Día a Día

Tui mantén a realización da Cabalgata de Reis para esta tarde. A hora de saída prevista é ás 17h dende Valença, e ás 19h os Reis estarán no Paseo da Corredoira diante do Seminario Menor onde foi colocada unha carpa na que terá lugar, en principio, a recepción real. Daba os detalles a concelleira de Cultura, María José González.

Nava Castro deu conta de que as cifras de peregrinos rexistradas ao longo do ano 2015 volven demostrar que o Camiño de Santiago está en auxe. O número de camiñantes que recolleron a Compostela no 2015 chegou aos 262.515, o que supón 24.532 máis que no ano 2014.

Por outra banda Nava Castro vén de inaugurar a Ruta da Lamprea, que implica a sete concellos da comarca do Condado. Con esta iniciativa preténdese dar a coñecer o importante patrimonio que arrodea a este peixe e a súa captura nun enclave singular como é o río Miño.

A Guarda suspende a Cabalgata de Reis desta tarde ante a inestabilidade meteorolóxica. As súas Maxestades de Oriente recibirán a partir das seis da tarde aos nenos na Casa dos Alonsos onde actuarán os grupos que ían participa na Cabalgata. Así o explicaba a concelleira de Cultura, Elena Baz.

O Auditorio Municipal do Rosal acolle mañá mércores, ás 18.30h, un concerto solidario da Agrupación Musical do Rosal dirixida por José Javier Bascoy. No mesmo recollerán alimentos non perecedoiros para Conrazones. Precisamente o director da Agrupación Musical do Rosal deu conta do repertorio que interpretarán, con zarzuelas, ópera e pezas de cine e teatro.

Por outra banda, a Agrupación Musical do Rosal cumple 30 anos e por isto vai celebrar durante este ano distintas actividades.

Pese ao mal tempo Melchor, Gaspar e Baltasar madrugaron hoxe para percorrer todos os barrios e parroquias do Rosal nun periplo de varios quilómetros. Tras o percorrido matinal proseguirán esta tarde por Tabagón, A Portela, Eiras, Morán, Valdemiñotos, Couselo, A Lomba, Urgal, Barrio Novo, Cumieira de Abaixo, Cumieira de Arriba, e Sandián. Ás cinco da tarde regresarán á Praza do Calvario onde no salón de sesiónsa da Casa do Concello recibirán aos máis pequenos e nos baixos do Concello haberá unha chocolatada. Contounolo Charo Tabales, concelleira de Cultura

En Salceda está todo preparado para a Cabalgata de Reis desta tarde que ten previsto a súa saída ás 18h dende a Praza da Devesa. Se o tempo non acompaña Melchor, Gaspar e Baltasar estarán de todos os xeitos no pavillón de deportes recibindo aos nenos.

En Tomiño non haberá Cabalgata esta tarde, no que se refire ao percorrido entre o Alivo e o Seixo. Si estarán os Reis que chegarán entorno ás 16.30h ao Concello e media hora despois comezarán a recibir aos nenos na carpa instalada na Praza do Seixo. Así o confirmaba a concelleira de Cultura, Cristina Martínez.

Pendentes do tempo están as Cabalgatas de Reis que se celebran mañá 5 de xaneiro. A da Eurocidade ten previsto que a comitiva real saia ás 17h dende Valença e chegue ao Paseo da Corredoira en Tui (fronte ao Seminario Menor) ás 19h. Mañá ás 12h tomarán unha decisión en función da climatoloxía de se sae a cabalgata ou se realiza so a recepción real. Así o confirmaba a concelleira de Cultura de Tui, María José González.

Esta pasada noite comezou a campaña da lamprea 2016 no río Miño que se estenderá ata finais de abril. Na marxe española haberá entorno a 150 embarcacións autorizadas. Esta primeira noite da temporada, foi en palabras do presidente da Asociación de Pescadores do río Miño, Fernando Ferreira, con poucas embarcacións debido ás adversas condicións climatolóxicas, pero cando menos xa viron algún exemplar o que lles da esperanzas para a pesca nos próximos meses.

Co gallo de despedir o ano 2015 e darlle benvida ó 2016, hoxe pasaron polos nosos micrófonos os voceiros da corporación municipal tudense. Esta foi a mensaxe de Nadal para os oíntes da Radio Municipal de Tui de Laureano Alonso, voceiro do partido Son de Tui