Bar Ban Sónicos fórmanse a principios do ano 2018 na Pobra do Caramiñal, con Manel Casal na voz e guitarra, Amroth Lopes no baixo e coros e Abél Cores na batería. O grupo percorre os carreiros de bandas como The Sonics e unha aposta polo garaxe e pola entrega de concertos enérxicos e contundentes con poucas concesións ao virtuosismo ou ao onanismo instrumental. Agora veñen de publicar o seu novo disco baixo o título de "Sede de ruína" e Vituco quedou con Manél, guitarrista e vocalista da grupo, nunha taberna da Pobra do Caramiñal para repasar a traxectoria do grupo e as cancións do novo traballo.

Mario César Vila fálanos hoxe de olería e a cantería, dous oficios tradicionais que tamén se pode analizar desde a perspectiva arqueolóxica.

Sound Troop é unha empresa adicada á mestura sonora para cine. Especializados en "Foley on location", proporcionan realidade sonora mediante acústicas naturais e multi microfonía aplicada en tempo real, para acadar o son narrativo de películas e series de televisíon e esa ambientación sonora que tanto evoca, e axuda, a contar as historas nas nosas pantallas. Involucrados en multitude de produccións galegas, estatais e tamén internacionais traballan en proxectos de Estados Unidos, Noruega, Dinamarca, Francia, Suiza, Italia, Reino Unido etc. Nós achegámonos ata a súa sede en Compostela onde nos contaron moitas cousas sobre o seu traballo, e como é o día a día dentro dos seus estudios. Alí falamos con Miguel Barbosa un dos “Foley Artist” máis activos e importantes de España, e con Diego Staub, mesturador e editor Foley.

Eva Mejuto homenaxea a Miguel López, Hematocrítico, recordando os sinais de identidade dos seus libros infantís: o humor e a sorpresa, a apelación á intelixencia da rapazada desde o humor e o afecto, a irreverencia, a falta de condescendencia… Como mostra, catro libros publicados en 2023: ‘Unha unicornia’, ‘Morto de fame’ e ‘Dona Problemas’ (Xerais) e mais ‘Vai polo pan’ (Cumio), unha obra do canadense Jean Baptiste Drouot que Hematocrítico traduciu ao galego.

O Consello da Cultura Galega acaba de facer dispoñible en Internet parte do Fondo Miguel Gutiérrez, que recolle propaganda e publicidade política desde os anos finais do franquismo ata a década dos 2000. Entre os documentos xa accesibles están o cartel de Isaac Díaz Pardo para a manifestación polo Estatuto de Autonomía en 1979, homenaxes aos últimos fusilados do franquismo ou exemplos de convocatorias feministas, ecoloxistas, sindicais e veciñais. Exploramos o Fondo Miguel Gutiérrez con Emilio Grandío, coordinador do grupo HISPONA da USC, que lidera a súa catalogación.

Tito Lesende escolleu música balsámica para esta ponte. ‘Mar’, unha das últimas cancións de Guadi Galego, que acaba de anunciar concertos especiais para 2024, baixo o título ‘Síntese Horizonte’. Tamén escoitamos a Guadi Galego en ‘Luz do norte’, a máis recente creación de Nastasia Zürcher. Presentamos un novo grupo, Sempasúchil, que estrea o 2 de decembro o seu primeiro disco: jazz e pop delicado a cargo de Antonio Casado, Ton Risco, Miguel Cabana e Alfonso Calvo. Poñemos o ramo cunha panxoliña rockeira que asina Bon Jovi.

‘Vía Morta’ é un espectáculo teatral inmersivo que sitúa o público nun campo de persoas refuxiadas. A montaxe parte dun texto do escritor e actor Carlos Olalla, inspirado polas visitas a campos de refuxiados do colectivo Pallasos en Rebeldía. Dirixe o espectáculo Eva Egido e forman o elenco Iván Prado, Anabell Gago, Fran Rei e Rocío Salgado. ‘Vía Morta’ estréase o domingo 10 de decembro no auditorio Constante Liste do concello coruñés de Teo.

Mónica Maneiro comenta as obras galardoadas na décimo terceira edición do premio Auditorio de Galicia para artistas noveis. As 33 obras seleccionadas poden verse na exposición aberta no auditorio compostelán ata finais de febreiro. Conversamos con Sergio Morey, que gañou o primeiro premio coa obra ‘Cruceiro a Santa Librada e demais mártires disidentes’, unha peza que fala sobre a violencia contra o colectivo LGBTIQA+.

