Día a Día

O Partido Popular de Salceda de Caselas expresa a súa satisfacción pola cesión definitiva dos terreos á Xunta de Galicia, así como a aprobación do convenio de cooperación entre o SERGAS e Concello de Salceda, para a execución das obras de construción do novo centro de saúde. Aínda así, o voceiro popular, Santiago Rodríguez Dávila, explica que é falso o que di o goberno con respecto a que as parcelas nas que se construiría o novo centro de saúde estiveran entregadas á Xunta de Galicia, xa que o Sergas nunca puido acceder a estes terreos até que se fixo a reparcelación en xaneiro de 2015.

Marcos Besada, alcalde de Salceda, amosouse moi satisfeito co acordo tomado para a reforma da Lei da Área Metropolitana e a súa inmediata posta en marcha, que inclúe un consenso sobre o transporte metropolitano. Por outra banda, tamén valora moi positivamente a cesión de terreos que fará o Concello de Salceda á Xunta de Galicia para a construción do novo centro de saúde e o convenio de cooperación entre o Sergas e o Concello.

Manuel González, voceiro de Ciudadanos Tudenses, adianta que se do seu partido depende o apoio para levar adiante as obras do aparcamento ou da apertura da rúa Ourense, unha vez visto o proxecto, non terían problemas en dicir si. Porén, argumenta que quere ver como se trata ós propietarios e como se levan a cabo as negociacións. Lamenta Manuel González, por outra banda, que o goberno municipal nunca se puxo en contacto co seu partido para tomar decisións.

En Tui ás seis desta tarde a Biblioteca Municipal acolle un espectáculo obradoiro a entorno á figura de Rosalía da man de Crearte Servizos Culturais. María Torres é a actriz que levará a cabo este espectáculo.

Vai dirixido a maiores de 5 anos. É preciso inscribirse na na propia Biblioteca, por correo electrónico en [email protected] ou por teléfono no 617 49 81 03.

A Consellería do Mar reparará os desperfectos ocasionados polo temporal na zona portuaria de Tui. Así nolo confirmou o director do Porto Deportivo de Tui e membro do Club Náutico San Telmo, Santos Carreto.

Entre as accións que contempla a Consellería, está o amaño dos dous pilotes que se desencaixaron, obras no pantalán e a limpeza das inmediacións portuarias. Estímase que a reparación destes danos rondará os 150.000 euros.

Carlos Vázquez Padín, voceiro de Converxencia 21, afirmou que están investigando as contrapartidas políticas polas que APTui votou a favor da aprobación dos orzamentos municipais o pasado mes de decembro. Asemade tamén anunciou que levarán a pleno a colocación dun reloxo no concello no que se mida o tempo que leva Tui sen débeda, ao igual que fan nalgúns sitios de Alemaña.

“Educar para protexer” é o título das xornadas organizadas polo Concello de Tui e o Colexio Rural Agrupado Mestra Clara Torres, que comezan esta semana.

O concelleiro de Servizos Socias, Laureano Alonso, explicaba o obxectivo das xornadas e convidaba a asistir ás mesmas

As xornadas comezan este xoves ás 18h na Sala Félix Rodríguez da Área Panorámica baixo o título “Como fomentar hábitos de autonomía dos nosos fillos. Normas e Límites”.

A Eurocidade Tui-Valença segue avanzando pasos dende a súa creación hai cinco anos. O concelleiro da Eurocidade, Miguel Capón explicaba na nosa sintonía que os dous municipios están perfectamente integrados no eido cultural e deportivo, e hai que seguir avanzando en compartir infraestruturas, e na ventanilla única entre os dous municipios que está xa en marcha.

Por outra parte Miguel Capón amosouse moi satisfeito polo funcionamento do cuatripartito do que forma parte.

A Aula da UNED de Tui acolle hoxe e mañá un simposio sobre enfermidades crónicas cutáneas titulado “Panorámica actual, prevención e educación sanitaria en pacientes con enfermidades crónicas cutáneas”. Está organizado pola doutora Carmen Rodríguez Cerdeira, e contarán con destacados relatores a nivel nacional e internacional, entre os que se encontra Roberto Arenas Guzmán, xefe de sección de dermatoloxía e membro da Sociedade Mexicana de Dermatoloxía.

A Sala Félix Rodríguez da Área Panorámica acolle hoxe luns ás 17h a ponencia "Aspectos emocionais da Enfermidade de Parkinson. A sintomatoloxía non motora" a cargo de María Lens Villaverde, psicóloga. Está organizada pola Asociación Parkinson Baixo Miño, que a continuación celebrará a súa asemblea anual.