No Diario Cultural entramos na biblioteca do hospital Álvaro Cunqueiro de Vigo, onde coñecemos 'Biblioterapia', unha listaxe de lecturas seleccionada por profesionais sanitarios e especialistas en saúde mental.

Desde o Hospital de Día de Psiquiatría de Ferrol comparten connosco a súa experiencia no 'Club dos poetas vivos', un club de lectura creado en 2019 no que pacientes do hospital comparten as súas impresións sobre libros de todo tipo.

Descubrimos o club de lectura 'Capitán Mette', impulsado pola asociación de voluntarios en saúde mental Itínera de Santiago, no que vinte persoas len un libro cada semana.

Estas e outras prácticas de lectura en común en contextos terapéuticos e con colectivos vulnerables expoñeranse no encontro 'Lecturas de coidado', que promove a Fundación Uxío Novoneyra os días 20 e 21 de xaneiro no Hospital Psiquiátrico de Conxo, en Santiago.

Xackal presenta o seu primeiro disco longo, 'Vén forte ben forte', unha viaxe sonora desprexuizada, vestida de electrónica, ritmos latinos e conexións atlánticas, da bossa ao house pasando pola música de raíz galega. Na sección de voces expertas, Mónica Maneiro lévanos ata a exposición 'Lugar sen medida', de Correa Corredoira.

O grupo de teatro amador 'Tangatutanga Teatro' leva máis de 20 anos creando pezas moi variadas, dende comedias de Shakespeare ata pezas de creación colectiva. Agora percorren Galicia coa súa versión de 'O lago dos cisnes'. Na sección de voces expertas, Estíbaliz Espinosa presenta as novidades científicas e culturais.

Chega a Galicia a peza teatral 'Iribarne', unha corrosiva revisión escénica da figura política de Manuel Fraga e da nosa historia recente. Esther Carrodeguas é a autora da peza, unha coprodución da compañía Butaca Zero co Centro Dramático Nacional e a MIT de Ribadavia.

Na sección de voces expertas, Eva Mejuto recupera unha obra divulgativa sobre a contaminación mariña causada polos plásticos e propón un novo álbum ilustrado de poesía infantil.

A Escola Pablo Picasso da Coruña dá a coñecer documentación académica do artista entre os anos 1892 e 1895 na Mostra 'Picasso, alumno desta escola'. A mostra conta con láminas mitolóxicas, ilustracións da cidade e as notas sobresaíntes de Picasso, así como a súa primeira obra mestra. É a última das exposicións conmemorativas polo seu aniversario. Na sección de voces expertas, Tito Lesende preséntanos as novidades na escena musical.

Entrevista con Manuel Veiga Taboada, o autor da novela 'Perder as bestas', publicada por Xerais en 2023. Son 120 páxinas que nos mergullan na violenta peripecia dunha contrapartida, grupos organizados polo réxime para combater as partidas guerrilleiras, facéndose pasar por elas e sementando o terror entre a poboación. "Ao lector de hoxe esta violencia pódelle parecer esaxerada, pero era así e peor", explica o autor neste Diario Cultural.

O musicólogo Javier María López preséntanos ‘Herminio Villaverde. A trompa da Fonsagrada’. Este libro-cd percorre a fascinante historia dun instrumento musical espallado por todo o mundo e que recibiu máis de mil denominacións: birimbao, arpa da boca ou guimbarda. Na Fonsagrada, a comarca galega na que máis se preservou a súa memoria, chámanlle trompa. Alí naceu o principal protagonista desta obra, Herminio Villaverde, un labrador finado en 1991, virtuoso da trompa e figura clave para transmitir este legado musical ata nós. Na sección de voces expertas, Mónica Maneiro reomenda a exposición ‘Nocturnos’, de Nicolás Combarro.

‘Os Andares’ é unha serie de viaxes sonoras para acompañar camiñadas pola comarca dos Ancares. Unha proposta de docuficción baseada na investigación sobre o patrimonio da comarca, na evocación sonora e na escrita de María Lado, Clara Gayo ou Avelina Pérez, entre outros autores. Na sección de voces expertas, viaxamos con Mario César Vila á Torre de Doiras e ao Museo Arqueolóxico de Ourense.

Belén Gopegui, Antón Lopo, María Sánchez e Uxue Alberdi son algúns dos escritores que participan en ‘Lecturas de coidado’, un encontro ao redor da lectura en común que se desenvolve en Santiago. Tamén participan profesionais da saúde mental, da medicina comunitaria, da arteterapia, da pedagoxía ou da intervención social. Na sección de voces expertas, Tito Lesende avanza as dúas tendencias de 2024: a música pop con influencia das tradición e o paulatino regreso da música das guitarras eléctricas.

Os cantos do ciclo de Nadal: panxoliñas, aguinaldos e cantos de reis. O músico Gustavo Couto, da Asociación de Gaiteiras Galegas, comparte con nós o seu coñecemento sobre o baile e música tradicional de Nadal. Lémbranos a importancia dos cantos en grupo, en comunidade, como un elemento de unión entre a sociedade. Tamén entrevistamos a Branca Villares, mestra de música e baile tradicional, unha das impulsoras da recuperación dos ‘reiceiros do Cebreiro’; e a Xosé Feijóo, do grupo Os Chichisos, que levan 22 anos saíndo a cantar os Reis coa rapazada da área de Pontevedra. Neste espazo cultural facemos un percorrido polas tradicións de Nadal a través do tempo.