Ernest Mnyaka en Mariëtte Opperman gesels oor Ernest se digbundel, Die Boef is dood. Ernest is ’n petroljoggie, wat sy lewe in die tronk omgekeer het, en toe ’n Xhosa-digbundel daaroor geskryf het. Mariëtte het sy vorige onderhoud met Martelize Brink op RSG gehoor, en toe die bundel na Afrikaans vertaal.

Koshistorikus Hetta van Deventer-Terblache praat oor neutmuskaat en foelie, twee speserye van dieselfde plant.

Haidee Muller-Isaacs gesels met die tech-ghoeroe, Arlene Steyl. Sy het in 2019 die Forbes Woman Africa Technology and Innovation-toekenning gewen, en in dieselfde jaar op die voorblad van Forbes Women Africa gepronk. En, natuurlik is haar huis tech-slim. Arlene vertel ook hoe dit deesdae gaan met die tech-universiteit waar studente leer om te programmeer sonder enige dosente of klasgeld, 'n eerste in Afrika.

Janelle Visagie en Rylan Lemmetuis vertel vir Martelize Brink van hul rolle in The Sound of Music, wat binnekort by Kunstekaap en Montecasino te sien is.

Daar is al baie gesê dat Nelson Mandelabaai Suid-Afrika se natuurhoofstad is met sy lieflike strande en en natuurreservate. Nou het die Baai se groen kroon nog ‘n paar juwele bygekry, en dit is die internasionaal erkende groenvlag-status, wat aan 11 van die metropool se staproetes toegeken is. Clyde Scott, munisipale natuurbewaringsbeampte, het met Mariska Spoormaker hiervan vertel.

Lydia Von Wielligh-Steyn vertel vir Martelize Brink wat die kernwapenverdrag behels waaruit Rusland onlangs onttrek het.

‘n Nederlander se twee meterlang groen mamba-troetelslang is soek, en die dorp is gewaarsku om weg te bly as hulle die slang teëkom.