Avant diesch onns ha il chor maschadà grischun da seniors Canziano cumenzà sco project da la Pro Senectute. Uss po el festivar ses giubileum. Igl è stà planisà ch'il chor ad hoc Canziano haja insaquantas emprovas e dettia lura quatter concerts en il Grischun. Il project ha dentant survegnì tant resun positiv dal public e da las chantaduras e chantadurs, ch'il chor ad hoc è daventà in chor maschadà ch'exista uss gia dapi diesch onns. L'emissiun «Noss Chors» preschenta oz insaquantas chanzuns dal disc nov e mussa co il chor ha tunà a l'entschatta.