O Fanzine Fest leva música electrónica de vangarda e artes visuais a diferentes espazos da Coruña durante esta semana. Do Planetario á fundación Luís Seoane, da Domus á sala O Túnel. Conversamos con Pablo Cubeiro, un dos directores do Fanzine Fest, e con Óscar Domínguez, membro do colectivo MOM, un grupo artístico coruñés que propón este mércores unha instalación sensorial interactiva na igrexa das Capuchiñas.

Neste ‘cosmic latte’ con Estíbaliz Espinosa falamos da paleta cromática do cosmos e da evolución biolóxica do xénero homo. Escoitamos versos de Virginia Aguilar Bautista e música de Fanny & Alexander.

Por primeira vez, na súa dilatada traxectoria, o pintor coruñés Correa Corredoira ten dúas exposicións a disposición do público galego. En Ourense "Un lugar sen medida", froito da súa experiencia africana. En Carballo algo ben diferente. Con Correa Corredoira fala Isabel Freire.

Tito Lesende avánzanos unha das cancións do disco-fanzine que Dios ke te Crew repartirán este 2 de decembro no concerto que culmina as celebracións dos seus 20 anos de traxectoria: unha relectura de ‘Silencio’ a cardo de Karma Sound. Escoitamos ‘Baile’, o primeiro adianto do disco que publicará Santi Araújo en 2024 e ‘El alijo’, o novo tema de Queralt Lahoz. E despedimos a Shane MacGowan con ‘Fairytale of New York’, a panxoliña triste que The Pogues e Kirsty MacColl gravaron en 1987.

‘Os suicidantes’ é unha distopía ambientada en Santiago de Compostela, nun futuro deshumanizado no que se estende entre a poboación a ‘gran dor’, que lles quita as ganas de vivir. É a primeira banda deseñada do novelista Diego Ameixeiras, en colaboración co ilustrador Tomás Guerrero. Os dous autores explícannos algunhas das claves desta historia negrísima de alento humanista publicada por Edicións Xerais.

Estréase ‘Casa do Silencio’, o filme rodado en Galicia polo cineasta de culto estadounidense Jon Jost. Unha película poética e musical, enraizada na nosa cultura e inspirada polos tabús familiares. Participan en ‘Casa do Silencio’, poetas como Ismael Ramos, Antón Lopo ou Xiana Arias e músicos como Ugia Pedreira ou Gabi Reboredo. A Filmoteca de Galicia e Numax dedícanlle a Jost un ciclo de proxeccións durante esta semana. Conversamos co cineasta e con Ramom Pinheiro, director d´ACentral Folque, que produciu a película.

Mónica Maneiro fálanos de Helmut Newton, fotógrafo de moda a quen está adicada a terceira exposición da Fundación Marta Ortega Pérez.

Zavala presentan o seu primeiro disco, ‘Pequeno manual para grandes cambios I (teoría e práctica)’, publicado por Ferror Records. Un traballo que combina os sons acústicos cos sintéticos e algún pouso da música tradicional, con letras que respiran melancolía urbana. Falamos con Carla Romalde e Víctor Ledo, dous dos integrantes deste quinteto, que presenta en directo o seu debut o 5 de xaneiro na sala Ruído de Ferrol.

Con Mario César Vila abordamos a relación que existe entre o conflito bélico e a arqueoloxía.

Nove entidades profesionais das artes escénicas e musicais promoven un protocolo de prevención e actuación do acoso sexual e da discriminación por sexo e xénero. Preséntannolo Patricia de Lorenzo, de Escena Galega, e Patty Castro, da Asociación Músicas ao Vivo.

Eva Mejuto proponnos este venres dous libros con memoria. 'Mambrú volveu da guerra' é unha peza teatral infantil de Carlos Labraña na que unha nena fai amizade cun soldado de porcelana que viviu na súa vila hai moitos anos. A obra gañou o premio SGAE de teatro infantil, está publicada por Xerais e recomendada a partir dos 9 anos. 'Quen escribirá a miña historia?' é unha novela de Iria Morgade Valcárcel que pescuda no destino das persoas presas no campo de concentración do mosteiro de Oia, editada por Galaxia. A autora é investigadora sobre memoria histórica no grupo Histagra da USC.