A cineasta tudense Diana Gonçalves estrea hoxe venres ás 20.30 h no Teatro Principal en Santiago a súa última creación: “Resonancias”. Será dentro da XX Mostra Internacional de Cinema Etnográfico do Museo do Pobo Galego. A directora deu hoxe os detalles desta nova proposta, que pretende conseguir que un lugar descoñecido non sexa alleo.

Achegámonos ao CEIP nº1 de Tui para coñecer o centro, o seu proxecto educativo e os servizos que ofrece. Fixémolo coa súa directora, Nuria Garabal, con Alberto López, profesor de Educación Física, e con dous alumnos Ricardo e Mariela.

O IES Indalecio Pérez Tizón de Tui vén de recibir a autorización para realizar unha AFD, Acción Formativa para persoas Desempregadas, que está enfocada en actividades auxiliares de comercio. O director do centro, Fernando Pérez-Lozao, e Alejandro Cuntiñas, profesor, deron os detalles desta formación, que está enfocada en persoas que estean inscritas como demandantes de emprego. Desenvolverase en horario de tarde, de luns a venres.

Hoxe ás 19.30 h a Sala de Exposicións de Tui acolle a presentación da novela “Birken” do escritor tudense Diego Alfonsín. No acto o autor estará acompañado pola súa nai Evangelina Rivero, unha gran lectora.

Esta presentación está organizada pola Libraría Nobel coa colaboración do Concello de Tui. O autor explicou na nosa sintonía a historia de Birken.

“As Desterradas” é a obra que mañá, ás 21 h presenta Producións Teatrais Excéntricas no Teatro Municipal de Tui, pechando a programación deste primeiro trimestre do ano. Unha proposta que se sitúa no século XVI para contar unha historia de loita feminina fronte á opresión. Deu os detalles Patricia Vázquez, unha das actrices que forman parte do elenco.

As entradas están á venda en tui.gal aos prezos de 10€ e 7,5€.

A programación do 8M do Concello de Tui continúa ás 18 h de hoxe mércores no edificio Francisco Sánchez. Será cun encontro con Ivonete da Silva, autora da tradución do libro da estadounidense Mikki Kendal “Feminismo de barrio”, con entrada libre e de balde. Hoxe coñecemos máis desta obra coa tradutora, que fixo fincapé no seu compromiso contra o racismo e na necesidade de referentes.

Dentro das "Experiencias con Esencia" que organiza Buguina Turismo, este sábado día 15, ás 18:00h, terá lugar unha visita guiada co nome Mulleres de Tui, en colaboración co historiador Suso Vila. Un percorrido que ten por obxectivo visibilizar a mulleres tudenses ao longo da historia. Hugo Lage explicou hoxe que é preciso inscribirse previamente no WhatsApp 684 19 39 27 ou en buguinaturismo.com.

Todos os venres deste mes de marzo pódese degustar unha tapa diferente nos 19 establecementos tudenses participantes no Tú-y D'Tapas, impulsado por ACITUI, dende as 19.00 até as 23 horas.

Isaac Míguez, de Emma Tapas e Brunch, D´Calle e 4Elementos, é un dos participantes desta iniciativa e hoxe facía balance da primeira xornada que tivo lugar o pasado venres e das propostas dos seus establecementos.

O fotógrafo pontevedrés afincado en Santiago Juan Adrio presentou até o domingo en ArtMadrid unha colección de fotografías sobre o Parque Natural Monte Aloia dentro da súa colección de sendeiros. Foi da man da galería Luisa Pita. Con Juan Adrio falamos da súa obra e da súa presenza en ArtMadrid.

Ideas Peregrinas dá un paso máis no seu camiño, ao converterse en franquía. Este establecemento - tenda, café e albergue - naceu hai nove anos da man das irmás Silvana e Mónica Crisóstomo. Neste tempo téñense convertido en referente para peregrinos e peregrinas pero tamén para a poboación local. Hoxe falamos con elas de como naceu Ideas Peregrinas e deste novo proxecto que teñen xa en marcha.