas en canto ós equipos e zonas de traballo na empresa.

Segundo apuntou Nerea Alamancos, adxunta á xerencia da empresa, con estas axudas procedentes da Consellería de Medio Rural puideron ampliar a capacidade do conxelador. Ademais, tamén adquiriron maquinaria nova, como un levador de carne para a máquina picadora, unha carretilla, xunto cunha nova furgoneta para transporte de mercancías.

Un produto tan sinxelo e abundante en Galicia como é a resina de piñeiro está a ser moi demandada, o que fai que haxa unha oportunidade de mercado moi valiosa para o monte e para a nosa comunidade. Os seus usos son moi variados, para gomas de mascar, perfumes, vernices, entre outros, sendo unha solución de carácter natural ao contrario que o petróleo. Así o expresou José Antonio Rodríguez Puga, cofundador da AREGA, a Asociación de Resineiros de Galicia.

O Espazo Xove de Tui planifica para estes primeiros meses do ano unha xornada de contacontos e un curso de blogues, para os que non hai datas fixadas polo momento. O que si está confirmado é o curso de composición musical, que se desenvolverá 4 xoves, o 18 e 25 de febreiro, e o 3 e 10 de marzo. O prazo de inscrición está aberto até o 15 deste mes.