Día a Día

Esta fin de semana faleceu Xosé Gundín García, que foi membro da corporación municipal de Tui coma concelleiro entre os anos 91 e 98, por Esquerda Galega na corporación do 91 ao 95, e polo BNG entre maio de 1995 e febreiro de 1998. Julio Viñas e J. Ramón Pérez recordaron ao seu amigo na Radio Municipal de Tui.

Hoxe celébrase o Día Mundial das Enfermidades Raras a nivel mundial, e para coñecer máis sobre esta realidade, quixemos conversar con Eva Martínez, nai de Marta, unha nena afectada polo Síndrome de Delección 1p36 e presidenta da Asociación Nacional de Afectados por esta enfermidade. Eva Martínez explicounos en que consiste o Síndrome de Delección 1p36 e as axudas ás que poden optar as familias.

Raúl Alcaraz actuará hoxe ás 23.30h no White Clover de Tui. O monologuista explicou na nosa sintonía en que consiste o seu espectáculo, "Cosikas de la vida", onde tal e como di o nome, tratará de asuntos moi coñecidos por todos nós, e de como o recibe o público galego.

David Vila, presidente da Asociación ADETO, deu conta de todo o que podemos atopar e mercar na Feira de Oportunidades, que se celebra no primeiro andar do Mercado de Tomiño e nos seus soportais. Esta feira é de interese para os comerciantes porque así, poden pór á venda todos eses productos que teñen en stock e comezar a nova temporada de primavera. O horario será ininterrompido o sábado e o domingo de 10h a 20h.

A Asociación Cultural do Betún naceu hai pouco máis dunhas semanas disposta a ofrecer unha ampla oferta cultural que abarca o teatro, a música ou mesmo e exposicións. Fofi Dorado e Paloma Saavedra, membros da organización, deron conta como naceu este asociación, faláronnos das actividades previstas para hoxe e mañá e informáronnos de como podemos facer para ser socios do Betún.

Mañá sábado, ás 20h o Teatro Municipal de Tui acolle a representación de “O principio de Arquímedes” da man de Teatro do Atlántico. É unha obra dirixida por Xulio Lago e interpretada por María Barcala, Toni Salgado, Alberto Rolán e Marcos Vieitez. Xulio Lago dábanos conta do argumento desta obra escrita por Josep M. Miró i Corominas

As entradas están á venda en www.culturatui.info ata o sábado ás 12h ou o sábado pola tarde dende ás 18.30h no despacho de billetes da Área Panorámica ao prezo de 6€ e 4,5€.

A música infantil encherá mañá ás 19.30h o Teatro Municipal de Tui co espectáculo "Gatuxo". É un espectáculo musico-teatral para bebés e familias a cargo de Magín Blanco, Jorge Juncal e María Faltri na parte musical e de Raquel Queizás na dramatización.

As entradas para “Gatuxo” están á venda en www.culturatui.info ata o venres ás 12h ou o venres dende ás 18h no despacho de billetes ao prezo de 3,5€ e 2,5€.

Magín Blanco falounos hoxe deste espectáculo.

Ás seis desta tarde na Sala Félix Rodríguez da Área Panorámica comezan as xornadas “Educar para protexer” organizadas polo Concello de Tui e o Colexio Rural Agrupado Mestra Clara Torres. Esta tarde María Ferreiro Candia, psicóloga, psicopedagoga e directora do Instituto de Tratamento da Conduta de Vigo, abordará os “Trastornos de conduta en nenos e adolescentes: pautas, normas e límites para axudar a controlalos”. María Ferreiro avanzaba na nosa sintonía os temas que vai abordar esta tarde.

Esta semana están de visita na cidade 25 alumnos do Instituto Saint Pierre de Calais de Francia, que están de intercambio co centro IES Indalecio Pérez Tizón. Compartiron aulas cos alumnos tudenses, visitaron a Catedral de Tui e estiveron en Santiago de Compostela. Hoxe irán até Valença e a súa fortaleza e mañá viaxarán ata as Cíes

Maxime, Clemont, Victorie e Sophie contáronnos que é o que máis lles gusta de Tui

Ás catro e media desta tarde comeza o curso de “Protocolo:institucional e empresarial” na Aula da UNED de Tui para o que continua aberta a matrícula ao través de www.unedpontevedra.es. Desenvolverase en dúas xornadas, hoxe e mañá xoves de 16.30 a 20.30h. Correrá a cargo de Francisco Gonzalez- Barros, experto en Protocolo e Cerimonial.