Yolanda Castaño, Premio Nacional de Poesía 2023 por 'Materia'. Como non podía ser doutra forma, aquí a temos para que nos conte as súas sensacións.

Por primeira vez en 19 anos, o audiovisual galego ocupa unha sección específica no London Spanish Film Festival (LSFF) grazas ao esforzo conxunto do Galician Film Forum (GFF) e da Mostra Internacional do Cinema Etnográfico (MICE). Cóntanolo unha das representantes da mostra Adriana Páramo.

Conectamos brevemente con Cisco Novo dende San Sebastián, onde O Corno está facendo historia.

Na Biblioteca da Cidade da Cultura de Galicia celébrase o XX Simposio O Libro e Lectura, no que o sector editorial galego valorará os 40 anos da súa asociación. Un simposio no que estarán presentes os nosos dous convidados: Manuel Bragado, que participa co relatorio 'As cifras da edición en Galicia'; e Henrique Alvarellos, presidente da Asociación Galega de Editoras.

No eido da arte, Mónica Maneiro trae a María Marco, comisaria da mostra 'Os sobrantes', obra de Rosalía Batet que se expón en Pontevedra estes días.

A arquitecta María Novas foi premiada na Bienal Española de Arquitectura e Urbanismo pola súa obra "Arquitectura e xénero". Con ela charlamos sobre as claves deste libro e do seu recoñecemento.

Espazo tamén para a ciencia con Estíbaliz Espinosa, que vai aclararnos cales son as diferencias entre o equilux e o equinocio.

Remata o verán, pero non por iso os festivais. Gondomar acolle a V Edición do Season Fest con música que tampouco faltará en Carballo, onde ten lugar a XXVI Edición do Xiria Pop. Quen mellor para falar destes festivais que os seus organizadores: Isaac González e Xabier Graña, respectivamente.

No apartado literario, Eva Mejuto tráenos un libro ilustrado feito en Galicia sobre as "Estrelas galegas da ciencia".

Sarabela Teatro estrea en Ourense "Made In Galiza", adaptación teatral dun relato do libro homónimo de Séchu Sende. Charlamos dela coa súa directora, Fina Calleja.

A nota musical vén da man de Tito Lesende, co que falamos do álbum debut de Mondra: "Ardén".